رەسپۋبليكامىزدا مال شارۋاشىلىعى جەتەكشى سالالاردىڭ ءبىرى ەكەنى بەلگىلى. سوندىقتان بۇگىندە ەتتى ەكسپورتقا شىعارۋ جانە ونىڭ الەۋەتىن ارتتىرۋ ىسىنە كوبىرەك كوڭىل بولىنگەنى ءجون. مۇنداي كوزقاراس قازىرگى رەسەي, بەلارۋس جانە قازاقستان مەملەكەتتەرى اراسىنداعى كەدەن وداعى تالاپتارىنا دا تولىق سايكەس كەلەدى. الايدا, وسى ءىس تىم بىرجاقتىلاۋ كەتىپ بارا جاتقان جوق پا دەگەن ويعا دا بەرىلىپ قالامىز.
رەسپۋبليكامىزدا مال شارۋاشىلىعى جەتەكشى سالالاردىڭ ءبىرى ەكەنى بەلگىلى. سوندىقتان بۇگىندە ەتتى ەكسپورتقا شىعارۋ جانە ونىڭ الەۋەتىن ارتتىرۋ ىسىنە كوبىرەك كوڭىل بولىنگەنى ءجون. مۇنداي كوزقاراس قازىرگى رەسەي, بەلارۋس جانە قازاقستان مەملەكەتتەرى اراسىنداعى كەدەن وداعى تالاپتارىنا دا تولىق سايكەس كەلەدى. الايدا, وسى ءىس تىم بىرجاقتىلاۋ كەتىپ بارا جاتقان جوق پا دەگەن ويعا دا بەرىلىپ قالامىز.
ويتكەنى, سوڭعى كەزدە ەلىمىزدىڭ باتىستاعى شەكارالاس ايماقتارىن جوعارىدا اتالعان مەملەكەتتەردەن جەتكىزىلگەن قازاقستاندىق باعامەن سالىستىرعاندا ءبىرشاما ارزان ءارى ساپاسى دا كوڭىلدى كونشىتە بەرمەيتىن يمپورتتىق ەت جاۋلاپ العانداي كۇي كەشەسىز. كورەر كوزگە ونىڭ تاۋارلىق ءتۇرى تاڭداي قاقتىرعانداي. ءبىر ەت, ءبىر ماي دەگەندەي, تىم شەلدى كورىنەدى. سەمىز كورىنەتىن ەت كىمنىڭ كوزىن قارىقتىرمايدى. ونى ساتىپ الۋعا كىم قىزىقپايدى. ال وسى رەسەيدەن كەلگەن ەتتى بازاردان ساتىپ الىپ كەلىپ, اسىپ جەسەك, وزىمىزدە وسىرىلگەن مالدىڭ ەتىنىڭ ءدامى مەن ساپاسىنا جاقىنداپ بارا المايتىنىن دا بىردەن بايقايسىز.
ءبىز, سونىمەن ءبىر مەزگىلدە, قازاقستاندىق ەت وندىرۋشىلەردىڭ رەسەي-بەلارۋس ساۋدا جۇيەلەرىنە جەتكىزىلۋى جونىندەگى ماسەلەلەرگە نازار اۋدارىپ كوردىك پە؟ كورمەگەن سياقتىمىز. رەسەيگە وتاندىق ەت جانە ونىڭ ونىمدەرىن جىبەرۋدىڭ جارقىن مىسالدارى بار ما؟ بۇل ساۋالعا دا كىبىرتىكتەپ, توقتالىپ قالاتىنىمىز انىق. ول جاقتان شىركىن قازاقستاننان كەلگەن ەتتىڭ ءدامىن ايتساڭشى دەپ وعان تامسانۋشىلاردىڭ ۇندەرى نەگە ەستىلمەيدى؟ بۇل سوزدەر ەستىلۋى ءۇشىن نە ىستەۋىمىز كەرەك؟ ءيا, بۇگىندە قازاقستاندىق ەتتىڭ وزىندىك قۇنىن تومەندەتىپ ءارى ساپاسىن ارتتىرا وتىرىپ ونى كورشىلەس مەملەكەتتەرگە شىعارۋ ءىسى كەشەۋىلدەتۋدى قاجەت ەتپەيدى.
