ەكىنشى دۇنيەجۇزىلىك سوعىس كەزىندەگى تىلدىڭ اۋىر ەڭبەگى دە ەلدىڭ ماڭگىلىك جادىندا. تىل ەڭبەككەرلەرى سول ءبىر الاساپىران كەزەڭدە «بارلىعى مايدان ءۇشىن, بارلىعى جەڭىس ءۇشىن!» ۇرانىمەن مايدانداعى جاۋىنگەرلەرگە بارىنشا قولداۋ كورسەتتى.
مەنىڭ انام باقىتجامال قازىر 81 جاستا. بالالىق شاعى سوعىس ۋاقىتىمەن تۇسپا-تۇس كەلگەن انام ەسىندە قالعاندارىن, اجەمىز كابزيانىڭ تىلداعى اۋىر ەڭبەك بەينەتىن كورگەنىن ۇنەمى بىزگە ايتىپ وتىرادى. بۇگىن مىنە ول كىسىنىڭ عابباس اتامىز تۋرالى ايتقان اڭگىمەسى ەسىمە ءتۇسىپ وتىر...
سوعىس جىلدارى «بارلىعى مايدان ءۇشىن, بارلىعى جەڭىس ءۇشىن!» ۇرانىمەن عابباس ىدىرىسحانوۆ باستاعان تىل ەڭبەككەرلەرى قازىرگى اققۋلى اۋدانىنان مايدانعا كيىم-كەشەك, ازىق-ت ۇلىك جىبەرۋگە كوپ ۇلەس قوسقان.
عابباس اتانىڭ قىزى دامەتكەننىڭ ايتۋىنشا, سوعىس جىلدارى اكەلەرى قازىرگى اققۋلى اۋدانىندا كولحوز توراعاسى بولىپ قىزمەت اتقارعان.
– اكەمىز 1943 جىلدىڭ 19 قاڭتارىندا كەڭەس وكىمەتىنىڭ قورعانىس قورىنا تانك الۋ ءۇشىن 100 مىڭ سوم جىبەرگەن ەكەن. مەملەكەتتىك بانكتىڭ №350 ەسەپتىك كۆيتانتسياسى, ءستاليننىڭ قولى قويىلعان العىس حات وبلىستىق مۋزەيدە ساقتاۋلى, – دەيدى دامەتكەن عابباسقىزى.
مۋزەيدىڭ سارعايعان قۇجاتتارىندا 1942 جىلى پاۆلودارلىقتاردان مايدانداعى جاۋىنگەرلەر 1264 سالەمدەمە العانى جايلى مالىمەتتەر بار. مايدانعا 10360 جۇپ پيما, 4190 شولاق تون, 10709 تىماق, 1639 تەرى جەلەتكەلەر, 10 مىڭ جۇپتان اسا تەرى قولعاپتار, ماقتا فۋفايكالار مەن شالبارلار جانە باسقا بۇيىمدار جىبەرىلگەن.
سول جىلدارى قايىربەك باجەنەەۆ, جاقيا جاڭاتاەۆ, عابباس ىدىرىسحانوۆ سىندى كولحوز باسشىلارىنىڭ ارقايسىسى قورعانىس قورىنا 100 مىڭ سومنان استام اقشا اۋدارادى. كەيىن عابباس ىدىرىسحانوۆ باسقارعان «سورەۆنوۆانيە» كولحوزشىلارى قورعانىس قورىنا 25 مىڭ سوم, 21 مىڭ پۇت استىق تاپسىرعان.
تاريحي قۇجاتتارعا ۇڭىلسەك, 1952 جىلدىڭ 23 ساۋىرىندە برونەتانك جانە مەحانيزاتسيالاۋ بولىمىنەن كەڭەس اسكەرى شتابى ارقىلى حات كەلگەن. حاتتا عابباس ىدىرىسحانوۆتىڭ مايدانعا جىبەرگەن قاراجاتى ارقىلى قۇرالعان تانك بىرنەشە رەت شابۋىلعا شىققانى, ونىڭ جوندەۋ جۇمىستارىنان ءوتىپ باسقا اسكەري بولىمدەرگە بەرىلگەنى تۋرالى جازىلعان. شتاب باسشىسىنىڭ ورىنباسارى, ىشكى اسكەر گەنەرال-مايورى م.زەلينسكي دە العىس بىلدىرگەن.
بۇگىندە عابباس ىدىرىسحانوۆتىڭ 1919 جىلى قىزىل اسكەر قاتارىندا بولعانى, باسقا دا قۇجاتتارى, ماراپاتتارى گ.پوتانين اتىنداعى وبلىستىق تاريحي-ولكەتانۋ مۋزەيىنىڭ قورىندا ساقتاۋلى تۇر.
قىزى دامەتكەننىڭ ايتۋىنشا, اكەلەرى وتە قاراپايىم, مەيىرىمدى, ەل-جۇرتىنا جاناشىر ادام بولىپتى. وتباسىنداعى 9 بالاسىنا قوسا, نەسىبەلى دەگەن قىزدى اسىراپ العان ەكەن.
قازىرگى ۋاقىتتا عابباس اتامىزدىڭ ۇرپاقتارى پاۆلودار وبلىسىندا تۇرادى. بۇگىندە ءبىزدىڭ كەيىپكەرىمىزدىڭ 26 جيەنى, 8 نەمەرەسى ەرجەتكەن.
پاۆلودار وبلىسى,
اققۋلى اۋدانى