تۇرعىن ءۇي كەزەگى قالاي جۇمىس ىستەيدى؟

كوبىنە مىناداي جاعداي كەزدەسەدى. ادام ەسەپكە تۇرادى دا, كەيىن بۇل تۋرالى ۇمىتىپ كەتەدى. ءبىراز ۋاقىت وتكەن سوڭ دەرەكتەر جاڭارتىلماعانى, مارتەبە توقتاتىلعانى, ال باعدارلامالارعا قاتىسۋ مۇمكىندىگى جوعالعانى بەلگىلى بولادى. مۇندايعا جول بەرمەۋ ءۇشىن تۇرعىن ءۇي ەسەبىنىڭ قالاي جۇرگىزىلەتىنىن ءبىلىپ, ءوزىڭىزدى ارا-تۇرا تىزىمنەن تەكسەرىپ تۇرعان ءجون.

تۇرعىن ءۇي كەزەگى دەگەن نە؟

بۇل – تۇرعىن ۇيگە مۇقتاج ازاماتتاردىڭ ەسەبى. نەگىزى بىلتىردان باستاپ تالاپتار ايتارلىقتاي جەڭىلدەتىلدى. قازىر ەسەپكە تۇرۋ ءۇشىن ءۇش شارت جەتكىلىكتى:

– قازاقستان ازاماتتىعى نەمەسە قانداس مارتەبەسى بولۋى كەرەك; – سوڭعى بەس جىلدا ەلىمىزدىڭ اۋماعىندا تۇرعىن ءۇي بولماۋى ءتيىس (بۇل تالاپ ءوتىنىش بەرۋشىنىڭ وزىنە, جۇبايىنا جانە كامەلەتكە تولماعان بالالارىنا بىردەي قولدانىلادى); – تۇراقتى تىركەۋ بولۋى قاجەت. استانا, الماتى جانە شىمكەنت قالالارىندا – كەمىندە ءۇش جىل, وزگە وڭىرلەردە مەرزىم شەكتەلمەيدى.

 وقي وتىرىڭىز: تۇرعىن ءۇي ەرەجەسى تۇبەگەيلى وزگەردى

كەزەكتى قايدان كورۋگە بولادى؟

قازىر وزەكتى تىزىمدەر تەك وتباسى بانك سايتىندا جاريالانادى. ولار وبلىستار مەن قالالار بويىنشا بولىنگەن. فورماتى ىڭعايسىزداۋ – Excel فايلى, ونى جۇكتەپ الۋ كەرەك. دەگەنمەن ازىرگە بۇل – جالعىز جۇمىس ىستەپ تۇرعان نۇسقا. بانك وكىلدەرى الداعى ۋاقىتتا ءراسىمدى جەڭىلدەتۋگە ۋادە بەرىپ وتىر.

ءوزىڭىزدى تىزىمنەن قالاي تاباسىز؟

«وتباسى بانكتىڭ» سايتىنا كىرىپ, «قولجەتىمدى تۇرعىن ءۇي» ءبولىمى ارقىلى «تۇرعىن ۇيگە مۇقتاج ازاماتتار ءتىزىمىن» اشاسىز. ءوز ءوڭىرىڭىزدى تاڭداپ, فايلدى جۇكتەيسىز (ول تەك كومپيۋتەر نەمەسە نوۋتبۋكتە اشىلادى). فايلدان تەگىڭىزدى Ctrl + F ارقىلى ىزدەۋگە بولادى.

«كەزەك ءنومىرى» شاتاستىرىپ جىبەرەدى

كوپشىلىك فاميلياسىنىڭ جانىنداعى ساندى ناقتى ورنى دەپ ويلايدى. بۇل قاتە تۇسىنىك. ول – جاي عانا جالپى تىزىمدەگى رەتتىك ءنومىر, ەشقانداي باسىمدىق بەرمەيدى.

قازىر «تۇرعىن ءۇي كەزەگى» ۇعىمىنىڭ ءوزى بىرتىندەپ قولدانۋدان شىعىپ كەلەدى. نەگىزىندە بۇل – مۇقتاج ازاماتتاردىڭ ەسەبى. ءۇي ءبولۋ كەزىندە شەشۋشى ءرول اتقاراتىنى – ەسەپكە تۇرعان كۇن. سول مەرزىم بويىنشا ءار ساناتتىڭ ىشىندە باسىمدىق قالىپتاسادى.

ءوز ورنىڭىزدى ناقتى ءتۇسىنۋ ءۇشىن ءتىزىمدى ءوز ساناتىڭىز بويىنشا سۇزگىدەن وتكىزۋ قاجەت: كوپبالالى وتباسىلار, جەتىم بالالار, تولىق ەمەس وتباسىلار جانە باسقا توپتار. سوندا الدىڭىزدا ناقتى قانشا ادام تۇرعانى كورىنەدى.

