قورعانىس مينيسترلىگىندەگى كەزەكتى اپپارات كەڭەسى ءوتىپ, قارۋلى كۇشتەردىڭ باس شتابىندا رادياتسيالىق, حيميالىق, بيولوگيالىق قورعاۋ جانە ەكولوگيالىق قاۋىپسىزدىك اسكەرلەرى دەپارتامەنتى قۇرىلاتى ءمالىم بولدى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.
قازاقستان رەسپۋبليكاسى پرەزيدەنتى – قارۋلى كۇشتەر جوعارعى باس قولباسشىسى قاسىم-جومارت توقاەۆتىڭ تاپسىرماسى بويىنشا ۆيرۋستىڭ تارالۋىنا قارسى كۇرەستە دەزينفەكتسيالاۋعا ەرەكشە ءمان بەرىلىپ جاتىر. بيولوگيالىق قورعاۋ بولىمشەلەرى ەلىمىزدىڭ بارلىق وڭىرلەرىندە دەزينفەكتسيا جۇرگىزۋدە. 5 اپتا ىشىندە جالپى اۋدانى 36 ملن شارشى مەتردەن اساتىن الەۋمەتتىك ماڭىزى بار وبەكتىلەر, ۇزىندىعى 2,5 مىڭ كم استام جول ۋچاسكەلەرى زارارسىزداندىرىلدى.
كەزەكتى اپپارات كەڭەسىندە قورعانىس ءمينيسترى نۇرلان ەرمەكباەۆ رادياتسيالىق, حيميالىق جانە بيولوگيالىق قورعانىس اسكەرلەرىن قايتا قۇرۋ جانە كۇشەيتۋ قاجەت بولعانىن اتاپ ءوتتى. وسى ماقساتتا قارۋلى كۇشتەردىڭ باس شتابىندا رادياتسيالىق, حيميالىق, بيولوگيالىق قورعاۋ جانە ەكولوگيالىق قاۋىپسىزدىك اسكەرلەرى دەپارتامەنتى قۇرىلدى. بۇعان دەيىن قارۋلى كۇشتەردە رحب قورعاۋ ءىس-شارالارىن ۇيىمداستىرۋ قر قك بش ينجەنەرلىك اسكەرلەر دەپارتامەنتىنىڭ قۇرىلىمدىق بولىمشەسىنە – رحب قورعاۋ جانە ەكولوگيالىق قاۋىپسىزدىك اسكەرلەرى باسقارماسىنا جۇكتەلگەن.
جاڭا بولىمشەگە قىسقا مەرزىمدە قازىرگى زامانعى قاۋىپ-قاتەرلەردى, اسكەرلەردىڭ مۇمكىندىكتەرىن جانە الەمنىڭ جەتەكشى ەلدەرىنىڭ قورعانىس-ونەركاسىپ كەشەنىنىڭ دامۋ ۇردىستەرىن ەسكەرە وتىرىپ, قارۋلى كۇشتەردى قورعاۋ رحب جۇيەسىن دامىتۋ تۇجىرىمداماسىن ازىرلەۋ مىندەتى قويىلدى.