الماتى قالاسىنىڭ اكىمى باقىتجان ساعىنتاەۆتىڭ تۇرعىندارمەن كەزدەسۋى بارىسىندا قالانىڭ ەكونوميكالىق-دامۋ كورسەتكىشى جايىندا سلايد كورسەتىلىپ, ودان كەيىن قالا باسشىسى تۇرعىنداردىڭ ساۋالدارىنا جاۋاپ بەرۋگە كىرىستى.
تۇرعىنداردى قالا تىرشىلىگىنىڭ بەيجاي قالدىرمايتىنىن سۇراقتاردىڭ تولاسسىز قويىلۋىنان بايقاۋعا بولادى. قالا باسشىسى بارلىق ساۋالعا جاۋاپ بەرە وتىرىپ, اۋدان اكىمدەرىنە تاپسىرما بەرىپ وتىردى. الەۋمەتتىك سالانى قامتيتىن سۇراقتار قاتارىندا قالامىزعا جاڭا قوسىلعان ناۋرىزباي اۋدانىندا حالىق سانىنىڭ ارتۋىنا بايلانىستى بالالارعا ارنالعان وقۋشىلار ءۇيىنىڭ جوقتىعى ايتىلدى.
قالا اكىمى اتالعان اۋداندا بيىل جاڭا ۇلگىدەگى وقۋشىلار ءۇيى سالىناتىن جەر بەلگىلەنىپ, جوبا جاسالعانىن ايتىپ ءوتتى. وقۋشىلار ءۇيى بيىل قۇرىلىس جۇمىسىن باستايتىن بولادى.
شاھار باسشىسى, سونداي-اق, بيىل شاھارىمىزداعى نەگىزى 1983 جىلى قالانعان رەسپۋبليكالىق وقۋشىلار سارايى كۇردەلى جوندەۋدەن وتەتىنىن ايتىپ ءوتتى. وقۋشىلار سارايىن جوندەۋدەن وتكىزگەندە تۇرعىندارمەن اقىلداسا وتىرىپ, قانداي ۇيىرمەلەر اشىلىپ, قانداي قۇرال-جابدىقتارمەن قامتىلاتىنى شەشىلەتىن بولادى.