مەملەكەت باسشىسى قاسىم-جومارت توقاەۆ ەلىمىزدىڭ بەلسەندى جاستارىنىڭ ۇسىنىسىمەن بيىلعى جىلدى «ەرىكتىلەر جىلى» دەپ جاريالادى. بۇل ەڭ الدىمەن ەل جاستارىنا ەرەكشە سەرپىن بەرىپ, مەملەكەت تاراپىنان جاس ۇرپاقتى قولداۋعا باعىتتالعان ماڭىزدى قادام بولدى. وسى يگى باستاماعا ءۇن قوسىپ, شەتەلدىك ارىپتەستەرمەن ۆولونتەرلىك قىزمەت سالاسىندا تاجىريبە الماسۋدى كوزدەگەن قازاق ۇلتتىق اگرارلىق ۋنيۆەرسيتەتىندە «پاراساتتىلىق – ىزگىلىكتىڭ بەلگىسى» اتتى حالىقارالىق جاستار فورۋمى ءوتىپ, وقۋ وشاعىنىڭ قابىرعاسىنان «ەرىكتىلەر ورتالىعى» اشىلدى.
ۆولونتەرلىك – ءوز ەركىڭمەن, شىنايى جۇرەك قالاۋىمەن اتقارىلاتىن جۇمىس. بۇل – ادامگەرشىلىك پەن پاراساتتىلىقتىڭ ايقىن كورىنىسى. بۇگىندە الەم بويىنشا ءجۇز ميلليوننان استام ادام وسىناۋ يگى ىسپەن اينالىسادى. ەلىمىزدە 580-نەن استام ۆولونتەرلىك ۇيىمدار ءىرى قالالار مەن اۋىلداردا بەلسەندى جۇمىس اتقارۋدا.
«ەرىكتىلەر جىلى» مەن ىرگەلى وقۋ ورداسىنىڭ 90 جىلدىق مەرەيتويىنا ورايلاستىرىلعان فورۋمعا وڭتۇستىك كورەيا, فرانتسيا, رەسەي, وزبەكستان, قىرعىزستان ەلدەرىنىڭ ارنايى دەلەگاتتارى, قازاقستانداعى شەتەلدىك كونسۋلدىقتار مەن ەلشىلىك قىزمەتكەرلەرى, مەملەكەتتىك قىزمەت ىستەرى جانە سىبايلاس جەمقورلىققا قارسى ىس-قيمىل اگەنتتىگىنىڭ وكىلدەرى, «Nur Otan» پارتياسى جانە «Jas Otan» جاستار قاناتىنىڭ بەلسەندىلەرى, رەسپۋبليكالىق «Sanaly urpaq» جوبالىق كەڭسەسىنىڭ, سونداي-اق «ىزگىلىك ەلشىسى» جوباسىنىڭ ۇيلەستىرۋشىلەرى جانە باسقا دا قوناقتار قاتىستى.
فورۋم جۇمىسىن اشقان قازۇاۋ رەكتورى تىلەكتەس ەسپولوۆ: «جۇمىلا كوتەرگەن جۇك جەڭىل» دەگەن ۇستانىمدى تۋ ەتكەن اتا-بابالارىمىز ء«بىر جاعادان باس, ءبىر جەڭنەن قول شىعارىپ», ءبىر-بىرىنە كومەكتەسىپ, اسار جاساپ, ءبىر وتباسىنىڭ ەمەس, تۇتاس ءبىر اۋىلدىڭ ەڭسەسىن كوتەرىپ تاستايتىن. بۇگىنگى ۆولونتەرلىك قىزمەتتىڭ قاعيداسى دا وسىنداي ىزگى نيەتتەردەن باستاۋ الادى», – دەگەن وي-تۇجىرىمىمەن ءبولىستى.
ۋنيۆەرسيتەت باسشىسى, تىلگە تيەك ەتكەندەي اتالعان باسقوسۋدىڭ ماقساتى – جاستاردىڭ بويىندا پاراساتتىلىق, ادالدىق مادەنيەتىن قالىپتاستىرۋ, ولاردى ىزگىلىككە, ادامگەرشىلىككە, باۋىرمالدىلىققا باۋلۋ.
ستۋدەنتتەردى ىنتىماقتاسا وتىرىپ, ىزگىلىك جاساۋعا ۇيىستىراتىن سۋ جاڭا «ەرىكتىلەر ورتالىعى» ناقتى جوسپار بويىنشا جۇمىس جاساماق. اتاپ ايتقاندا, ورتالىق قىزمەتى ارقىلى جاستار پرەزيدەنت انىقتاعان «ەرىكتىلەر جىلىنىڭ» «ساباقتاستىق», «ساۋلىق», «تازا الەم», «اسىل مۇرا», «قامقور», ء«بىلىم», ء«ۇمىت» دەپ اتالاتىن 7 باعىتى بويىنشا ۆولونتەرلىق ءىس جوسپارلارىن جۇزەگە اسىراتىن بولادى. سونىمەن قاتار وسى ورتالىقتا بىلىكتى, تاجىريبەلى مامانداردى تارتۋ ارقىلى جاستاردى ۆولونتەرلىق قىزمەت بويىنشا وقىتىپ, دايىندايتىن, ولارعا باعىت-باعدار بەرەتىن ارنايى شتاب قۇرىلادى. وندا جاستار وزدەرى قوعامداعى الەۋمەتتىك ماسەلەلەردى تالداپ, كىمگە قانداي كومەك كەرەك ەكەنىن انىقتاپ, ناقتى شەشىمدەر قابىلدايدى.
فورۋم جۇمىسى اياسىندا وڭتۇستىك كورەيالىق IMEI حالىقارالىق مەنتالدى-اعارتۋشىلىق ورتالىعىنىڭ باسشىسى, پروفەسسور دجو گيۋ يۋن باستاعان عالىمدار جاستارعا ۆولونتەرلىقتى دامىتۋعا بايلانىستى ارنايى سەمينار-ترەنينگ وتكىزدى. ەركىن پىكىر الماسۋ فورماتىندا وتكەن باسقوسۋدا قازۇاۋ ءبىلىم الۋشىلارىنىڭ ۆولونتەرلىك باعىتتا اتقارعان قايىرىمدى ءىس-شارالارى تۋرالى بەينەروليك پەن شاكىرتتەردىڭ وزدەرى دايىنداعان ىزگىلىككە ۇندەيتىن مۋلتفيلم كورسەتىلىپ, وقۋ ورنىنداعى ستۋدەنتتەر ۇيىندە تۇراتىن جاستارمەن ونلاين بايلانىس ورناتىلدى.
فورۋمدا ءسوز سويلەگەن ەرىكتى جاستار بۇل باستامالارىن رەسپۋبليكامىزدىڭ باسقا دا جوعارى وقۋ ورىندارىنا جولداپ, «ەرىكتىلەر جىلىندا» يگى ىستەردى بىرلەسە اتقارۋعا شاقىردى.