قازاقستانداعى دۇنگەندەر بىرلەستىگى مۇشەلەرىمەن كەزدەسىپ كەلدىم. بىرلەستىك اتىنان ايتارىم, ۇكىمەتتىڭ مۇنداي جاعدايدا تەز ارادا شارا قولدانعانى قۋانتتى. ارنايى كوميسسيا قۇرىلىپ, وقيعا ورنىنا كەلدى, ازاماتتارمەن كەزدەستى. قورداي تۇرعىندارىن سابىرعا شاقىرىپ, جاعدايدىڭ تۇزەلەتىنىن ايتتى.
شىنىمەن, بەردىبەك ساپارباەۆ باستاعان بيلىك وكىلدەرىن كورگەندە حالىق سەنىم ءبىلدىرىپ, ساباسىنا ءتۇستى. بۇگىندە كوشەلەر قوقىستان تازالانىپ, مەكتەپتەر ءوز جۇمىسىنا قايتا كىرىستى. البەتتە, جاعداي تەز ارادا تۇزەلە قويماس. وعان قاراجات ءبولىنۋى كەرەك, شىعىندار ەسەپتەلىپ, ءتيىستى جوسپار دايىندالۋى شارت. حالىق بەردىبەك ساپارباەۆتىڭ ۇيىمداستىرۋشىلىق قابىلەتىنە ءسۇيسىنىپ, ريزا بولدى. ەلدەن كەتپەك بولعان ازاماتتارىمىز قايتارىلىپ جاتىر. كەشەنىڭ وزىندە ءتورت مىڭنان استام ادام ەلگە ورالدى.
ال وقيعانىڭ وزىنە قايتىپ كەلەر بولساق, بۇل جاعداي ۇلتىنا قاراماستان ءاربىر ءۇيدىڭ ۇرەيىن ۇشىردى, حالىقتى تۇگەلدەي ابىگەرگە سالدى. پرەزيدەنتتىڭ لاۋازىمدى تۇلعالاردى جۇمىستان بوساتۋى باسقالارىنا وي سالدى دەگەن سەنىمدەمىن. ويتكەنى بۇل جەرگىلىكتى بيلىكتىڭ جاۋاپكەرشىلىگىنە كىرەدى. جانجال باستالعاندا دەر كەزىندە ءتيىستى جۇمىستارىن اتقارسا, مۇنداي ۇلكەن زالال كەلىپ, بىرنەشە ادام قايتىس بولماس ەدى. بۇل شىن مانىندە, جەرگىلىكتى اتقارۋشى بيلىكتىڭ قۇزىرىنداعى ماسەلە بولاتىن. الايدا كورىپ وتىرعانىمىزداي, ولاردىڭ جاۋاپكەرشىلىگىنىڭ ازدىعى وسىنداي جاعدايلارعا الىپ كەلدى. بۇل – بارلىق قازاقستاندىق ءۇشىن قاسىرەت. ادام شىعىنى بار, قانشا ادام اۋرۋحانادا جاتىر. ۇيلەر ورتەلىپ, وتباسىلار دالادا قالدى. جاعداي تەز ارادا تۇزەلىپ, حالقىمىزدىڭ اۋىزبىرشىلىگى نىعايا تۇسەدى دەگەن سەنىمدەمىن.
شاكير حاحازوۆ,
ماجىلىستەگى قازاقستان حالقى اسسامبلەياسى دەپۋتاتتىق توبىنىڭ مۇشەسى, «يۋنچي» دۇنگەن ەتنومادەني ورتالىعى» قوعامدىق بىرلەستىگىنىڭ توراعاسى