مەملەكەت باسشىسى قاسىم-جومارت توقاەۆتىڭ ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى مالىمدەمەسى وتە وزەكتى ءارى دەر كەزىندە جاريالانىپ وتىر.
قاراپايىم ازاماتتاردى, كاسىپكەرلەردى ەلەڭدەتكەن بىرقاتار سۇراقتارعا انىق ءارى اشىق جاۋاپ ايتىلدى. اسىرەسە تابىسسىز قالعان ازاماتتارعا, كىرىسسىز قالعان كاسىپكەرلەرگە مەملەكەت تاراپىنان ۇلكەن قامقورشىلىق جاسالماق. پرەزيدەنت كاسىپكەرلىككە قاتىستى ءۇش باعىتقا توقتالدى. ەڭ الدىمەن ەگىن ەگەتىن كاسىپكەرلەرگە قارجىلاي جانە جەڭىلدەتىلگەن باعامەن جانارماي ۇسىنۋ تۇرعىسىنان قولداۋ كورسەتىلەدى. مەملەكەت باسشىسى وسى جەڭىلدەتىلگەن باعامەن بەرىلەتىن جانارمايدى شارۋالارعا دەيىن جەتكىزۋ ماسەلەسىن ەرەكشە ەسكەرتتى. سەبەبى مەملەكەت تاراپىنان بۇعان دەيىن كورسەتىلەتىن وسى تەكتەس قولداۋلارعا قاتىستى ءساتسىز تاجىريبە قالىپتاسقان ەدى. مەملەكەت قولداۋىنا قولى جەتپەگەن قوجالىقتار از ەمەس. ەندى ونداي ولقىلىقتارعا جول بەرىلمەۋى كەرەك.
تاعى ءبىر ايتا كەتەتىن جايت, كارانتين كەزىندە كوپتەگەن شاعىن جانە ورتا بيزنەس يەلەرى كىرىسسىز قالىپ, مۇشكىل جاعدايعا تاپ بولدى. ولاردىڭ دا بۇگىنگى جاعدايى وڭىپ تۇرعان جوق. نەسيەنى وتەۋ مەن سالىق تولەۋدى ايتىپ وتىرمىن. بيىل 16 ناۋرىزدا قازاقستاننىڭ اۋماعىندا توتەنشە جاعداي ەنگىزىلۋىنە بايلانىستى مەملەكەت باسشىسى حالىققا ۇندەۋىن جەتكىزىپ, وندا وسى سالىق ماسەلەسىنە قاتىستى وڭ شەشىم قابىلداعان بولاتىن. ياعني كاسىپكەرلەردىڭ الداعى ءۇش ايلىق سالىق بورىشىن كەيىنگە قالدىرۋ تۋرالى شەشىم شىقتى.
وسىنداي وڭ قادام نەسيەگە قاتىستى دا ايتىلعان ەدى. الايدا بۇل ماسەلە ءالى دە بولسىن شەشىمىن تاپپاي كەلگەنىن ايتۋ قاجەت. كاسىپكەرلەر بانك بولىمشەلەرىنە كەلىپ, نەسيەنى, وعان قوسىلاتىن پايىزدىق ۇستەمەاقىنى توقتاتا تۇرۋ تۋرالى ايتسا, بانك ماماندارى بۇل ماسەلەنى قاراستىرۋ, ءالى دە تالداۋ قاجەتتىگىن جەتكىزەتىنىن ءجيى ەستيمىن. ال بۇل جولعى مالىمدەمەسىندە پرەزيدەنت قاتاڭ تاپسىرما بەرىپ وتىر. «مەن تاعى دا ەكىنشى دەڭگەيدەگى بانكتەردەن ازاماتتىق جاۋاپكەرشىلىك پەن تۇسىنىستىك تانىتۋدى سۇرايمىن. بانكتەر قيىن جاعدايعا تاپ بولعاندا مەملەكەت ولارعا ايتارلىقتاي كومەك بەردى. قازىر سىزدەر حالىققا جانە وتاندىق بيزنەسكە قولداۋ كورسەتۋلەرىڭىز كەرەك. قاجەت بولعان جاعدايدا مەملەكەت تاراپىنان قوسىمشا نۇسقاۋلىق شارالار قولعا الىنادى. جاعداي ودان ءارى ۋشىعاتىن بولسا, ۇكىمەت پەن قارجى سالاسىنىڭ قۇزىرلى ورگاندارى بۇل ماسەلەنى شەشۋ ءۇشىن ءتيىستى شارالار قابىلدايدى», دەدى ق.توقاەۆ.
پرەزيدەنتتىڭ بۇل باستاماسى كاسىپكەرلەر ءۇشىن ۇلكەن قولداۋ بولىپ وتىر. ەندىگى ماسەلە وسى ايتىلعانداردى ىسكە اسىرۋ. بانك سالاسى دا بيزنەستىڭ ءبىر تارماعى. الايدا توتەنشە جاعداي كەزەڭىندە تۇسىنىستىك تانىتۋدى دا ۇمىتپاعاندارى ءجون.
ەندىگى ماسەلە – ەلىمىزدىڭ ىشكى نارىعىن تۇتىنۋشىلار تاراپىنان سۇرانىسقا يە تاۋارلارمەن تولىقتىرۋ. وتانداستارىمىزدى بيدايمەن, ۇنمەن قامتي الساق تا, سۇرانىسقا يە وزگە دە كوپتەگەن ازىق-ت ۇلىك ءونىمىن يمپورتتاۋعا ءماجبۇرمىز. سوندىقتان مەملەكەت باسشىسى يمپورت تاۋارلارىنا سالىناتىن باج سالىعىن الىپ تاستاۋ باستاماسىن كوتەردى. الايدا ەۋرازيا ەكونوميكالىق وداعى شەڭبەرىندەگى مەملەكەت بولعاندىعىمىزدان كەدەن ماسەلەسىنە قاتىستى مۇنداي شەشىمدى قازاقستان ءوزى عانا شىعارا المايدى. اتالعان وداق سەرىكتەستەرىمەن جۇمىس جۇرگىزۋ ماسەلەسىنە قاتىستى ەلىمىزدەگى ءتيىستى ورگاندارعا تاپسىرما بەردى.
2007 جىلدارداعى داعدارىستان باستاپ كاسىپكەرلەرگە قولداۋ تەك بانكتەر ارقىلى جاسالىپ كەلدى. ەندىگى جەردە بولاشاعى بار, تاۋارلارى سۇرانىسقا يە كاسىپكەرلەردى بانكتەردىڭ قاتىسۋىنسىز تىكەلەي قارجىلاندىرۋ ماسەلەسى كوتەرىلدى. بۇل دا دۇرىس شەشىم دەپ باعالاۋعا بولادى. بۇعان دەيىن مۇنداي قولداۋلار بولماعان ەدى. پرەزيدەنتتىڭ بۇل تاپسىرماسى وتاندىق تاۋار وندىرۋشىلەر ءۇشىن اسا ماڭىزدى.
قورىتا كەلسەك, مەملەكەت باسشىسىنىڭ ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارى قازاقستاندىقتارعا زور مۇمكىندىك بەرىپ وتىر. ەندى ۇكىمەت تاراپىنان وسى تاپسىرمالاردىڭ ءتيىمدى ءارى ۋاقىتىندا جۇزەگە اسىرىلۋىن كۇتەمىز.
ازات پەرۋاشەۆ,
«اق جول» دەموكراتيالىق پارتياسىنىڭ توراعاسى,
ءماجىلىس دەپۋتاتى