كەنشىلەر استاناسىندا مەديتسينالىق ءۇش قاباتتى ماسكالار شىعارىلا باستادى. بۇل تۋرالى قاراعاندى وبلىسى اكىمىنىڭ ورىنباسارى الىشەر ابدىقادىروۆ مالىمدەدى. سونىمەن قاتار, ول مەديتسينالىق ءونىمنىڭ جاقىن ارادا وڭىردەگى دارىحانالارعا جونەلتىلە باستايتىنىن دا جەتكىزدى.
بۇگىنگى كۇندە وتە قاجەت ءونىم شىعاراتىن كاسىپورىننىڭ جۇمىسىمەن تانىسقان وبلىس اكىمىنىڭ ورىنباسارى ەڭ ءبىرىنشى كەزەكتە مەديتسينالىق ماسكالارمەن الەۋمەتتىك ءدارىحانالاردى قامتاماسىز ەتە باستاۋ كەرەكتىگىنە نازار اۋداردى.
– مەديتسينالىق ماسكالار شىعاراتىن ماشينا ساتىپ الدىق. ونىڭ ءبىر مينۋت ىشىندە 100-120 دانا شىعارۋعا قۋاتى جەتەدى. ياعني, ءبىز وبلىس تۇرعىندارىنىڭ ينفەكتسيادان قورعانىس قاجەتتىلىگىن تولىعىمەن قاناعاتتاندىرا الامىز, – دەيدى «Mف «Meرەي» جشس-ءنىڭ ديرەكتورى قانات ناۋرىزباەۆ.
وبلىستىق دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆ مەديتسينالىق ماسكالارعا سۇرانىستىڭ بارلىعىن ايتتى. قازىرگى تاڭدا كاسىپورىننىڭ جۇمىستى باستاۋعا تولىق دايىن ەكەنىن دە اتاپ ءوتتى ول.
بۇل كۇنى وبلىس اكىمىنىڭ ورىنباسارى ساران قالاسىنداعى جەكە گيگيەنا جانە ءۇي-جايلاردى دەزينفەكتسيالاۋعا ارنالعان انتيسەپتيكالىق زاتتار شىعاراتىن كاسىپورىندا دا بولىپ, ونىڭ تىنىس-تىرشىلىگىمەن تانىستى.
«گروس فارم» جشس ديرەكتورىنىڭ ورىنباسارى ميحايل مومچەليدزە اتالعان كاسىپورىندا شىعارىلاتىن ءونىمنىڭ باعاسى قولجەتىمدى ەكەنىن ايتتى.
– قازاقستاندا بىزدىكى سياقتى ءتورت ءوندىرىس ورنى بار. ءبىزدىڭ كاسىپورىننىڭ وندىرىستىك قۋاتتىلىعى ساعاتىنا 2 مىڭ قۇتى شىعارۋعا جەتەدى, ياعني تاۋلىگىنە 1 مىڭ ليتر ءونىم وندىرەمىز. مەديتسينالىق مەكەمەلەرگە ونىمدەردى ءوزىمىز جەتكىزەمىز جانە بۇكىل قاراعاندى وبلىسىن دەزينفەكتسيالىق زاتتارمەن تولىق قامتاماسىز ەتە الامىز, – دەدى ول.
كەزدەسۋ بارىسىندا جەرگىلىكتى وندىرۋشىلەر وبلىس تۇرعىندارىن مەديتسينالىق ماسكالارمەن عانا ەمەس, سونىمەن بىرگە قولعا ارنالعان انتيسەپتيكتەرمەن دە قامتاماسىز ەتە الاتىندىقتارىن مالىمدەدى.
قاراعاندى وبلىسى