راحمەت ساعان, دارىگەر!

– ءبىز ءۇش توپقا بولىندىك. ەكى توپتا ەكەۋدەن, ال ءبىر توپتا ءبىر دارىگەر بولدى.­ ءسويتىپ «قىزىل ايماققا» كىردىك. ارقاي­سى­مىزدىڭ اتقاراتىن مىندەتىمىز ناق­تى­­لاندى. سوعان سايكەس ناۋقاستاردى تەك­­سەرىپ, حاتتامادا كورسەتىلگەن ەمدى جۇر­­­گىزدىك, – دەيدى رەسەيدىڭ استراحان وب­لى­­سىنان كەلگەن دارىگەر اننا چەپەل. – كۇن­­­دەلىكتى جۇمىسىمىز جەرگىلىكتى ستان­­دارتقا ساي التى ساعاتقا سوزىلدى. مۇندا­ ەمدەۋ تاكتيكاسىنىڭ وزىندىك ەرەك­­شە­لى­گى­ بار ەكەن. بىراق ايتارلىقتاي كوپ ەمەس. باستاپقىدا جۇمىس كوپ بولدى. سو­عان قاراماستان, قازاقستاندىق ارىپ­تەس­تە­رىمىزبەن ۇيلەسىمدى جۇمىستىڭ ناتي­جە­سىن­دە ءبارى دە رەتتەلدى. از عانا كۇننىڭ ىشىن­دە اتىراۋداعى دارىگەرلەرمەن دوستاس­تىق, ولاردىڭ جانقيارلىق ەڭبەگى­نە كۋا بول­دىق. ولار شىن مانىندە بار ۋاقىتىن جۇ­مىس­تا وتكىزىپ جاتىر. بۇل – ۇلكەن ەڭبەك.

ال ماسكەۋلىك دارىگەرلەر توبىنىڭ جەتەكشىسى ۆلاديمير ۆلاسوۆ ەكى اپتالىق جۇمىسىن №2 وبلىستىق ينفەكتسيالىق اۋرۋحانادا وتكىزدى. ونىڭ ايتۋىنشا, رە­سەيلىكتەر اتىراۋداعىداي كۇردەلى ەپي­دەميالىق احۋالدى ناۋرىز, ءساۋىر ايلارىندا باستان وتكەرىپتى.

– ءبىز ينفەكتسيالىق, پروۆيزورلىق ستاتسيونارلارداعى ەمدەۋ شارالارىنىڭ جوعارى دەڭگەيدە ۇيىمداستىرىلعانىن اڭعاردىق. كادر ماسەلەسى دە قازىر شەشىلىپ جاتىر. قاۋىپتى ىندەتتى جۇقتىرىپ العان جەرگىلىكتى دارىگەرلەر دە قاتارعا قوسىلۋدا. قازاقستاندىق ارىپتەستەرىمىزدەن ءبىراز نارسەنى ۇيرەندىك. ناۋقاستاردى ەمدەۋدە اتىراۋلىق دارىگەرلەر ءوز ومىرىنە تونگەن قاۋىپكە قاراماستان, كاسىبي شەبەرلىگىن كورسەتىپ وتىر, – دەگەن پىكىرىمەن ءبولىستى ۆلاديمير يۆانوۆ.

وبلىس اكىمى ماحامبەت دوسمۇحامبەتوۆ اتى­راۋداعى ينفەكتسيالىق جانە پروۆيزور­لىق ستاتسيونارلاردا ناۋقاستاردى ەمدەۋ­گە ۇلەس قوسقان رەسەيلىك دارىگەرلەردى قا­بىل­­داپ, ريزاشىلىعىن ءبىلدىردى. اكىم­نىڭ مالىمەتىنشە, رەسەي  دارىگەرلەرى اتى­راۋ­عا دەر كەزىندە كەلىپ, كومەگىن كورسەتتى.

– قازىر وڭىردە ەپيدەميالىق احۋال تۇراقتانىپ كەلەدى. ينفەكتسيا جۇقتىر­عاندار سانى شىلدەنىڭ باسىنداعى دەرەكپەن سالىستىرعاندا, ايتارلىقتاي تو­مەندەدى. ناۋقاستاردىڭ 70 پايىزعا جۋى­عى ساۋىعىپ شىقتى, –دەيدى اكىم.

وسىعان وراي وبلىستىق اۋرۋحاناداعى, جىلىوي مەن قۇرمانعازى اۋدانىنداعى ستاتسيونارلار جابىلىپ, ەندى تامىزدا جوسپارلى ەمدەۋدى باستاۋعا كوشكەلى وتىر. اتىراۋ جان باسىنا شاققاندا تەست تاپسىرۋدا الدىڭعى ورىنداعى ايماق سانالادى. مۇندا قاۋىپتى ىندەت تىركەلگەننەن بەرى 153 587 پتر-تەست سىناماسى الىنىپتى. سونداي-اق ءدارى-دارمەكپەن قامتۋدىڭ ءۇش ايلىق قورىن جاساقتاۋ ءۇشىن سوڭعى ەكى اپتادا 100 توننا ءدارى-دارمەك جەتكىزىلدى. ەندى تاعى دا 40 توننا دارىلىك پرەپاراتتار اكەلىنەدى. ءموبيلدى توپتاردىڭ, call-ورتالىق پەن Covid-تاكسي جۇمىسىنىڭ دا ناتيجەسى بايقالدى.

اتىراۋ وبلىسى