بيىل ماڭعىستاۋدا قىس جىلى بولدى. بۇل, ارينە, شارۋا باققاندار ءۇشىن قولايلى بولۋى مۇمكىن, بىراق ءار مەزگىلدىڭ ءوز مىنەزىنە ساي بولعانى جاقسى-اۋ! ايتپەسە, شىلىڭگىر شىلدەنىڭ ءسانى قۇرت-قۇمىرسقا, باقا-شايان سىندى جىبىرلاعان جاندىكتەردىڭ قاقاعان قىس ايى سانالاتىن قاڭتار-اقپاندا دا اسىر سالىپ ءجۇرۋى جاقسى دا, جاراسىمدى دا ەمەس.
ۋلى جاندىكتەردىڭ ۋىتى جاز مەزگىلىنىڭ سوڭىنا تامان, ياعني قىرىق كۇن شىلدە بىتەردە قايتىپ, كۇن ابدەن سۋىتقان سوڭ ولاردان شاعىپ الادى دەگەن قاۋىپ بولماۋى كەرەك ەدى. الايدا «ەستىمەگەن ەلدە كوپ» دەگەندەي, بيىل ماڭعىستاۋدا قىس ورتاسىندا سارى شايان شاعىپ الۋ وقيعاسى ءبىر ەمەس بىرنەشە رەت ورىن الدى.
ماڭعىستاۋ وبلىستىق دەنساۋلىق ساقتاۋ باسقارماسىنىڭ دەرەگى بويىنشا, الدىمەن ءبىر تۇندە جەتى ايەلدى سارىشايان شاعىپ العان. ەڭ ءبىرىنشى جەدەل جاردەم قىزمەتىنە جۇكتى ايەل حابارلاسقان. ول بەينەۋ اۋدانىنىڭ تۇرعىنى ەكەن. جۇكتىلىككە قاۋىپ ءتونۋى مۇمكىن بولعاندىقتان ول ورتالىق اۋداندىق اۋرۋحاناعا جەتكىزىلدى. كوپ ۇزاماي بەينەۋ اۋدانىنىڭ تاعى ءبىر تۇرعىنى مەديتسينالىق كومەككە جۇگىنسە, ءۇشىنشى وقيعا اتالعان اۋدانعا قاراستى بورانقۇل اۋىلىندا 1985 جىلى تۋعان قىزدىڭ باسىندا بولدى. شايان شاققان ءتورتىنشى جاعداي قاراقيا اۋدانى قۇرىق اۋىلىندا تىركەلدى. سوڭعى ءۇش وقيعا جاڭاوزەن قالاسىندا تىركەلىپ, بۇل جەردە دە ايەلدەر زارداپ شەكتى.
الدىمەن ايەلدەرگە شابۋىل جاساعان شاياندار ارتىنشا تاعى دا ءۇش تۇرعىنعا ۋىن دارىتتى. ياعني, ماڭعىستاۋ وبلىستىق «جەدەل جاردەم» جانە «جەدەل مەديتسينالىق جاردەم» قىزمەتىنە سارى شايان شاقتى دەگەن ءۇش شاعىم بۇل جولى دا بەينەۋ اۋدانىنىڭ تۇرعىندارىنان ءتۇسىپتى. ولار – 16 جانە 17 جاستاعى قىزدار, سونداي-اق 62 جاستاعى ەر ادام.
– بارلىق ادامعا العاشقى مەديتسينالىق كومەك كورسەتىلدى. اۋرۋحاناعا جاتقىزۋدىڭ قاجەتى بولعان جوق. ودان ءارى ولارعا تۇرعىلىقتى جەرى بويىنشا دارىگەردەن كەڭەس الۋ ۇسىنىلدى, – دەيدى ماماندار.
سونىمەن, ماڭعىستاۋدا ەكى كۇندە شايان شاعۋىنان ون ادام زارداپ شەكتى. سارى شاياندار نەگىزىنەن تۇنگى ۋاقىتتا, اسىرەسە تاڭعا قاراي شابۋىل جاسايدى ەكەن.
ماڭعىستاۋدا قاھارىنا قىس ەمەس, شاياندار ءمىنىپ تۇر. جاھاندىق جىلىنۋدىڭ اسەرى مە, ايتەۋىر قىستا شايان شاعۋدى ەشكىم جاقسىلىققا جورىپ وتىرعان جوق. قىستان قىمسىنباعان شاياندار جازدا ابدەن كۇشىنە ءمىنىپ, ۋىتى كۇشەيگەن شاقتا قايتپەك دەگەن قورقىنىش بار.
ماڭعىستاۋ وبلىسى