ەلوردالىق ءبىلىم باسقارماسى مەن «استانا – ادالدىق الاڭى» جوبالىق كەڭسەسىنىڭ قىزمەتكەرلەرى قالاداعى جالپى ءبىلىم بەرەتىن مەكتەپتەرگە كىتاپتاردىڭ تارالۋىن قاداعالاپ, كوشپەلى مونيتورينگ جۇرگىزدى, دەپ حابارلايدى نۇر-سۇلتان قالاسى اكىمدىگىنىڭ رەسمي سايتى.
ەلوردا مەكتەپتەرىندە جاڭا وقۋ جىلىنا دايىندىق جالعاسۋدا. قازىرگى ۋاقىتتا وقۋ ورىندارى جاڭا وقۋلىقتارمەن قامتاماسىز ەتىلۋدە.
"بۇل قويمادا 1-11 سىنىپتارعا ارنالعان 19 باسپانىڭ وقۋلىقتارى بار. وسى جەردەن بارلىق مەكتەپتەر كەستەگە سايكەس وقۋلىقتار الادى. بۇگىنگى تاڭدا 35 مەكتەپ كىتاپ الدى", - دەيدى قالالىق ءبىلىم باسقارماسى باسشىسىنىڭ ورىنباسارى باعلان سماتاەۆا.
بۇل رەتتە سانيتاريا نورمالارى قاتاڭ ساقتالادى. ەكى اپتا ىشىندە ەلورداعا شامامەن 20 كاماز-بەن 750 توننا وقۋلىق اكەلىنگەن. وقۋلىقتار مەكتەپتەرگە بولىنۋدە. وقۋ قۇرالىن ۋاقتىلى جەتكىزۋدى مونيتورينگ توبى قاداعالايدى.
"بۇگىن قالالىق ءبىلىم باسقارماسىمەن بىرلەسە وتىرىپ, قوسشى اۋىلىنداعى مەكتەپكە بارىپ, وقۋلىقتاردى 1-11 سىنىپتارعا تاراتتىق. اتاپ ايتقاندا, وقۋلىقتاردىڭ № 54 مەكتەپ-ليتسەيگە جىبەرىلۋىن قاداعالادىق. ءبىز بۇل ۇدەرىستى تولىق باقىلايمىز", – دەيدى نۇر-سۇلتان قالاسى اكىمدىگىنىڭ "استانا-ادالدىق الاڭى" جوبالىق كەڭسەسىنىڭ ۇيلەستىرۋشىسى ساۋلە بيسەمباەۆا.
قازاقستاندا الداعى وقۋ جىلىن ەلىمىزدىڭ بارلىق مەكتەپتەرىندەگى 1-11 سىنىپتاردا قاشىقتان وقىتۋ جوسپارلانعان. وسىعان بايلانىستى ءبىلىم باسقارماسىنا جانە وقۋ ورىندارىنىڭ ديرەكتورلارىنا مەكتەپتەردىڭ قاشىقتان وقىتۋعا دايىندىعىن قامتاماسىز ەتۋ تاپسىرىلدى.