جىل سايىن 12 ملرد دانا گۇل ساتاتىن ەلدىڭ گۇل-گۇل جايناپ تۇرعان ءومىرىن وتە اۋىر كوڭىلسىزدىك جايلاعانى سەزىلىپ-اق تۇر.
الەمدى ابىگەرگە سالعان ىندەت قاي سالانىڭ بولسىن قارىشتاپ دامۋىنا قۇرساۋ بولىپ تۇر. ونىڭ ىشىندە كاسىپكەرلەردىڭ تىرلىگى كادىمگىدەي تۇرالاپ قالعانى ءبىزدىڭ وزىمىزگە بىلىنۋدە.
كەشە عالامتور بەتىنەن نيدەرلاندىداعى گۇل نارىعىنىڭ قۇلاعانىن كوزىمىز شالىپ قالدى. شىنىمەن بۇگىندە «بايتال تۇگىل باس قايعى» دەمەكشى, سۇيىكتىسىنە گۇل سىيلاۋعا ەشكىمنىڭ زاۋقى جوق سياقتى.
اتالعان اقپاراتتى وقىپ وتىرساق, گۇل ساتۋمەن اينالىساتىن ءىرى كومپانيالار كارانتين سالدارىنان ساتىلىمنىڭ كۇرت تومەندەۋىنە بايلانىستى فلورالىق ءونىم مەن گۇل ساتۋ كاسىبىن تاستاۋعا ءماجبۇر.
«كوروناۆيرۋس – بۇل گوللاندتىق گۇل ونەركاسىبى ءۇشىن اپات بولدى... ءبىزدىڭ نارىقتاعى تابىسىمىزدىڭ 85% پايىزى جوعالدى», دەيدى Royal Flora Holland كومپانياسىنىڭ ءباسپاسوز قىزمەتكەرى ميشەل ۆان شي. جىل سايىن 12 ملرد دانا گۇل ساتاتىن ەلدىڭ گۇل-گۇل جايناپ تۇرعان ءومىرىن وتە اۋىر كوڭىلسىزدىك جايلاعانى سەزىلىپ-اق تۇر.
ماقالادا سونداي-اق كەيبىر گوللانديالىق گۇل وسىرۋشىلەر مەديتسينا قىزمەتكەرلەرىنىڭ جۇمىسىن قولداۋ ەسەبىندە ريزاشىلىق ءبىلدىرىپ, تەگىن قىزعالداق تاراتۋعا جۇگىنگەندەرى ايتىلعان.
ونى وقىپ وتىرعان ونلاين-وقىرماندار قاراپ قالماي سالى سۋعا كەتكەن ساۋداگەرلەرگە تەگىن «اقىلدارىن» الەۋمەتتىك جەلىنىڭ بەتىندە توپەلەپ جاتىر. ءبىر بىلگىش «بىزگە دە تەگىن تاراتىپ بەرە سالسىن» دەسە, ەكىنشىسى كاسىپكەرلەرگە جاندارى اشىعانىن ايتىپ «وبال بولىپتى, ول گۇلدەردى نە ساتا المايسىڭ, نە جەي المايسىڭ» دەپ سوڭىن ازىلگە سۇيەگەن.
وسى كەزدە جىپىرلاعان جازبالاردىڭ ىشىنەن ءبىزدى جىميتقان ءارى ويلاندىرىپ تاستاعان ءبىر پىكىر شىعا كەلدى. وسى قىسىلتاياڭ شاقتىڭ وزىندە گۇل ساۋداسىن گۇلدەندىرىپ وتىرعان وتانداستارىمىز بار ەكەن. بايقاۋىمىزشا الگى جەكە كاسىپكەرلەر گۇلدى ۇيىڭىزگە دەيىن جەتكىزىپ بەرۋمەن بەلسەندى اينالىسىپ جاتقانعا ۇقسايدى. ينستاگرامداعى پاراقشاسىنا كىرىپ قارايتىن بولساڭىز, شىنىمەن دە قۇشاق-قۇشاق گۇل شوقتارىن ءۇي-ۇيگە جەتكىزىپ بەرىپ جاتقان قىز-جىگىتتەردى كورەسىز...
ارينە, مىناۋ كوڭىلسىزدىك جايلاعان جەر بەتىن سۇلۋلىق, ءسال عانا مەيىرىم قۇتقاراتىنى ءسوزسىز. دەگەنمەن قادام باسقان سايىن قاتەردىڭ جاقىنداي بەرەتىنىن استە ەسىمىزدەن شىعارماعانىمىز ابزال عوي.
ميراس اسان,
«Egemen Qazastan»