ىشكى ىستەر ءمينيسترى ەرلان تۇرعىمباەۆ ءىىم باسشىلىعىنىڭ, ونىڭ قىزمەتتەرىنىڭ, سونداي-اق پوليتسيا, توتەنشە جاعدايلار دەپارتامەنتتەرىنىڭ, قىلمىستىق-اتقارۋ جۇيەسىنىڭ جانە مينيسترلىكتىڭ وقۋ ورىندارى باسشىلارىنىڭ قاتىسۋىمەن بەينەسەلەكتورلىق كەڭەس وتكىزدى. بۇل تۋرالى Polisia.kz حابارلادى.
كەڭەسكە دەنساۋلىق ساقتاۋ مينيسترلىگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى توراعاسىنىڭ ورىنباسارى نۇرقان سادۋاقاسوۆ شاقىرىلدى, ول كوروناۆيرۋستىق ينفەكتسيانىڭ تارالۋىنىڭ الدىن الۋ شارالارى تۋرالى ايتتى.
ءىىم باسشىسى كوروناۆيرۋستىق ينفەكتسيانىڭ تارالۋىنا بايلانىستى ىشكى ىستەر ورگاندارىنىڭ جەكە قۇرامى قىزمەت اتقارۋدىڭ ەرەكشە تارتىبىنە اۋىستىرىلعانىن اتاپ ءوتتى.
قۇقىق ءتارتىبىن قامتاماسىز ەتۋ بويىنشا شارالار كۇشەيتىلدى, پوليتسيا مەن ۇلتتىق ۇلاننىڭ جاياۋ جاساقتارى كوبەيتىلدى, سونداي-اق ستراتەگيالىق جانە اسا ماڭىزدى مەملەكەتتىك وبەكتىلەردى كۇزەتۋ كۇشەيتىلدى. كوپ ادامداردىڭ قاتىسۋىمەن وتكىزىلەتىن كەزدەسۋلەر مەن ءىس-شارالار توقتاتىلدى, قىزمەتكەرلەردىڭ شەتەلگە شىعۋى مەن قىزمەتتىك ءىسساپارلارى شەكتەلدى.
– بارلىق دەڭگەيدە ءىىم قىزمەتتەرى مەن بولىمشەلەرىن دەنساۋلىق ساقتاۋ ورگاندارىمەن جەدەل جانە ناقتى ۇيلەستىرۋدى قامتاماسىز ەتۋ قاجەت. پوليتسيا قىزمەتكەرلەرى, قۇتقارۋ قىزمەتى جانە ۇلتتىق ۇلاننىڭ اسكەري قىزمەتشىلەرى قازىردىڭ وزىندە كارانتيندىك ءىس-شارالار كەزىندە مەديتسينالىق قىزمەتتەرگە تولىق جانە جان-جاقتى كومەك كورسەتۋدە. بۇل رەتتە كوروناۆيرۋستىق جاعدايى قولايسىز ەلدەردەن كەلگەن ازاماتتاردى مەديتسينالىق مەكەمەلەرگە الىپ ءجۇرۋدى جۇزەگە اسىرۋدا, – دەدى ەرلان تۇرعىمباەۆ.