پرەزيدەنت جانىنداعى ەكونوميكالىق ءوسۋدى قالپىنا كەلتىرۋ جونىندەگى مەملەكەتتىك كوميسسيا پاندەميا كەزەڭىندە دەنساۋلىق ساقتاۋ ورگاندارىندا مەملەكەتتىك قىزمەتكە تاعايىنداۋدى جانە كونكۋرستىق راسىمدەردى جەدەلدەتىپ جۇرگىزۋ ماسەلەسىن پىسىقتاۋدى تاپسىرعان بولاتىن.
بۇل رەتتە كارانتين كەزەڭىندە ۇكىمەتتىڭ الەۋمەتتىك بلوگىنا جۇكتەلگەن قازىرگى جانە الداعى مىندەتتەردى ەسكەرە وتىرىپ, جەدەلدەتىلگەن كونكۋرستىق راسىمدەردى حالىقتى الەۋمەتتىك قورعاۋ (بۇگىنگى جاعدايلاردا الەۋمەتتىك شارالاردى قامتاماسىز ەتۋ جونىندەگى مىندەتتەرگە بايلانىستى) جانە ءبىلىم بەرۋ (پاندەميا كەزەڭىندە ۇزدىكسىز ءبىلىم بەرۋ پروتسەسىن ساپالى ۇيىمداستىرۋ جونىندەگى مىندەتتەرگە بايلانىستى) سالالارىنداعى ورگاندارعا تاراتۋ تۋرالى شەشىم قابىلداندى.
كونكۋرستىق راسىمدەردىڭ مەرزىمىن قىسقارتۋ وسى ورگاندارداعى بوس جۇمىس ورىندارىن جەدەل تولتىرۋعا مۇمكىندىك بەرەدى, بۇل وسى ۆەدومستۆولارعا جۇكتەلگەن مىندەتتەردى ۋاقتىلى ورىنداۋعا ىقپال ەتەدى. جوعارىدا ايتىلعانداردى ەسكەرە وتىرىپ, مەملەكەتتىك قىزمەت ىستەرى اگەنتتىگىنىڭ وسى جىلعى 22 شىلدەدەگى بۇيرىعىمەن كونكۋرستى وتكىزۋ ەرەجەسىنە ءتيىستى تۇزەتۋلەر ەنگىزىلدى.
ماسەلەن, ەنگىزىلگەن تۇزەتۋلەرگە سايكەس كارانتين كەزەڭىندە دەنساۋلىق ساقتاۋ, ەڭبەك جانە حالىقتى الەۋمەتتىك قورعاۋ, ءبىلىم جانە عىلىم مينيسترلىكتەرى, سونداي-اق اكىمدىكتەردىڭ دەنساۋلىق ساقتاۋ, حالىقتى جۇمىسپەن قامتۋ جانە ءبىلىم بەرۋ سالاسىنداعى بولىمشەلەرى لاۋازىمدارىنا كونكۋرستار وتكىزۋ مەرزىمى قىسقارتىلدى. وسىلايشا كونكۋرستىق راسىمدەر جيىرما ەكى كۇننەن ءتورت كۇنگە دەيىن قىسقارتىلدى.