الەۋمەتتىك جەلىدە «دۇنيە, شىركىن» تەرمەسىن دومبىرامەن تەبىرەنە شىرقاعان الەكسەي لودوچنيكوۆتىڭ ونەرى قىزۋ تالقىعا ءتۇسىپ جاتىر. قازاقتىڭ قاسيەتتى قارا دومبىراسىمەن ءان سالىپ, تەرمە-تولعاۋ ايتۋ – كەز كەلگەننىڭ ماڭدايىنا بۇيىرا بەرمەيتىن كيەلى ونەر. مۇنداي جوعارى دەڭگەيگە قول جەتكىزۋ ءۇشىن ءداستۇرلى ءانشىنىڭ قانىندا ۇلتتىق مۋزىكانىڭ تۇنىق قاينارى بۇلكىلدەپ تۇرۋى قاجەت. اسىل مارجان تەڭىزدىڭ تۇبىنە عانا تۇنادى دەسەك, جان-دۇنيەسى دالانىڭ قۇراقتاي سارىنىمەن ۇندەسىپ, قازاقى قايىرىمدار مەن ماقامداردى قالتقىسىز يگەرگەن ورىنداۋشىعا حالىقتىڭ اقجارما لەبىزىنىڭ دە ءدال سولاي شىن كوڭىلدەن توگىلە ءورىلىپ جاتقانىنا كۋا بولدىق. جاس ءانشىنىڭ ونەرىن از ۋاقىتتا 20 مىڭنان استام ادام تاماشالاپ, جانكۇيەرلەرى پىكىر جازىپ, ارمان-اڭسارىن, باقىتىن قازاق ەلىمەن بايلانىستىرعان وزگە ۇلت وكىلدەرىنىڭ, اسىرەسە كەيىنگى جاس بۋىننىڭ مەملەكەتتىك تىلگە, قازاقتىڭ ءداستۇرلى ۇلتتىق ونەرىنە دەگەن سۇيىسپەنشىلىگىنە ريزاشىلىق سەزىمدەرىن بىلدىرگەن.
جاس ونەرپاز ورىنداعان بەلگىلى ءانشى مەيرامبەك بەسباەۆتىڭ رەپەرتۋارىنداعى: «داۋرەن كوشىپ بارادى قارايلاماي, قۇبىلادى كۇن سايىن, قالاي-قالاي؟ سەنىڭ التىن ساۋلەڭە نە جەتەدى, جارقىراعان دۇنيە شار ايناداي. دۇنيە, شىركىن, وتەر ءبىر كۇن!» دەپ باستالاتىن تولعاۋ-تەرمەنىڭ ەرەكشەلىگى – جاتتاندى, ءبىر سارىندى اۋەنمەن جايداق جورتىپ, دىتتەگەن مەجەگە تەز جەتە قوياتىن ەتەك-جەڭى شولاق دۇنيە ەمەس. ول اۋەننىڭ ءار ءيىرىم-ىزىنە ءتان ىرعاقتان اۋىتقىپ كەتپەي, حالىقتىق كونە ماقاممەن, مايدا قوڭىر داۋىسپەن ەگىلە, ەلجىرەي ورىندالاتىن, مىنەزى تاۋ سامالىنداي جۇمساق سازدى شىعارما. ءسوزدىڭ ماعىناسىن, اسەرى مەن ىرعاعىن اۋەنمەن, داۋىسپەن جىمداستىرىپ, مۋزىكالىق اسپاپ سۇيەمەلدەۋىمەن ورىنداعان ءانشى «دۇنيە, شىركىن» تەرمەسىن وسى تالاپقا ساي وتە ءساتتى شىرقاعانىنا كۋامىز.