تاعى ءبىر ماڭىزدى جايت: مەملەكەتتىك كومەكتىڭ تۇرلەرى ءارتۇرلى, كۇتۋ ءتارتىبى دە سوعان قاراي وزگەرەدى.

وقي وتىرىڭىز: سوت شەشىمىنسىز تۇرعىن ۇيدەن ايىرۋعا دا, باسپانادان شىعارۋعا دا جول بەرىلمەيدى

مەملەكەت قانداي قولداۋ ۇسىنادى؟

قازىرگى تاڭدا ءۇش نەگىزگى باعىت بار:

– جالداۋ اقىسىنا سۋبسيديا (50 پايىزىن مەملەكەت وتەيدى); – جالدامالى تۇرعىن ءۇي (كەي جاعدايدا ساتىپ الۋ قۇقىعىمەن); – جەڭىلدەتىلگەن يپوتەكا (2, 5 جانە 7-9 پايىزدىق مولشەرلەمەمەن).

جالداۋ سۋبسيدياسى تەك ءتورت ساناتقا بەرىلەدى: كوپبالالى وتباسىلارعا, مۇگەدەكتىگى بار ازاماتتارعا, مۇگەدەك بالاسى بار وتباسىلارعا جانە جەتىم بالالارعا. ولار تۇرعىن ءۇيدى نارىقتان وزدەرى ىزدەيدى.

ال جەڭىلدەتىلگەن يپوتەكالىق باعدارلامالاردا, مىسالى ناۋرىز (7–9%), «كەزەكتىڭ كەلۋىن» كۇتۋدىڭ قاجەتى جوق. قابىلداۋ جاريالانعان ساتتە بىردەن ءوتىنىش بەرۋگە بولادى. باستى تالاپ – «وتباسى بانكىندەگى» دەپوزيت پەن جەتكىلىكتى جيناقتىڭ بولۋى.

ەڭ ۇزاق كۇتىلەتىنى – جالدامالى تۇرعىن ءۇي. كەزەكتە تۇرعانداردىڭ باسىم بولىگى وسى ساناتتا. مۇنداي پاتەرلەردىڭ اي سايىنعى اقىسى شامامەن 15-20 مىڭ تەڭگە, وعان كوممۋنالدىق تولەمدەر قوسىلادى. كەي وڭىرلەردە اكىمدىكتەردىڭ شەشىمىمەن بۇل ۇيلەردى كەيىن ساتىپ الۋعا مۇمكىندىك بەرىلەدى.

كەزەكتە تۇرعاندار نە ىستەۋى كەرەك؟

جالدامالى ءۇي, يپوتەكا نەمەسە سۋبسيديا بولىنگەنى تۋرالى SMS الۋ ءۇشىن مىندەتتى تۇردە ينۆەنتاريزاتسيادان ءوتۋ قاجەت. حابارلامالاردى ءتىزىمدى جۇرگىزەتىن «وتباسى بانك» جىبەرەدى.

ينۆەنتاريزاتسيا بارىسىندا ازامات دەرەكتەرىن جيناۋعا جانە وڭدەۋگە كەلىسىم بەرەدى ءارى ءوزىنىڭ جانە وتباسى مۇشەلەرىنىڭ اتىندا تۇرعىن ءۇيدىڭ جوق ەكەنى تەكسەرىلەدى.

وقي وتىرىڭىز: تۇرعىن ءۇي كەزەگى قايتا جۇيەلەندى: كىمدەرگە جەڭىلدىك بەرىلەدى؟

ينۆەنتاريزاتسيادان قالاي وتەدى؟

orken.otbasybank.kz سايتىنا ەلەكتروندىق تسيفرلىق قولتاڭبا ارقىلى كىرىپ, جەكە كابينەتكە وتەسىز. دەربەس دەرەكتەردى وڭدەۋگە كەلىسىمگە قول قوياسىز. «ينۆەنتاريزاتسيا» بولىمىنە ءوتىپ, پروتسەستى باستايسىز. ءاربىر وتباسى مۇشەسى سايتقا جەكە كىرىپ, ءوز كەلىسىمىن راستاۋى ءتيىس.

ەگەر ينۆەنتاريزاتسيادان وتپەسەڭىز, تالاپتارعا تولىق ساي كەلگەننىڭ وزىندە بانك تۇرعىن ءۇي بولىنگەنى تۋرالى SMS جىبەرە المايدى.

قىسقاسى, كەزەك وزدىگىنەن ەشتەڭە كەپىلدەمەيدى. مەملەكەتتىك قولداۋدان قاعىلىپ قالماۋ ءۇشىن تىزىمدەگى مارتەبەڭىزدى تەكسەرىپ, ينۆەنتاريزاتسيانى ۋاقىتىلى ءوتىپ وتىرۋ قاجەت.