Facebook الەۋمەتتىك جەلىسى قاۋىپسىزدىك ماسەلەسىمەن اينالىساتىن جيىرماعا جۋىق قىزمەتكەرىن جۇمىستان شىعاردى. ولار قاۋىپتەردى انىقتاۋعا, سايتتىڭ جۇمىسىن جەتىلدىرۋگە جانە ونى جەتكىزىپ وتىرۋعا ءتيىستى ەدى. بۇل قىزمەتكەرلەر Facebook-ءتىڭ لوندونداعى, سيەتلدەگى جانە كاليفورنياداعى وفيستەرىندە جۇمىس ىستەگەن.
شيرا فرەنكەل,
مايك ايزەك
جالپى, Facebook كەيىنگى ەكى جىلدا قاۋىپسىزدىكپەن اينالىساتىن توپتارىن تاراتا باستادى. كومپانيانىڭ حابارلاۋىنشا, Facebook قاۋىپسىزدىكتى قامتاماسىز ەتۋگە قوماقتى قارجى ءبولىپ كەلەدى. ال قىزمەتكەرلەردى قىسقارتىپ, توپتاردى قايتا قاراستىرۋ كومپانيا مەتودولوگياسىن جاڭعىرتۋعا, كيبەرشابۋىلعا توسقاۋىل بولۋعا باعىتتالعان.
Facebook وكىلىنىڭ سوزىنە سۇيەنسەك, كومپانيا باسشىلىعى ەندىگى جۇمىس قاتەرلەردى اۆتوماتتى تۇردە انىقتاۋعا باسىمدىق بەرەدى. سونداي-اق قاۋىپسىزدىكتى الدىن الا ەسكەرتۋگە ارنالعان ارنايى توپ قۇرماق. بۇل وزگەرىستەر جۇمىس توپتارىنىڭ جۇمىسىن جەڭىلدەتىپ, جاڭاشا مىندەتتەر جۇكتەيدى.
كەيىنگى جىلدارى Facebook-ءتىڭ قاۋىپسىزدىكتى قامتاماسىز ەتۋگە ارنالعان شارالارى ءجيى سىنعا ۇشىراپ ءجۇر. ماسەلەن, 2016 جىلى رەسەي تاراپى الەۋمەتتىك جەلى ارقىلى اقش-تىڭ پرەزيدەنتتىك سايلاۋىنا ىقپال ەتتى دەلىنەدى. ال 2018 جىلى كومپانيا قاۋىپسىزدىك جۇيەسىندە اقاۋ كەتكەنىن انىقتادى. وسى كەمشىلىكتىڭ سالدارىنان ميلليونداعان ادامنىڭ جەكە دەرەكتەرى قولدى بولىپ كەلگەن.
بۇرىن قاۋىپسىزدىكتى قامتاماسىز ەتۋ قىزمەتى الەكس ستاموس باسقاراتىن توپقا جۇكتەلەتىن. ول اقپاراتتىق قاۋىپسىزدىك ءبولىمىنىڭ ديرەكتورى. ا.ستاموس 2018 جىلى كومپانيادان كەتكەن سوڭ, ءبولىم تاراتىلدى. قىزمەتكەرلەر باسقا بولىمدەرگە اۋىستى. سودان بەرى اقپاراتتىق قاۋىپسىزدىك ءبولىمىنىڭ باسشىسى لاۋازىمى جويىلدى.
كومپانيا قىزمەتكەرلەرىنىڭ سوزىنە سۇيەنسەك, Facebook قىزمەتتەرىنىڭ قاۋىپسىزدىگىن نىعايتۋ ماقساتىندا جاڭا قادامدار قاراستىرۋ ۇستىندە. وسى جۇمىس اياسىندا قاۋىپسىزدىكتى قامتاماسىز ەتۋگە باعىتتالعان باعدارلامالار جازۋعا ارنايى قىزمەتكەرلەر الىنباق. اۆتوماتتاندىرۋ ءادىسىن قولدايتىن مەنەدجەرلەردىڭ ايتۋىنشا, وسى باعىتتاعى شارالاردى جاساندى ينتەللەكتكە جۇكتەۋ ارقىلى قىزمەتكەرلەرگە تۇسەتىن جۇكتەمە جەڭىلدەمەك.
كومپانيا LinkedIn جەلىسىندەگى پاراقشاسىندا قاۋىپسىزدىك قاتەرلەرىمەن كۇرەسەتىن جۇيە جاساۋعا قاجەتتى قىزمەتكەرلەردى ىزدەيتىنىن حابارلادى. ال وزگەرىستەر سالدارىنان جۇمىسسىز قالعان قىزمەتكەرلەر باسقا جۇمىس تابۋ قيىنعا سوعاتىنىن ايتىپ وتىر. ويتكەنى ولار نەگىزىنەن ءبىر عانا سالاعا بەيىمدەلگەن.
دايىنداعان
اباي اسانكەلدى ۇلى,
«Egemen Qazaqstan»