مەملەكەتتىك كىرىستەر كوميتەتى بكم فيسكالدىق چەگىن بەرمەۋ فاكتىلەرىن انىقتاۋ بويىنشا «قوعامدىق باقىلاۋ – تۇبىرتەكتى تالاپ ەت» اكتسياسى 2020 جىلعى 12 مامىردان باستاپ قايتا باستالعانى تۋرالى حابارلايدى. بۇل تۋرالى مەملەكەتتىك كىرىستەر كوميتەتىنىڭ ءباسپاسوز قىزمەتى حابارلادى.
«قوعامدىق باقىلاۋ – تۇبىرتەكتى تالاپ ەت» اكتسياسىنا كەز كەلگەن ۇمىتكەر قاتىسا الادى. بارلىق جولدانعان وتىنىشتەر مەملەكەتتىك كىرىستەر ورگاندارىندا قارالادى.
App Store نەمەسە Play market-تەن «Wipon» ءموبيلدى قوسىمشاسىن تەگىن جۇكتەپ الىپ, فيسكالدى چەكتى بەرمەۋ بۇزۋشىلىق فاكتىلەرى تۋرالى حابارلاۋعا بولادى. فيسكالدى چەكتى بەرمەۋ فاكتىسى راستالعان جاعدايدا تەلەفوننىڭ تەڭگەرىمىنە (1000 تەڭگە) سىياقى الۋعا بولادى.
2019 جىلى ازاماتتاردىڭ حابارلاۋى بويىنشا اكتسيا جۇرگىزۋ بارىسىندا 940 دەرەك راستالدى, ولارعا 940 مىڭ تەڭگە سوماسىندا سىياقى تولەندى.
مەملەكەتتىك كىرىستەر كوميتەتى قازاقستان رەسپۋبليكاسىنىڭ بارلىق ازاماتتارىن وزدەرىنىڭ ازاماتتىق ۇستانىمىن, زاڭ بۇزۋشىلىققا توزبەۋشىلىگىن بىلدىرۋگە جانە «قوعامدىق باقىلاۋ – تۇبىرتەكتى تالاپ ەت» اكتسياسىنا بەلسەندى تۇردە قاتىسۋعا شاقىرادى.