بۇگىن پارلامەنت ماجىلىسىندە اقپارات جانە قوعامدىق دامۋ ءمينيسترى داۋرەن اباەۆ بەيبىت جيىندار تۋرالى زاڭ جوباسىن ازىرلەۋ بارىسىندا حالىقارالىق, ونىڭ ىشىندە ەقىۇ ەلدەرىنىڭ تاجىريبەلەرى تىڭعىلىقتى زەردەلەنگەنىن ايتتى.
«حالىقارالىق تاجىريبە الەمنىڭ كوپتەگەن ەلدەرىندە بەيبىت جيىنداردى ۇيىمداستىرۋ جانە وتكىزۋ بارىسىنداعى باستى باسىمدىق قوعامدىق قاۋىپسىزدىك ەكەندىگىن كورسەتتى. قوعامدىق-ساياسي احۋالدىڭ ناشارلاپ كەتۋىنە بايلانىستى بەيبىت جيىنالىستار وتكىزۋ جونىندەگى زاڭنامالارىن قاتاڭداتۋعا بارعان بىرقاتار دەموكراتيالىق ەل بار. زاڭدارىن ىرىقتاندىرۋعا بارعان فرانتسيا, گەرمانيا, ۇلىبريتانيا, پولشا, پوستكەڭەستىك كەڭىستىكتە قىرعىزستان مەن ارمەنيا سىندى ەلدەر دە بار. ولاردا بەيبىت جيىندار وتكىزۋ ەسكەرتۋ جۇيەسى ارقىلى جۇزەگە اسادى», دەدى داۋرەن اباەۆ.
ونىڭ اتاپ وتۋىنشە, رۇقسات بەرۋ جۇيەسى اقش, شۆەتسيا, جاپونيا, سينگاپۋردا قولدانىلادى.
«بەيبىت جينالىستاردى ۇيىمداستىرۋ مەن وتكىزۋ ماسەلەلەرىن رەتتەيتىن قولدانىستاعى زاڭناماسى 25 جىل بۇرىن, 1995 جىلى قابىلدانعان. قوعام ساناسىنا جينالىستار مادەنيەتىن سىڭىرەتىن ۋاقىت كەلەدى. ءسوز قولدانىستاعى زاڭنامانى تەك وزگەرتۋ جايىندا عانا ەمەس, تۇجىرىمدامالىق تۇرعىدا جاڭا زاڭ جوباسى جايىندا بولىپ وتىر. ول بەيبىت جيىنداردىڭ بارلىق تۇرلەرىن ۇيىمداستىرۋ جانە وتكىزۋ ماسەلەلەرىن رەگلامەنتتەيتىن بولادى», دەدى مينيستر.