تۇركىستان وبلىسى تۇرعىندارىنىڭ 80%-ى تازا اۋىزسۋمەن قامتىلعان. ياعني 671 ەلدى مەكەن تازا اۋىزسۋ پايدالانۋدا. بيىل 155 ەلدى مەكەندە جاڭا اۋىز سۋ جۇيەلەرى جۇرگىزىلەدى. سونداي-اق 195 ەلدى مەكەندەگى اۋىزسۋ جۇيەلەرى قايتا جاڭارتىلاتىن بولادى.
ال تابيعي گاز سالاسىندا 3 جىلدىق ءىس-شارا جوسپارى بەكىتىلگەن. سوعان سايكەس, قوسىمشا 92 ەلدى مەكەندى, ياعني 49 مىڭ تۇرعىندى تابيعي گازبەن قامتاماسىز ەتۋ جوسپارلانىپ وتىر. بيىلقۇرىلىسى باستالعان 30 نىساننىڭ 20-سىن اياقتاۋ كوزدەلگەن, 10 نىسان كەلەسى جىلعا وتپەلى. وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى يگور الەكسەەۆ تۇركىستان قالاسىنداعى قۇرىلىسى اياقتالعان نىساندار مەن مولتەك اۋداندارداعى تۇرعىنداردى تولىعىمەن تابيعي گازعا قوسۋ جۇمىستارى جۇرگىزىلىپ جاتقانىن اتاپ ءوتتى. حالىقتى كوگىلدىر وتىنمەن قامتاماسىز ەتۋ ماقساتىندا, ۇيگە دەيىن گاز تارتۋ جۇمىسى 85-105 مىڭ تەڭگە ارالىعىندا بولىپ بەكتىلگەن. قوسىمشا ءاربىر جەكە ءۇي وزىنە قاجەتتى قازاندىقتى ساتىپ الۋى ءتيىس.
سونداي-اق باسقارما باسشىسى ەلەكترمەن قامتاماسىز ەتۋ سالاسى بويىنشا بيىل 27 ەلدى مەكەندەگى 19 نىساننىڭ قۇرىلىسى اياقتالىپ, پايدالانۋعا بەرۋ جوسپارلانىپ وتىرعانىن جەتكىزدى. ناتيجەسىندە 30 مىڭ تۇرعىن ساپالى, تۇراقتى ەلەكتر قۋاتىمەن قامتىلاتىن بولادى.