دانا نۇرجىگىتوۆا دەنساۋلىق ساقتاۋ جۇيەسىنىڭ باسقارۋ جۇمىسىن سىنعا الدى

سەنات دەپۋتاتى دانا نۇرجىگىتوۆا باس پروكۋراتۋرا مەن دەنساۋلىق ساقتاۋ مينيسترلىگىنەن مەديتسينالىق قىزمەت كورسەتىلدى دەپ جالعان مالىمەت بەرۋ جاعدايىن تەكسەرىپ, كىنالىلەردى جازالاۋدى سۇرايدى. سەناتور بۇل تۋرالى الەۋمەتتىك جەلىلەردەگى پاراقشاسىندا مالىمدەدى.

سەناتور "مەديتسينالىق ساقتاندىرۋ قورى ءبىر عانا جارتى جىلدىقتىڭ ىشىندە سومماسى 75,5 ملن تەڭگە 11 607 جالعان تاعايىنداۋ  انىقتاعان. قازىر ەلىمىز ءۇشىن ونسىزدا وڭاي ەمەس كەزەڭ كەزىندە ورىن العان جاعداي وتاندىق  دەنساۋلىق ساقتاۋ  جۇيەسىن "قايتا ىسكە قوسۋ" قاجەت ەمەس پە دەگەن وي سالىپ وتىر", - دەپ جازدى.

"كىنالىلەردى انىقتاپ جانە جازالاپ قانا قويماي (جاۋاپكەرشىلىكتى كۇشەيتۋگە قاتىستى ايتىلعان مالىمدەمە), سونداي-اق جۇيەلىك كەشەندىك شارالار قاراستىرۋ قاجەت. مەنىڭ ويىمشا, بۇل جاعدايدا قاراپايىم دارىگەرلەرگە عانا جاۋاپكەرشىلىكتى ارتۋدىڭ قاجەتى جوق. ولاردىڭ ەڭبەگىنە پاندەميا كەزىندە بارلىعىمىز كۋا بولدىق. ۋاكىلەتتى ورگاننان وسىنداي جاعدايلاردى بۇدان ءارى بولدىرماۋ جانە تولىعىمەن جويۋ ماسەلەرىنە قاتىستى ناقتى ۇسىنىستارىن كۇتەمىز", - دەلىنگەن سەناتوردىڭ جازباسىندا.

دانا نۇرجىگىتوۆا قاداعالاۋشى ورگانعا جوعارىداعى اتالعان زاڭ بۇزۋشىلىقتاردى انىقتاۋ, كورسەتىلمەگەن مەديتسينالىق قىزمەتتەر ءۇشىن تولەنگەن قاراجاتتاردى قايتارۋ جانە كىنالىلەردى جاۋاپكەرشىلىككە تارتۋ بويىنشا پروكۋرورلىق دەن قويۋ شارالارىن قابىلداۋ تۋرالى رەسمي ساۋال جولدايتىنىن جەتكىزدى.

سونىمەن قاتار, ءوزىنىڭ دەپۋتاتتىق مانداتىن پايدالانا وتىرىپ, سەناتور دەنساۋلىق ساقتاۋ مينيسترلىگىنە جالعان تىركەۋ مۇمكىندىگىن بولدىرماۋ ارقىلى مەديتسينالىق قىزمەت تولەم جۇيەلەرىن ودان ءارى جەتىلدىرۋ, ۆەدومستۆولىق جانە ناۋقاستار تاراپىنان قاداعالاۋ قۇقىعىن كۇشەيتۋ, قوردىڭ (امسق) جانە وزگە دە مەديتسينالىق ۇيىمداردىڭ تولىقتاي قارجىلىق اشىقتىعىن قامتاماسىز ەتۋ تۋرالى رەسمي ۇندەۋ جولدايتىنىن مالىمدەدى.