تۇركىستان وبلىسى تولەبي اۋدانىندا 13 مامىر كۇنى قاتتى جاۋىن-شاشىن سالدارىنان سۋ ارنالارى تاسىپ, سەل ورىن العان بولاتىن.
سالدارىنان ۇيلەردى سۋ باسىپ, زاقىمداندى. وبلىس اكىمى ومىرزاق شوكەەۆتىڭ تاپسىرماسىنا سايكەس, اۋدانداعى 42 ءۇي جارامسىز دەپ تانىلىپ, جاڭا باسپانالاردىڭ قۇرىلىسى باستالعان-دى.
بۇگىندە سالىنىپ جاتقان ۇيلەردىڭ قۇرىلىسى اياقتالۋعا جاقىن. جالپى 42 ءۇي تامىز ايىنىڭ باسىندا تولىق اياقتالىپ, يەلەرىنە تابىستالاتىن بولادى. ول باسپانالاردىڭ 17-ءسى – لەڭگىر قالاسىندا, 2-ءى – كيەلىتاس, 22-ءسى – سۇلتان-رابات, 1-ءى – ىنتىماق اۋىلدارىندا سوعىلۋدا. قازىرگى تاڭدا 22 ءۇيدىڭ شاتىرى جابىلىپ, تەرەزەلەرى ورناتىلعان. ىشكى ەلەكتر جەلىسىن, جىلۋ جۇيەلەرىن جۇرگىزۋ مەن ىشكى جانە سىرتقى ارلەۋ جۇمىستارى جۇرۋدە. باسپانالاردىڭ جالپى اۋماعى – 2640 شارشى مەتر. ۇيلەردىڭ قۇرىلىسىن 9 مەردىگەر مەكەمە جۇرگىزۋدە.