تۇركىستان وبلىسى ماقتاارال اۋدانىنداعى توپان سۋدان زارداپ شەككەن جاڭاتۇرمىس, جەڭىس, فيرداۋسي, دوستىق, ورگەباس ەلدىمەكەندەرىنىڭ تۇرعىندارىنا ۇكىمەت تاراپىنان بەرىلەتىن 100 مىڭ تەڭگەلىك قارجىلاي كومەككە 6347 ازامات قۇجات تاپسىرعان. ونىڭ 5356-نىڭ ءوتىنىشى ماقۇلدانىپ, ەسەپشوتتارىنا جالپى 535 600 000,0 تەڭگە جىبەرىلدى.
تۇركىستان وبلىسى بويىنشا قازاقستان حالقى اسسامبلەياسى توراعاسىنىڭ ورىنباسارى عاني رىسبەكوۆتىڭ مالىمدەۋىنشە, قالعان 911 ادامنىڭ قۇجاتى تۇگەل بولماۋىنا بايلانىستى ءتيىستى كومەكتى الماعان."قازىرگى تاڭدا توتەنشە جاعدايدان زارداپ شەككەندەرگە بەرىلەتىن قارجىلاي كومەكتى ۇلەستىرۋ جۇمىستارى اتقارىلۋدا. انىقتاۋ جۇمىستارى كەزىندە 146 ازاماتتىڭ قۇجاتى ءتيىستى اكىمدىكتىڭ تاراپىنان راستالدى. ال, 62 ازاماتتىڭ قۇجاتى قايتالانسا, 4 ادام باسقا ەلدىڭ ازاماتتارى بولىپ شىققان. سونداي-اق, 779 ازاماتتىڭ قۇجاتى كوميسسيانىڭ قاراۋىنان قايتا وتەتىن بولادى",-دەدى ع.رىسبەكوۆ.
بۇدان بولەك, كاسىپكەر الىشەر ۋسمانوۆتىڭ قورى ەسەبىنەن توپان سۋدىڭ زاردابىن كورگەن 5205 وتباسىعا 1000 اقش دوللارىنان بەرىلگەن. بۇگىندە ءدال وسىنداي كومەك الۋى ءتيىس قوسىمشا 120 وتباسى انىقتالىپ وتىر. ناتيجەسىندە 5316 وتباسىنىڭ ەسەپشوتىنا 2 206 724 760,0 تەڭگە جىبەرىلدى.وسى سياقتى قارجىلاي قولداۋلارعا يە بولعان جاننىڭ ءبىرى فيرداۋسي اۋىلىنىڭ تۇرعىنى فينايات فايزيەۆ قيىندىققا تاپ بولعان ازاماتتارعا كومەك قولىن سوزعاندارعا شەكسىز العىسىن ءبىلدىردى. "اۋىلىمىزدى توپان سۋ باسقان كۇننەن باستاپ, بىزگە ءارتۇرلى كومەك كورسەتىلىپ كەلەدى. مىسالى, ءۇيسىز قالعان كەزدە تۇگەل اۋىلدى ۋاقىتشا ەۆاكۋاتسيالىق ورتالىققا اپارىپ جايعاستىردى. ازىق-ت ۇلىك, كيىم-كەشەك, باسقا دا قاجەتتى زاتتارمەن قامتاماسىز ەتتى. ودان بولەك, اكىمدىكتىڭ قولداۋىمەن اۋىلدى قوقىستان تازارتىپ الدىق. مىنە, بۇگىندە 17 ملن تەڭگەنىڭ 50 پايىزىن اۋدارىپ بەردى. سول قارجىعا باسپانامىزدى سالىپ جاتىرمىز. قالعانىن ءۇيدىڭ شاتىرىن جاۋىپ بولعان سوڭ اۋدارىپ بەرەتىن بولدى. جانە كومەك رەتىندە كەيبىر قۇرىلىس ماتەريالدارىن تەگىن دە جەتكىزىپ بەرۋدە. وسىنداي كومەككە ۇيىتقى بولىپ وتىرعان مەملەكەت باسشىسى مەن وبلىس اكىمىنە جانە بارشا حالىققا العىس ايتقىمىز كەلەدى", دەيدى ف.فايزيەۆ.