ۇكىمەت باسشىسىنىڭ ورىنباسارى ەرالى توعجانوۆتىڭ توراعالىعىمەن وتكەن ۆەدومستۆوارالىق كوميسسيانىڭ وتىرىسىندا ەلىمىزدەگى سانيتارلىق-ەپيدەميالىق جاعدايدى تۇراقتاندىرۋ بويىنشا بىرقاتار ماڭىزدى شەشىم قابىلداندى.
وسى جيىندا ايتىلعانداي, مەملەكەت باسشىسىنىڭ تاپسىرماسىن ورىنداۋ ءۇشىن اتىراۋ وبلىسىنىڭ كادرلىق الەۋەتىن نىعايتۋ ماقساتىندا وڭىرگە 102 جوعارى بىلىكتى مامان, ماڭعىستاۋ وبلىسىنا 56 مامان جىبەرىلەتىن بولدى.
ەلىمىزدە ءبىر رەت قولدانىلاتىن ءۇش قاباتتى مەديتسينالىق ماسكانىڭ بولشەك ساۋداداعى شەكتى باعاسى 118 تەڭگەدەن 85 تەڭگەگە دەيىن, ياعني 28%-عا ارزانداتىلدى.
وتاندىق ءوندىرىستىڭ كولەمىن ەسكەرە وتىرىپ, بۇگىنگى كۇنى وڭىرلەردە دەنە قىزۋىن تۇسىرەتىن جانە باكتەرياعا قارسى پرەپاراتتاردىڭ ايلىق قورى قالىپتاستىرىلدى. ەلىمىزگە دارىلىك زاتتاردىڭ 3,5 ملن وراماسى جەتكىزىلدى, ولار وڭىرلەرگە تاراتىلادى. وسى اپتادا قاجەتتى قوسىمشا دارىلىك زاتتاردى جەتكىزۋ ۇيىمداستىرىلادى.
بەلگىلەنگەن سانيتارلىق-ەپيدەميالىق نورمالاردىڭ ساقتالماۋىنا بايلانىستى دەنساۋلىق ساقتاۋ جانە ىشكى ىستەر مينيسترلىكتەرىنە, وڭىرلەردىڭ اكىمدىكتەرىنە كارانتين رەجىمىنىڭ انىقتالعان بۇزۋشىلىقتارىن جويۋعا باعىتتالعان بارلىق شارالاردى قابىلداي وتىرىپ, ءموبيلدى توپتاردىڭ جۇمىسىن كۇشەيتۋ تاپسىرىلدى. ول بويىنشا جەكە تۇلعالارعا – 30 اەك, زاڭدى تۇلعالارعا – 230 اەك كولەمىندە اكىمشىلىك ايىپپۇل سالۋ كوزدەلگەن.
ستاتسيونارلارداعى پاتسيەنتتەردى وتتەگىمەن قولداۋدى قامتاماسىز ەتۋ ماقساتىندا وڭىرلەردىڭ اكىمدىكتەرى شۇعىل تۇردە 2600-دەن استام وتتەگى كونتسەنتراتى مەن مەديتسينالىق گازداردى ساتىپ الۋدا.
«ەلدە بارلىق قاتاڭ شەكتەۋ شارالارى قابىلداندى. ەندى بارلىق قوعامدىق قوزعالىستاردىڭ الەۋەتىن تارتا وتىرىپ, ەلىمىزدىڭ ءار اۋدانىنداعى, اۋىلى مەن اۋلاسىنداعى تۇرعىندارعا كارانتين رەجىمىن ساقتاۋ قاجەتتىگى تۋرالى اقپاراتتى ساپالى جەتكىزۋ قاجەت», دەپ تۇيىندەدى ە.توعجانوۆ.