وتكەن سەنبى جانە جەكسەنبى كۇندەرى شىعىس قازاقستان وبلىسىنىڭ سەمەي قالاسى ۇلكەن دۇبىرگە بولەندى. مۇندا قازاقستان فۋتبولىنىڭ 100 جىلدىعى كەڭ كولەمدە اتالىپ ءوتتى. ال وسى تويعا دەيىن وبلىستا كوپتەگەن شارالار ۇيىمداستىرىلدى.مىسالى شەمونايحا اۋدانىندا 1000 فۋتبول دوبى ساتىپ الىنىپ, اۋىلدىق وكۋرگتەرگە تەگىن تاراتىلدى. سەمەيدەگى «سپارتاك» ستاديونى كۇردەلى جوندەۋدەن وتكىزىلىپ, وسكەمەندەگى «ۆوستوك» ستاديونىنداعى فۋتبول الاڭى جاڭعىرتىلدى. بيىلعى جىلعى اقپان ايىندا فەدەراتيۆتىك گەرمانيا رەسپۋبليكاسىنان «يارىش» فۋتبول كومانداسىنىڭ توسبەلگىسى جەتكىزىلدى. سول كەزدەگى كوماندانىڭ ءبىرىنشى كاپيتانى يۋنۋس نيگماتۋليننىڭ قۇرمەتىنە ءشايجۇنىسوۆ كوشەسىندەگى 55 ۇيگە مەموريالدىق تاقتا ورناتىلىپ, سەمەي كوشەلەرىنىڭ بىرىنە «قازاقستان فۋتبولىنا 100-جىل» اتاۋى بەرىلدى.
مەرەكە كۇندەرى سەمەي قالاسىنا ماسكەۋدىڭ «سپارتاك», قازاننىڭ «رۋبين», كيەۆ پەن ءتبيليسيدىڭ «دينامو», بىشكەكتىڭ «العا» كوماندالارىنىڭ ارداگەرلەرى كەلىپ, تۋرنير وتكىزدى.
وبلىس كولەمىندە 100 فۋتبول الاڭى جاڭادان سالىندى. تاعى 6 فۋتبول الاڭى پايدالانۋعا بەرىلمەك.
حالىقارالىق عىلىمي-پراكتيكالىق كونفەرەنتسيا, الەمدىك فۋتبول جۇلدىزدارىنىڭ قاتىسۋىمەن ءباسپاسوز ءماسليحاتى وتكىزىلدى.
جىل باسىنان بەرى 2 مىڭنان اسا بۇقارالىق-سپورتتىق ءىس-شارالار ۇيىمداستىرىلىپ, 300 مىڭنان استام تۇرعىندار تارتىلدى.
مۇرات ايتقوجا.