پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا سۋارىلاتىن جەرلەردىڭ يرريگاتسيالىق ينفراقۇرىلىمىن جاڭعىرتۋ ماسەلەسى قارالدى, دەپ حابارلادى پرەمەر-ءمينيستردىڭ ءباسپاسوز قىزمەتى.
گەولوگيا, ەكولوگيا جانە تابيعي رەسۋرستار ءمينيسترى ماعزۇم مىرزاعاليەۆ, اۋىل شارۋاشىلىعى ءمينيسترى ساپارحان وماروۆ, سونداي-اق تۇركىستان جانە قىزىلوردا وبلىستارىنىڭ اكىمدەرى ومىرزاق شوكەەۆ پەن گۇلشارا ابدىقالىقوۆا بايانداما جاسادى.
قازاقستاندا 2020-2021 جىلدارى 6 785 كيلومەتر كانال, 4 سۋ قويماسى, 4 سۋ تورابى, 239 تىك درەناج ۇڭعىماسى جانە 23 مىڭ وزگە دە سۋ شارۋاشىلىعى قۇرىلىستارى قايتا جاڭارتىلادى.
يرريگاتسيالىق ينفراقۇرىلىمدى دامىتۋ مەن جاڭعىرتۋ جوبالارىن ىسكە اسىرۋ 2020-2021 جىلدارى الماتى, جامبىل, تۇركىستان, قىزىلوردا جانە اقتوبە وبلىستارىندا قوسىمشا 500 مىڭداي گەكتار سۋارمالى جەردى پايدالانۋعا مۇمكىندىك بەرەدى. بۇعان شامامەن 274 ملرد تەڭگە كوزدەلگەن. 88 مىڭ جۇمىس ورنى قۇرىلادى, وعان قۇرىلىس جانە جوندەۋ جۇمىستارى كەزىندەگى 11 مىڭ جۇمىس ورنى جانە 77 مىڭ تۇراقتى جۇمىس ورنى كىرەدى.
وسى اينالىمعا ەنگىزىلەتىن جەرلەردەگى اۋىل شارۋاشىلىعى جالپى ءونىمىنىڭ كولەمى جىلىنا 165 ملرد تەڭگەنى قۇرايدى جانە ساۋدا, ءونىمدى وڭدەۋ, مال شارۋاشىلىعى سالالارىندا مۋلتيپليكاتيۆتىك اسەر ەتەدى.
«پرەزيدەنت قاسىم-جومارت كەمەل ۇلى توقاەۆ ءوز جولداۋىندا 2030 جىلعا قاراي سۋارمالى جەرلەردىڭ كولەمىن 1,5 ملن گەكتاردان 3 ملن گا دەيىن بىرتىندەپ ۇلعايتۋ قاجەتتىلىگىن اتاپ ءوتتى», — دەدى ا. مامين.
پرەمەر-مينيستر سۋارمالى جەرلەردىڭ ينفراقۇرىلىمىن اۋقىمدى تۇردە كەڭەيتۋ اگروونەركاسىپتىك كەشەندى دامىتۋعا ەلەۋلى سەرپىن بەرەتىنىن, ول ەل ەكونوميكاسىنىڭ قۇرىلىمىندا ماڭىزدى سەكتورعا اينالۋى ءتيىس ەكەنىن اتاپ ايتتى.
«قابىلداناتىن شارالار 2024 جىلعا قاراي جەمىس-كوكونىس ونىمدەرى بويىنشا يمپورتتى ءجۇز پايىز الماستىرۋعا مۇمكىندىك جاسايدى», — دەدى ا. مامين.
ۇكىمەت باسشىسى ەكولوگيا, اۋىل شارۋاشىلىعى مينيسترلىكتەرىنە, اكىمدىكتەرگە يرريگاتسيالىق ينفراقۇرىلىمدى دامىتۋ جانە جاڭعىرتۋ جوبالارىن ىسكە اسىرۋدى تەزدەتىپ باستاۋدى, سونداي-اق قاراجاتتىڭ ءتيىمدى يگەرىلۋىنە تيىسىنشە باقىلاۋ جۇرگىزۋدى قامتاماسىز ەتۋدى تاپسىردى. بۇل رەتتە جۇمىس ورىندارىن ساقتاۋعا جانە جاڭا جۇمىس ورىندارىن قۇرۋعا ەرەكشە كوڭىل ءبولىنۋى قاجەت.
«اۋىل شارۋاشىلىعى مينيسترلىگى اكىمدىكتەرمەن بىرلەسىپ, پايدالانۋعا بەرىلەتىن سۋارمالى جەرلەردى بارىنشا جانە ءسوزسىز يگەرۋ بويىنشا جۇمىس جۇرگىزسىن. وڭىرلەر جەر ۋچاسكەلەرىن ۋاقىتىندا ءبولۋ, فەرمەرلىك القاپتارعا قاجەتتى ينفراقۇرىلىمدى جەتكىزۋ بويىنشا بارلىق شارالاردى قابىلداۋى قاجەت», — دەدى ا. مامين.