تۇركىستان وبلىسىندا COVID-19 ينفەكتسياسىن جۇقتىرعاندار سانى 50-دەن استى. وسى ورايدا وبلىس اكىمىنىڭ ورىنباسارى ساكەن قالقامانوۆ احۋال ورتالىعىندا مالىمدەمە جاساپ, ازاماتتاردىڭ ءومىرى مەن دەنساۋلىعىن قورعاۋ, حالىق اراسىندا كوروناۆيرۋستىق ينفەكتسيانىڭ كەڭىنەن تارالۋىنىڭ الدىن الۋ ماقساتىندا, 2020 جىلعى 18-ءشى ءساۋىر كۇنى تۇنگى ساعات 24.00-دەن باستاپ, وبلىس اۋماعىندا كارانتين رەجىمى ەنگىزىلەتىنىن جاريا ەتتى.
ياعني اتالمىش ۋاقىتتان باستاپ كورشى ايماقتارمەن شەگاراداعى سانيتارلىق بلوك-بەكەتتەر جۇمىسى كۇشەيتىلەدى. تۇرعىندارعا قالاارالىق, اۋدانارالىق جانە ەلدى مەكەندەر اراسىندا قاتىناۋعا شەكتەۋ قويىلىپ, ەلدى مەكەن ىشىندەگى قوعامدىق كولىكتەر مەن جەكە تاسىمال قىزمەتىنىڭ جۇمىسى توقتاتىلادى. سانيتارلىق-ەپيدەميولوگيالىق جاعدايدىڭ تۇراقتىلىعى ءۇشىن قوعامدىق ورىندار مەن دەمالىس ورىندارى, ساياباقتار جابىلادى. ازىق-ت ۇلىك جانە كيىم - كەشەك بازارلارى, تۇرمىستىق زاتتار ساتاتىن بازارلار جۇمىسى توقتاتىلادى. سونداي-اق ءالى كۇنگە الاڭسىز ەسىك الدىندا ويناپ جۇرگەن بالالاردىڭ ويىن الاڭدارىندا, كوپ قاباتتى ۇيلەردىڭ اۋلالارىندا ويناۋعا تىيىم سالىنادى.
«تۇرعىلىقتى جەردە وتباسىلىق مەرەكەلەر, تۋعان كۇن, توي-جيىن وتكىزۋگە شەكتەۋ قويىلادى. ءۇش ادامنان ارتىق توپتىڭ كوشەدە جانە قوعامدىق ورىنداردا جينالۋىنا تىيىم سالىنادى. جاسى 65 جاستان اسقان ازاماتتار ۇيدەن شىقپاي, وقشاۋلانۋى ءتيىس. تۇرعىندارعا تەك قاجەتتى ازىق-ت ۇلىك, ءدارى-دارمەك الۋعا ۇيگە جاقىن جەردەگى دۇكەندەر مەن دارىحانالارعا بارۋىنا رۇقسات. ازىق-ت ۇلىك دۇكەندەرىنىڭ جۇمىسى ساعات تاڭعى 9 بەن كەشكى 8 ارالىعىندا شەكتەلەدى», دەدى وبلىس اكىمىنىڭ ورىنباسارى.
تۇرعىنداردىڭ تىرشىلىگىن قامتاماسىز ەتۋ ءۇشىن قاجەتتى ازىق-ت ۇلىك, زاتتار مەن ونەركاسىپ, قۇرىلىس نىساندارىنا, كوكتەمگى ەگىس جۇمىستارىنا قاجەت وندىرىستىك تاۋارلار, ماتەريالدار, مەديتسينالىق زاتتار تاسۋعا رۇقسات قاعازى بار اۆتوكولىكتەر مەن ازاماتتار جانە مەديتسينالىق كومەك قاجەت بولعان ازاماتتار عانا وبلىس اۋماعىنا كىرىپ-شىعا الادى.
اتاپ وتەرلىگى, قۇرىلىس سالاسى, كوكتەمگى ەگىس ناۋقانى, جۇمىسپەن قامتۋ جول كارتاسى, تىرشىلىكتى قامتاماسىز ەتۋ نىساندارى كارانتيندىك رەجىمگە قاراماي جۇمىسىن توقتاتپايدى.