كەزدەسۋ بارىسىندا قازاقستان مەن رەسەي اراسىنداعى جان-جاقتى ستراتەگيالىق سەرىكتەستىكتىڭ قازىرگى احۋالى مەن پەرسپەكتيۆالارى تالقىلاندى. ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق ىنتىماقتاستىقتى دامىتۋعا ەرەكشە ءمان بەرىلدى. بۇل تۋرالى اقوردانىڭ ءباسپاسوز قىزمەتى حابارلادى.
قازاقستان پرەزيدەنتى كوروناۆيرۋس پاندەمياسى كەزىندەگى ىقپالداستىقتى ەكىجاقتى فورماتتا, سونداي-اق, ەۋرازيالىق ەكونوميكالىق وداق اياسىندا ودان ءارى نىعايتۋدىڭ ماڭىزدىلىعىن اتاپ ءوتتى.
تاراپتار بيىلعى قاراشا ايىنا جوسپارلانعان وڭىرارالىق ىنتىماقتاستىقتىڭ XVII فورۋمىنا دايىندىق بارىسىن قاراستىردى. مەملەكەت باسشىسى اتالعان ءىس-شارانىڭ ساپالى ءارى مازمۇندى بولۋىن قامتاماسىز ەتۋ قاجەتتىگىنە نازار اۋداردى.
سونىمەن قاتار كەزدەسۋدە وڭىرلىك جانە حالىقارالىق كۇن تارتىبىندەگى وزەكتى ماسەلەلەر تالقىلاندى.