ساۋد ارابياسى ءال-فارابي اتىنداعى قازاق ۇلتتىق ۋنيۆەرسيتەتىنەن عىلىمي-تەحنولوگيالىق القاپ قۇرۋ جوباسىن جۇزەگە اسىرۋعا قاتىسادى. بۇل جايىندا ۋنيۆەرسيتەت رەكتورى اكادەميك عالىم مۇتانوۆتىڭ ساۋد ارابياسى عىلىم جانە يننوۆاتسيا ءمينيسترىنىڭ ورىنباسارى ناسسەر مۇحاممەد ءال-اكيلمەن كەزدەسۋىندە كەلىسىم جاسالدى.
ساپار بارىسىندا ساۋد ارابياسىنىڭ عىلىم جانە يننوۆاتسيا ءمينيسترىنىڭ ورىنباسارى جەتەكشى وقۋ ورداسىنىڭ عىلىمي-ءبىلىم بەرۋ جانە يننوۆاتسيالىق قىزمەتىمەن تانىستى. ناسسەر مۇحاممەد ءال-اكيل ۋنيۆەرسيتەت ينفراقۇرىلىمىنىڭ اۋقىمدىلىعى مەن دامۋىن ەرەكشە اتاپ ءوتتى. ونىڭ پىكىرىنشە, ۋنيۆەرسيتەتتىڭ عىلىمي جوبالارى مەن ورتالىقتاندىرىلعان زەرتحانالارى, اسىرەسە, جوعارى تەحنولوگيالار سالاسىندا زاماناۋي تالاپتارعا ساي جانە كاسىبي بىلىكتىلىكتى ارتتىرۋعا بارىنشا وڭتايلى.
سونداي-اق بىرەگەي تەحنوپاركى پەن سۋپەركومپيۋتەرلىك بازاسى جاساقتالعان زاماناۋي حالىقارالىق ءال-فارابي عىلىمي-تەحنولوگيالىق القابىن قۇرۋ جوباسى شەتەلدىك قوناقتىڭ قىزىعۋشىلىعىن تۋدىردى. قۇرىلاتىن ورتالىق IT-كلاستەر يادروسى بار ءارى جاڭا تەحنولوگيالار مەن يننوۆاتسيالاردى دامىتۋ سالاسىندا الەم ۋنيۆەرسيتەتتەرىنىڭ ىنتىماقتاستىعىنىڭ جاڭا پلاتفورماسىنا اينالماق. ءمينيستردىڭ ورىنباسارى ونى جۇزەگە اسىرۋعا ساۋد ارابياسىنىڭ ۋنيۆەرسيتەتتەرىن, سونداي-اق عىلىمي-تەحنولوگيالىق القاپ ينفراقۇرىلىمىن دامىتۋ مەن زەرتتەۋ جوبالارىن قارجىلاندىرۋ ءۇشىن ينۆەستورلار تارتۋعا دايىن ەكەندىكتەرىن مالىمدەدى.
ەكىجاقتى مۇددەلىلىكتى ەسكەرە وتىرىپ, تاراپتار كوللابوراتسيا باعىتتارىن تىڭعىلىقتى تالقىلاۋ ءۇشىن قازۇۋ جانە ساۋديا كورولدىگى ۋنيۆەرسيتەتىنىڭ ماماندارى مەن عالىمدارىنان جۇمىس توبىن قۇردى. جاقىن ارادا عارىشتىق تەحنولوگيالار, IT جانە بيوتەحنولوگيا, حيميا جانە فيزيكا, نانوتەحنولوگيالار جانە وزگە دە سالالارداعى جوبالاردى ىسكە اسىرۋ بويىنشا بىرلەسكەن زەرتتەۋ ورتالىقتارىن قۇرۋ جوسپارى بەلگىلەندى.
مەملەكەت باسشىسىنىڭ ايرىقشا قولداۋىنا يە بولعان ءال-فارابي عىلىمي-تەحنولوگيالىق القابىنىڭ جوباسى عىلىمي ازىرلەمەلەردى كوممەرتسيالاندىرۋعا جانە ولاردى ەكونوميكانىڭ ناقتى سەكتورىنا ەنگىزۋگە باعىتتالعان ۇلتتىق يننوۆاتسيالىق جۇيەنىڭ بىرەگەي ءوسۋ نۇكتەسى بولماق.
الماتى