مەملەكەت باسشىسى قازاقستاندىقتاردى وتان قورعاۋشى كۇنىمەن قۇتتىقتادى. بۇل تۋرالى اقوردانىڭ ءباسپاسوز قىزمەتى حابارلادى.
قۇرمەتتى وتانداستار!
بارشاڭىزدى وتان قورعاۋشى كۇنىمەن قۇتتىقتايمىن!
ايبىندى ارميامىزدىڭ داڭقتى ءداستۇرى كەڭ-بايتاق جەرىمىزدى جانقيارلىقپەن قورعاپ قالعان باتىر بابالارىمىز بەن ۇلى وتان سوعىسى ارداگەرلەرىنىڭ وشپەس ەرلىگىنەن باستاۋ الادى. بۇگىندە اسكەرىمىز تاۋەلسىز قازاقستاننىڭ بەرىك قالقانى رەتىندە جاۋىنگەرلىك شەبەرلىك پەن اسقاق رۋحتىڭ وزىق ۇلگىسىن كورسەتىپ كەلەدى.
بۇل مەرەكەدە ءبىز ءوز ءومىرىن وتان قورعاۋعا ارناعان, انتىنا ادال جاندارعا ەرەكشە قۇرمەت كورسەتەمىز. مەملەكەتتىك شەكارامىز بەن اۋە كەڭىستىگىمىزدى كۇزەتىپ, ارميا جانە فلوت بولىمشەلەرىندە اسكەري بورىشىن وتەپ جاتقان بارلىق ساربازعا شىنايى ريزاشىلىعىمدى بىلدىرەمىن.
كوروناۆيرۋس ىندەتىمەن كۇرەستىڭ الدىڭعى شەبىندە جۇرگەن اسكەري قىزمەتشىلەر, سونىڭ ىشىندە ارناۋلى جيىندارعا شاقىرىلعان ازاماتتار دا العىسقا لايىق. ولاردىڭ ەرەن ەڭبەگى – شىنايى پاتريوتيزم مەن ەلگە قىزمەت ەتۋدىڭ جارقىن كورىنىسى.
مەملەكەتىمىزدىڭ قورعانىس الەۋەتىن كۇشەيتۋ, اسكەري قىزمەتشىلەردىڭ وزدەرىن جانە وتباسىن قولداۋ باستى مىندەتىمىز بولىپ قالا بەرەدى.
سىزدەرگە زور دەنساۋلىق, باق-بەرەكە جانە ەلدىك مۇددە جولىنداعى ابىرويلى ءارى مارتەبەلى قىزمەتتەرىڭىزگە تولايىم تابىس تىلەيمىن!