قالالىق ەسىرتكى قىلمىسىنا قارسى ءىس-قيمىل باسقارماسىنىڭ ۇيىمداستىرۋىمەن ناشاقورلىقتى الدىن الۋ, ۋىتتى زاتتاردىڭ زيانى تاقىرىبىندا ءبىلىم بەرۋ مەكەمەلەرى, كوللەدج ديرەكتورلارى جانە يۋۆەنالدى پوليتسيا قىزمەتكەرلەرىمەن بىرلەسكەن ديالوگ الاڭى وتكىزىلدى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
شارا بارىسىندا جاسوسپىرىمدەر اراسىنداعى ناشاقورلىق, ونىڭ الدىن الۋ جانە بالالارعا سالاۋاتتى ءومىر سالتىن باۋلۋ, جاستاردىڭ ەسىرتكىمەن بايلانىستى جاسالعان قىلمىستارى مەن زاڭدى جاۋاپكەرشىلىك, پسيحوبەلسەندى زاتتار مەن ولاردىڭ انالوگتارىن قولدانۋدىڭ سالدارى سەكىلدى ماسەلەلەر قوزعالدى. سونداي-اق ەسىرتكى قىلمىسىنا قاتىستى جازانى قاتاڭداتۋ بويىنشا نورماتيۆتىك اكتىلەر تالقىلاندى.
سونىمەن قاتار نۇر-سۇلتان قالاسىندا ناشاقورلىق پەن ەسىرتكى قىلمىسىمەن كۇرەسۋگە باعىتتالعان مەملەكەتتىك ورگاندار مەن ۇكىمەتتىك ەمەس ۇيىمداردىڭ قىزمەتىن ۇيلەستىرۋ جونىندەگى ۆەدومستۆوارالىق شتابتىڭ جۇمىسى اياسىندا 2020 وقۋ جىلىنا ارنالعان ەسىرتكىگە قارسى بىرلەسكەن الدىن-الۋ شارالارىن قابىلداۋ جونىندە شەشىم قابىلداندى.