مۇنداي ساپالى دا ارزان ەت ءوندىرۋدىڭ باستى جولدارىنىڭ ءبىرى – جايىلىمدىق مال شارۋاشىلىعىن وركەندەتۋ. بۇل ماسەلە ەلباسىنىڭ الدىڭعى جىلعى جولداۋلارىنىڭ بىرىنە وزەك بولعانى دا ايان. ەكىنشىدەن, وزگە ەلدەرگە ساپالى ەت ۇسىناتىن وتاندىق قۇرىلىمداردىڭ قىزمەتىن جاڭا ساتىعا كوتەرۋ ىسىنە دە ۇلكەن ءمان بەرەتىن ۋاقىت جەتكەنى كامىل. راس, بۇل باعىتتا «قازاگرو» ۇلتتىق حولدينگى مەملەكەت-جەكەمەنشىك ارىپتەستىگىنە نەگىزدەلگەن قارىم-قاتىناستاردى جەتىلدىرۋگە باعىتتالعان شارالاردى قولعا العانى قۇپتارلىق ماسەلە. سونداي-اق, بيىلعى جازدا اتالعان قۇرىلىم جەتەكشىلەرى رەسەيلىك يمپورتتاۋشى وكىلدەرمەن كەزدەسىپ, قازاقستاندىق ەت وندىرۋشىلەردىڭ ماسكەۋ ساۋدا جۇيەلەرىنە ەنۋى ءجونىندەگى ماسەلەلەردى تالقىلاعانى دا ۇمىتىلا قويعان جوق. وسى كەزدەسۋدە ەلىمىزدەگى ەت ءوزىنىڭ قۇنارلى سيپاتتارى مەن دامدىك قاسيەتتەرى ارقاسىندا رەسەيدىڭ ماسكەۋلىك نارىعىنا پرەميۋم-كلاسس ءونىمى رەتىندە جايعاسا الاتىنى دا ايتىلعان ەدى.
ارينە, ونىڭ تەك ءسوز جۇزىندە قالىپ قويماعانى ۇلكەن مەرەي. بۇل تۇجىرىمىمىزعا وتكەن قىركۇيەك ايىنىڭ اياعىندا قازاقستاندىق ءوندىرۋشى مەن رەسەيلىك ساۋدا يندۋسترياسى اراسىندا جاسالعان كەلىسىمشارت كۋا. ونىڭ كولەمى بيىلعى جىلدىڭ اياعىنا دەيىن ورالدان ماسكەۋ قالاسىنا 500 توننا ەت جونەلتۋگە لايىقتالعان. ۇرىستا تۇرىس جوق دەگەندەي, قازان ايىنىڭ باسىندا وبلىستاعى «Crown باتىس» جشس-ءنىڭ مال بورداقىلاۋ الاڭىنان قازاقستاندىق ەتتىڭ العاشقى پارتياسى رەسەيگە جونەلتىلدى. اتالعان ءونىم توڭازىتىلعان جانە بورشالانعان تۇردە ۆاكۋمدىق ورامدا كورشى ەلگە جول تارتقانىنا ايعاق بولا الامىز.
تاعى ءبىر ايتارىمىز, ءماسكەۋلىكتەر مەن باتىسقازاقستاندىق ەت وندىرۋشىلەر اراسىنداعى كەلىسىمشارتتىڭ شەكتەۋلى مەرزىمى جوق. «Crown باتىس» جشس-ءنىڭ باس ديرەكتورى ەۆگەني اليەۆتىڭ ايتۋىنشا, العاشقىدا رەسەيلىك مالدارىگەرلىك باقىلاۋ جانە لوگيستيكالىق-تەحنيكالىق قىزمەتتەر تاراپىنان كەيبىر ءتۇيتكىلدەر ورىن العانىمەن قازىر ونىڭ ءبارى رەتتەلىپتى. ورالدان ءماسكەۋگە جونەلتىلگەن ەتتىڭ العاشقى پارتياسىنىڭ باعاسى اسا جوعارى ەمەس, 170 رەسەي ءرۋبلىنىڭ توڭىرەگىندە عانا. الايدا, بۇل باعا كاسىپورىننىڭ شىعىنسىز جۇمىس ىستەۋىنە كەدەرگىسىن كەلتىرمەپتى. ءبىزدىڭ ءبىرىنشى مىندەتىمىز – كورشىلەرگە جەتكىزىلەتىن ەتتىڭ ساپاسى مەن تۇراقتىلىعىن قامتاماسىز ەتۋ, وعان رەسەيلىكتەردىڭ كوزىن جەتكىزۋ. تەك سودان كەيىن عانا باعانى كوتەرۋ جولدارىن ويلاستىرۋ, دەيدى قازاقستاندىق كومپانيا باسشىسى.
بۇل, ارينە, وتە جاقسى مىسال. الايدا, كەدەن وداعى شەڭبەرىندەگى مەملەكەتتەرگە ءوزارا ءتيىمدى باعامەن ەت ءوندىرۋ ەلىمىزدە جاپپاي ءۇردىسكە اينالىپ كەتە قويماعانى دا جاسىرىن ەمەس. الداعى كەزدە وسى بوس كەڭىستىكتىڭ ورنىن تولتىرۋ ءۇشىن ىرگەلى قادامدار جاسالىپ, جالعاسىن تاپسا يگى.
تەمىر قۇسايىن,
«ەگەمەن قازاقستان».
باتىس قازاقستان وبلىسى.