تۇركىستان وبلىسى بۇگىندە «قاراپايىم زاتتار ەكونوميكاسى» ارقىلى قارجىلاندىرىلعان جوبالار سانى بويىنشا ەلىمىزدە الدىڭعى ورىندا تۇر. ال, قاراجاتتىڭ يگەرىلۋى بويىنشا ءتورتىنشى ورىندا.
وسى دەڭگەيدەن تۇسپەۋ ماقساتىندا وڭىردە بىرقاتار ءىس قولعا الىنعان. ال كۇنى كەشە وتكەن ونلاين باسقوسۋدا ەكىنشى دەڭگەيلى بانكتەرمەن جانە «اۋىلشارۋاشىلىق نەسيە كورپوراتسياسى» اق-مەن «قاراپايىم زاتتار ەكونوميكاسى» جوبالارىن قولداۋ ءۇشىن CALL-ورتالىق قۇرۋ تۋرالى كەلىسسوز جۇرگىزىلدى. ناتيجەسىندە ەلەكتروندى پوشتا ارقىلى دايىن قۇجاتتاردى قابىلدايتىن جانە ونلاين رەجيمدە جىبەرىلگەن تۇسىنىكتەمەلەردى وڭدەيتىن جاۋاپتى قىزمەتكەرلەر بەكىتىلەتىن بولدى. ءموبيلدى توپتارعا كاسىپكەرلەردىڭ قۇجاتتارىنا قاتىستى تۋىنداعان ماسەلەلەرىن تەز ارادا شەشۋ جۇمىستارى جۇكتەلەدى.
وبلىس اكىمىنىڭ ورىنباسارى م.مىرزاليەۆتىڭ توراعالىعىمەن ونلاين رەجيمدە وتكەن ايماقتىق «اتامەكەن» ۇلتتىق كاسىپكەرلەر پالاتاسى جوبالىق كەڭسەنىڭ كەزەكتى وتىرىسىنا كاسىپكەرلەر جانە ساۋدا باسقارماسىنىڭ باسشىسى ن.بايعۇت,كاسىپكەرلەر پالاتاسىنىڭ باسشىلىق قۇرامى, ەكىنشى دەڭگەيلى بانك پەن «اۋىلشارۋاشىلىق نەسيە كورپوراتسياسى» اق-نىڭ وكىلدەرى جانە «قاراپايىم زاتتار ەكونوميكاسى» جوباسىنىڭ ايماقتىق ءموبيلدى توپ مۇشەلەرى قاتىستى. كاسىپكەرلەرگە توتەنشە جاعداي كەزىندە تۋىندايتىن قيىندىقتار جايى تالقىلانعان جيىندا بۇرىنىراق الىنعان نەسيەلەردى وتەۋدى كەيىنگە شەگەرۋ, «قاراپايىم زاتتار ەكونوميكاسى» جوباسى اياسىندا قۇجاتتاردى جيناۋ جانە ەكىنشى دەڭگەيلى بانكتەرگە وتكىزۋ, جوبالىق كەڭسە حاتشىلىعىنىڭ قورىتىندىلارى, بيزنەس جوبالاردى قولداۋ جۇمىستارىنىڭ ناتيجەلەرى, الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تۇراقتاندىرۋ جايى جانە اۋدان قالالارداعى ءموبيلدى توپتاردىڭ كاسىپكەرلەرگە ونلاين رەجيمدە قولداۋ كورسەتۋ الگوريتمدەرى كەڭىنەن ءسوز بولدى.