ونەرپاز ورەن فەيسبۋك جەلىسىندە: «دۇنيە نە بوپ بارا جاتىر؟ وسى دەرتتى تەزىرەك جەڭسەك قوي. ەلىمىز امان بولسىن!» دەپ اۋىزدىقتالماي جاتقان الاپات ىندەتكە الاڭداۋشىلىق بىلدىرگەن. جۇرتشىلىق جاس ءانشىنىڭ تەرمەنى تەبىرەنىپ ايتقان شەبەرلىگىنە, قازاقشا مۇدىرمەي سويلەي الاتىندىعىنا عانا ەمەس, قازاق تىلىندە قاتەسىز جازىلعان وسى پوستىنا ريزاشىلىقپەن پىكىرلەر قالدىرعان. ۇلتۋ ساعىمبەكوۆا ەسىمدى جەلى قولدانۋشى: «شىركىن-اي, وسىنداي باسقا ۇلت ازاماتىنىڭ ونەرىن بىزدەگى ءوز ءتىلىن بىلمەي جۇرگەندەرگە كورسەتىپ, ۇلگى ەتسە عوي» دەپ ويعا جەتەلەسە, ەرزات جاقىپ ەسىمدى ازامات: «بارەكەلدى! دەگەنىڭە جەت. مىناۋىڭ ناعىز قازاقتىڭ ءوزى عوي», ال قۋانار قاقالوۆا: «ناعىز ازامات ەكەن» دەپ قولداۋ بىلدىرگەن. وسى سارىنداعى جازبالاردى كوپتەپ مىسالعا كەلتىرۋگە بولادى.
ونەر يەسى كەيىنگى تاعى ءبىر پوستىن: «كۇن سايىن چەللەندج سانى كوبەيىپ جاتىر. مەنىڭ ويىمشا ناعىز كۇشتى چەللەندج, بۇل – ءوزىمىزدىڭ قازاق اندەرىن ورىنداۋ. ەلىمىزدەگى سوڭعى جاعدايلارعا بايلانىستى ۇيىمىزدە وتىرىپ, ءبىر-بىرىمىزگە قولداۋ كورسەتەيىك, دەنساۋلىق تىلەيىك. ءبىز بىرگەمىز. سىزدەرگە ەسكەندىر حاسانعاليەۆتىڭ «اتامەكەن» ءانىن ايتىپ بەرەيىن. وسى ونەردى ءارى قاراي جالعاستىرۋدى پاۆلودار وبلىسى مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ەرنۇر داۋەنوۆكە جولدايمىن» دەپ قازاقشا جازعان. مۇنى 2 مىڭنان استام ادام تاماشالاعان, 400-دەي تىڭداۋشى قولداعان.
ءانشىنىڭ ءومىرى تۋرالى قىسقاشا بايانداساق, ول – پاۆلودار وبلىسىنىڭ تۋماسى. بالالار ءۇيىنىڭ تۇلەگى. ۇلتى – ورىس. قازاقتىڭ قارا دومبىراسىن جاقسى كورەدى. ءداستۇرلى اندەردى ورىندايدى. ءتىلىم دە, جانىم دا – قازاق دەيدى. «100 جاڭا ەسىم» جوباسىنا ىلىككەن تۇلعا. 2016 جىلى پاۆلودار قالاسىندا وتكەن كەزدەسۋدە ەلباسىنىڭ الدىندا ءسوز سويلەگەن. «اسا قۇرمەتتى ەلباسى, مەن تاعدىردىڭ جازۋىمەن اۋداندىق بالالار ۇيىندە تاربيەلەندىم. قازىر مۋزىكالىق كوللەدجدە وقيمىن. امىرە قاشاۋباەۆ اتامىز 1925 جىلى پاريجدە وتكەن كورمەدە «بالقاديشا» ءانىن ورىنداعان ەدى. مەن دە سول ءاندى استاناداعى ەكسپو-دا ايتقىم كەلەدى» دەپ تىلەگىن جەتكىزگەن. سول ارمانى ورىندالىپ, ەلوردادا وتكەن ءبىراز مەرەكەلىك كەشتەردە ونەر كورسەتتى. مەملەكەت باسشىسىنىڭ قاتىسۋىمەن وتكەن «بەيبىتشىلىك پەن كەلىسىمنىڭ 25 جىلى» اتتى مەرەكەلىك جيىندا دومبىراسىن كۇمبىرلەتىپ, «الاۋ» توبى مەن ديماش قۇدايبەرگەنمەن قوسىلىپ, اقان سەرىنىڭ «بالقاديشا» ءانىن شىرقادى. ىزدەنگەن جەتەر مۇراتقا دەگەن وسى.