ەستە بولسا, مەگاپوليسكە 16 شىلدە كۇنى ءۇندىستاننان جالپى سالماعى 10 توننا بولاتىن مەديكامەنتتەر تيەگەن ۇشاق كەلىپ قونعان بولاتىن. ال بۇگىن, ياعني 17 شىلدە كۇنى, تۇندە رەسەي فەدەراتسياسىنان قاجەتتى ءدارى-دارمەكتەر تيەگەن تاعى ءبىر ۇشاق كەلىپ جەتتى, - دەپ حابارلايدى Egemen.kz.
الماتى اكىمدىگىنىڭ قالانى ءدارى-دارمەكتەرمەن قامتاماسىز ەتۋ جونىندەگى ۇيلەستىرۋشىسى زاڭعار سالىمباەۆتىڭ حابارلاۋىنشا, رەسەيدەن جەتكىزىلگەن ءدارى-دارمەكتەر اراسىندا بالالار مەن ۇلكەندەرگە ارنالعان پاراتسەتامول, اموكسيكلاۆ, مەروپەنەن جانە باسقا دا وتە قاجەت ءدارى-دارمەكتەر بار ەكەن. جالپى, 1 135 000 بىرلىكتەگى ءدارى-دارمەكتەر جەتكىزىلدى.
ءۇندىستان مەن رەسەيدەن جەتكىزىلگەن جۇك قالانىڭ ءدارىحانا جەلىسىن ءدارى-دارمەكتەرمەن قامتاماسىز ەتەتىن ديستريبيۋتورلىق كومپانيالارعا تيەسىلى.
قالا اكىمىنىڭ تاپسىرماسى بويىنشا پرەپاراتتاردى دەرەۋ راسىمدەۋ جانە سەرتيفيكاتتاۋ بويىنشا بارلىق جاعدايلار جاسالعان. دارىلەردىڭ ەش كەدەرگىسىز جەتكىزىلۋى قاتاڭ باقىلاۋعا الىنعان. بۇدان وزگە, الماتىدا ءدارى-دارمەكتەردى جەتكىزۋشىلەرگە پايىزسىز نەسيە ءبولۋ بويىنشا 5 ميلليارد تەڭگە ءبولىنىپ, تۇراقتاندىرۋ قورى قۇرىلعانى بەلگىلى.
"29 ماۋسىمدا ءىرى فارمكومپانيالارمەن, ءدارىحانالار جەلىسىمەن مەموراندۋمعا قول قويىلعان بولاتىن. وسى قۇجات نەگىزىندە قاجەت ءدارى-دارمەكتەر دەر كەزىنە جەتكىزىلۋدە. حالىققا كەرەك پرەپاراتتار تىزبەسى كەڭەيۋدە. ءبىزدىڭ الداعى جوسپارىمىز – قالانىڭ بارلىق ءدارىحانالارىن ءدارى- دارمەكتەرمەن قامتاماسىز ەتۋ", – دەدى ز. سالىمباەۆ.
"فارماتسەۆتيكالىق كومپانيالار قىزمەتكەرلەرى كۇردەلى كەزەڭدە تاۋلىك بويىنا جۇمىس جاساۋدا. ايتا كەتەرلىگى, الماتى اكىمدىگى جەتكىزۋشىلەرگە جان-جاقتى كومەك كورسەتۋدە. ءتۇرلى اكىمشىلىك كەدەرگىلەر دەر كەزىندە جويىلىپ, كولىكپەن قامتاماسىز ەتۋ جانە باسقا دا شارالار شۇعىل ىسكە اسۋدا. مەگاپوليس باسشىلىعى فارمكومپانيالار, مەديكامەنتتەر وندىرۋشىلەر وكىلدەرىمەن ۇنەمى بايلانىستا", - دەپ اتاپ ءوتتى ز. سالىمباەۆ.
جاقىن كۇندەرى قالاعا ۇلكەن سۇرانىسقا يە ءدارى-دارمەكتەر تيەگەن كەزەكتى رەيستەر كەلەتىن بولادى. ايدىڭ سوڭىنا دەيىن شامامەن 6,5 ملن قاپتاماداعى قاجەتتى پرەپاراتتار جەتكىزىلەدى دەپ كۇتىلۋدە.
ز. سالىمباەۆ رەسەيدەن كەلگەن جۇكتىڭ گۋمانيتارلىق ەمەس ەكەنىن ايتتى. مۇنداعى ءدارى-دارمەكتەر قالا ءدارىحانالارىنا ءبولىنىپ بەرىلەدى.
"ينتەرنەتتە گۋمانيتارلىق پرەپاراتتاردىڭ ساتىلعانى تۋرالى جالعان اقپاراتتار تاراۋدا. بۇل شىندىققا جاناسپايدى. ويتكەنى, گۋمانيتارلىق كومەك ەشقاشان جەكە دارىحانالارعا بەرىلمەيدى, ول تەك مەملەكەتتىك اۋرۋحانالارعا عانا بولىنەدى", - دەپ اتاپ ءوتتى ول.
ەسكە سالساق, بۇرىندارى الماتىعا رەسەيدەن 55 توننالىق ءدارى-دارمەكتەر ەكى رەيسپەن جەتكىزىلگەن ەدى. بۇل شامامەن 3 ملن قاپتاما, مۇندا الەۋمەتتىك ماڭىزى بار 10-نان استام ءدارى-دارمەك تۇرلەرى بار, ونىڭ ىشىندە قىزۋدى تۇسىرەتىن جانە COVID-19-عا قارسى پرەپاراتتار. ياعني, تىزىمدە ازيتروميتسين, تسەفتازيديم, يبۋپروفەن, فراكسيپارين, مەترونيدازول, تسەفترياكسون, گەپارين, نيمەسۋليد, لەۆوفلوكساتسين, مەروپەنەم پوروشوگى, ەنوكساپارين-بينەرگيا جانە باسقا پرەپاراتتار بولدى.