تۇركىستان وبلىسى جەتىساي اۋدانىنىڭ ديقاندارى ءبىر جەرگە ەكىنشى داقىل ەگۋ جۇمىستارىنا كىرىسىپ كەتتى.
ش.دىلدابەكوۆ اۋىل وكرۋگىندە رامازان حودجانوۆ ءوز يەلىگىندەگى 5 گەكتار ەگىستىك جەرىنىڭ 2 گەكتارىنا اقپان ايىندا ەرتە پىسەتىن قىرىققابات ەگىپ, جۋىردا جيناعان ءونىمىنىڭ ءبارىن وتكىزگەن. ەندى ونىڭ ورنىنا ەرتە پىسەتىن قاۋىن ەگە باستادى.
«وبلىس اكىمى ومىرزاق شوكەەۆتىڭ تاپسىرماسىنا وراي ءبىز دە ەكى رەت ءونىم الۋ ىسىنە كىرىستىك. ويتكەنى اۋدانىمىزدىڭ كليماتى ديقانشىلىقپەن اينالىسۋ ءۇشىن وتە قولايلى. ونىڭ ۇستىنە شارۋالار ءۇشىن مەملەكەت تاراپىنان جاسالىپ جاتقان كومەك كوپ. وزىمە تيەسىلى جەرگە قىرىققابات ەگىپ, ونى جيناپ الدىم. ءارى قاراي سول جەرگە ەرتە پىسەتىن قاۋىن ەگۋدەمىن. كارانتين كەزىندە ءبىزدىڭ ونىمدەرىمىزدى, جەردە قالدىرماي جول اشىپ بەرگەنى ءۇشىن وبلىس اكىمى ومىرزاق ەستاي ۇلىنا ريزاشىلىعىمدى بىلدىرەمىن», دەيدى رامازان حودجاحمەت ۇلى.
اۋدان اكىمدىگىنىڭ مالىمەتىنشە, اۋدان بويىنشا بيىل 11361 گەكتار اۋماققا ەرتە پىسەتىن قاۋىن مەن قاربىز ەگىلگەن.