ء“ار ادامنىڭ جانىندا اشىلماي جاتقان كەنى بار” دەگەن ءسوزدىڭ يەسى كىم ەكەندىگىن, سول كىسىنىڭ شىعارمالارىنداعى رۋحاني تازالىق پەن ادامگەرشىلىك سەزىمىن بويىنا دارىتقان وقىرمان قاۋىم جاقسى بىلەدى. ءيا, دۇرىس ايتاسىز. بۇل ءسوزدى قازاقتىڭ كورنەكتى جازۋشىسى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, “قۇرمەت” وردەنىنىڭ يەگەرى, قازاقستان جازۋشىلار وداعى استانا فيليالىنىڭ جەتەكشىسى اكىم تارازي ايتقان ەدى.
جۋىردا, حالقىمىزدىڭ ابزال ازاماتى, ءوز شىعارمالارىمەن وقىرمان قاۋىمنىڭ جۇرەگىنەن ويىپ تۇرىپ ورىن الا بىلگەن جازۋشى وقىرماندارىمەن تاعى دا جاقىنداسا تۇسۋگە مۇمكىندىك الدى. بۇعان ۇلتتىق كىتاپحانادا اشىلعان “تارازىنىڭ ەكى باسىن تەڭ ۇستايتىن تارازي” اتتى كورمە مۇرىندىق بولىپ وتىر. بۇگىنگى تاڭدا قازاق ادەبيەتىندەگى شوقتىعى بيىك تۇلعالاردىڭ ءبىرى بولىپ ەسەپتەلىنەتىن اكىم تارازي كورمەسىنە ءوزىنىڭ ۇزەڭگىلەس زامانداستارى, ادەبيەت ايدىنىنداعى سەرىكتەرى, دوس-جاراندارى, شىعارماشىلىق ورتاداعى باۋىرمال اعا-ىنىلەرى مەن جاندارى جايساڭ وقىرماندار كوپتەپ كەلدى.
33 جاسىندا العاشقى “قۇيرىقتى جۇلدىز” اتتى شىعارماسىمەن تانىلعان جاس جازۋشىنىڭ اتاعى كوپ ۇزاماي ەرەن ەڭبەگى مەن ازاماتتىق رۋحىنىڭ ارقاسىندا شارتاراپقا تانىلدى. مۇنىڭ ايعاعى رەتىندە اكىم ءتارازيدىڭ ورىس, قىتاي, اعىلشىن, ۆەنگەر جانە فين تىلدەرىنە اۋدارىلعان كىتاپتارىن ايتۋعا بولادى.
حالىقتىڭ زور ىقىلاسىنا بولەنگەن جازۋشى “تاسجارعان” رومانىمەن ءتىپتى دارالانا ءتۇستى. اباي اتىنداعى مەملەكەتتىك پەداگوگيكا ينستيتۋتىن, ماسكەۋدەگى جوعارى ستسەناريستەر كۋرسىن تامامداعان اكىم ءتارازيدىڭ جامبىل وبلىسىنداعى اۋىل مەكتەبىندە مۇعالىم بولىپ قىزمەت اتقارعانىن بىرەۋ بىلسە, بىرەۋ بىلمەۋى مۇمكىن. بۇدان كەيىن قازاق باسپاسوزىنە كوپتەگەن جىلدار ەڭبەك سىڭىرگەن ەلىنە ادال ازامات كينەماتوگرافيا سالاسىنا دا ەلەۋلى ءىز قالدىردى. “قورقاۋ جۇلدىز”, “شەر”, “تىرنا, تىرنا, تىرنالار”, “جازا”, “قيانات”, “جولى بولعان جىگىت”, “ماحاببات جىرى” سياقتى روماندار مەن پوۆەستەردىڭ اۆتورى بولعان ءا.ءتارازيدىڭ ءبىراز فيلمدەرگە ستسەناريىن جازعانى دا وزىمىزگە بەلگىلى. سونداي-اق, اكىم اعانىڭ ەڭبەگى سىڭگەن “مۇستافا شوقاي”, “ارمان-اتامان”, “تۇلپاردىڭ ءىزى” سىندى كينوفيلمدەرىن دە كورەرمەن قاشاندا ءسۇيىپ تاماشالايدى. بۇنىڭ سىرى – تالانتتىڭ ناعىز ەڭبەكقورلىعىندا, ادال ەڭبەگىندە, وقىرمانعا دەگەن شىنايى ماحابباتىندا جاتسا كەرەك.
– جارتى عاسىر بويى حالقىن شىعارماشىلىعىمەن سۋسىنداتقان اكىم اعانىڭ كىتاپ كورمەسىنىڭ تۇساۋىن كەسكەلى وتىرمىز. جازۋشىنىڭ شىعارماشىلىق ورەسىن وزدەرىڭىز دە جاقسى بىلەسىزدەر. قازاق ادەبيەتىنە قانشاما روماندار, پوۆەستەر, اڭگىمەلەر, دراماتۋرگيالىق تۋىندىلار, كينوستسەناريلەر بەردى. ۋاقىت الماسسا دا, قوعام الماسسا دا قازاق ادەبيەتىنىڭ مول قازىناسىن ۇنەمى تولىقتىرۋدى كوزدەدى. ەندى جازۋشىنىڭ ەڭبەكتەرىن قالا ستۋدەنتتەرى, جوعارى جانە ورتا ءبىلىم بەرۋ مەكەمەلەرىنىڭ مۇعالىمدەرى, وقۋشىلار كورىپ, تانىسا الادى. بۇدان بۇرىن ءابىش اعامىز بەن فاريزا اپامىزدىڭ مەرەيتويىنا ارنالعان ءبىر ايلىق كورمەمىز ءوتىپ ەدى, بۇگىنگى كورمەنى دە وسىنداي تاعىلىمى مول داستۇرمەن جالعاستىرعالى وتىرمىز”, – دەدى ۇلتتىق كىتاپحانانىڭ باس ديرەكتورى راحىمجان وتارباەۆ كورمەنىڭ اشىلۋ سالتاناتىندا. ءراسىم كەزىندە ءو.بايگەلدي, م.جولداسبەكوۆ, ف.وڭعارسىنوۆا, ت.ابدىك, س.ابدراحمانوۆ ءسوز سويلەپ, قالامگەر قادىرى جونىندە ءوز ويلارىن ورتاعا سالدى.
كورمەگە جازۋشىنىڭ كىتاپتارى, گازەتتەر مەن جۋرنالدارداعى اكىم اعا جونىندەگى جاريالانىمدار, جازۋشىنىڭ جەكە مۇراعاتىنان الىنعان فوتوسۋرەتتەر مەن كوپتەگەن قۇجاتتار قويىلعان. وقىرماننىڭ رۋحاني جان-دۇنيەسىن بايىتاتىن بۇل كورمە ءبىر ايعا دەيىن جالعاسادى.
اراي ۇيرەنىشبەكقىزى.