تۇركىستاندا سالىنىپ جاتقان نىسانداردىڭ باسشىلارىنا جۇمىسشىلاردىڭ ساقتىق شارالارىن باقىلاۋدى, ەلدەگى توتەنشە جاعدايعا وراي بەكىتىلگەن بارلىق تالاپتاردى قاتاڭ ساقتاۋدى تاپسىرعان وبلىس اكىمى ومىرزاق شوكەەۆ قۇرىلىستىڭ باسەڭدەمەۋىن مىندەتتەدى.
وبلىس اكىمى بىرقاتار نىساندى ارالاپ, ەلدەگى توتەنشە جاعدايعا قاتىستى تالاپتار مەن ساقتىق شارالارىنىڭ قاتاڭ ساقتالۋىن تەكسەردى. جەلىلىك ساياباقتى كورىپ, قالالىق ارباتتى قايتا قالپىنا كەلتىرۋ جۇمىستارىمەن تانىستى. سونىمەن قاتار, «كۇلتوبە قالاشىعى» ارحەولوگيالىق ساياباعىندا بولدى. 11 گەكتار جەردە ورنالاسقان جەلىلىك ساياباقتا اتتراكتسيوندار, سالت-ءداستۇرىمىزدى دارىپتەيتىن ساۋلەت ونەرىنىڭ تۋىندىلارى ورنالاسقان. قالاداعى بەكزات ساتتارحانوۆ كوشەسىنىڭ بويىنداعى ساياباقتا جۇمىس كەستەسىنە سايكەس سۋعارۋ, درەناجدىق جۇيەلەردى جۇرگىزۋ, سۋبۇرقاقتار ورناتۋ, ساندىك سۋ ايدىنى جانە كوشەتتەر وتىرعىزۋ جۇمىستارى جۇرگىزىلۋدە. اشىق اسپان استىندا ورنالاسقان اۋقىمدى باقتا اشىق باسسەين, سۋسىز فونتان سالىنۋدا.
ال, قالانىڭ رۋحاني-مادەني ورتالىعىندا ورنالاسقان عىلىمي-امبەباپ كىتاپحاناسىندا سىرتقى ارلەۋ جۇمىستارى جۇرگىزىلۋدە. وبلىس باسشىسى اقتوبە ءوڭىرىنىڭ تارتۋى رەتىندە سالىنىپ جاتقان دراما تەاتردىڭ قۇرىلىسىن ارالادى. اتالعان نىسان تۇركىستان مەن اقتوبە وبلىستارىنىڭ بىرىگىپ قارجىلاندىرۋىمەن جۇزەگە اسۋدا. ءتورت قاباتتان تۇراتىن عيماراتتىڭ جالپى كولەمى – 9700 شارشى مەتر, وندا 510 ادامعا ارنالعان كورەرمەن زالى, ارنايى اۆتوتۇراق ورنى بولادى.
ومىرزاق شوكەەۆ سونداي-اق ياساۋي كەسەنەسىنىڭ اينالاسىندا ءجۇرىپ جاتقان جۇمىس بارىسىن باقىلادى. قاسيەتتى كەسەنەنىڭ اينالاسىن كوگالداندىرۋ, اباتتاندىرۋ جۇمىستارى اياسىندا لاندشافتىق ديزاينعا ەرەكشە نازار بولىنگەن.