قالالىق تىلدەردى دامىتۋ جانە ارحيۆ ءىسى باسقارماسى, «رۋحانيات» كوممۋنالدىق مەملەكەتتىك مەكەمەسىنىڭ ۇيىمداستىرۋمەن ەلوردانىڭ بارلىق اۋداندارىندا مەملەكەتتىك ءتىلدى تەگىن ۇيرەتەتىن كۋرس جۇمىسى باستالدى. بۇل تۋرالى قالا اكىمدىگىنىڭ رەسمي سايتى حابارلادى.
كۋرس بارىسىندا ەلوردالىقتارعا مەملەكەتتىك ءتىلدى وقىتۋمەن قاتار, لاتىن گرافيكاسىنا ۇيرەتۋ كوزدەلگەن.
«وتكەن جىلى 1500-گە تارتا قالا تۇرعىنىن بەس دەڭگەي بويىنشا قازاق تىلىنە ۇيرەتتىك. ولاردىڭ ىڭعايلارىنا قاراي ەلوردانىڭ 4 اۋدانىندا وقۋ كابينەتتەرى جۇمىس ىستەدى. كۋرس اپتاسىنا ءۇش رەتتەن جىل سوڭىنا دەيىن جالعاستى. ال لاتىن گرافيكاسىنا 854 قىزمەتكەر سۇرانىس ءبىلدىرىپ, ولاردى تولىعىمەن قامتاماسىز ەتتىك. ولاردىڭ اراسىندا مەملەكەتتىك قىزمەتكەرلەر, قورعانىس سالاسىنىڭ ماماندارى, باق وكىلدەرى بار. بيىل دا وسى جۇمىستاردى جۇيەلى تۇردە اتقاراتىن بولامىز. قوسىمشا اقپاراتتاردى «رۋحانيات» مەكەمەسىنىڭ الەۋمەتتىك جەلىلەرىنەن كورە الاسىزدار», - دەدى تىلدەردى وقىتۋ جانە ادىستەمەلىك جۇمىستار جونىندەگى ءبولىمنىڭ باسشىسى گۇلنارا كاماشەۆا.
ءتىل كۋرستارىن ۇيىمداستىرۋ «قازاقستان رەسپۋبليكاسىنىڭ ءتىل تۋرالى» زاڭى جانە قازاقستان رەسپۋبليكاسىنداعى ءتىل ساياساتىن ىسكە اسىرۋدىڭ 2020-2025 جىلدارعا ارنالعان مەملەكەتتىك باعدارلاماسى نەگىزىندە جۇزەگە اسىپ جاتىر.
قالا تۇرعىندارى تومەندە كورسەتىلگەن مەكەنجايلار بويىنشا قازاق ءتىلى كۋرسىنا جازىلا الادى:
الماتى, ەسىل اۋداندارىنىڭ تۇرعىندارىنا – قوشقارباەۆ داڭعىلى, 50 جانە قابانباي باتىر داڭع., 8 (213-وقۋ كابينەتى),
الماتى جانە بايقوڭىر اۋداندارى – م.عابدۋللين ك-ءسى., 5, 3-قابات (304-وقۋ كابينەتى);
سارىارقا, بايقوڭىر اۋداندارى – رەسپۋبليكا داڭع., 42, 3-قابات (7-وقۋ كابينەتى).