بۇل تۋرالى تابيعي مونوپوليالاردى رەتتەۋ كوميتەتىنىڭ شىمكەنت قالاسى بويىنشا دەپارتامەنتى, ەنەرگەتيكا جانە كوممۋنالدى شارۋاشىلىق باسقارماسىنىڭ وكىلدەرى مالىمدەدى.
قالالىق اكىمدىكتىڭ اقپاراتتىق-كوممۋنيكاتسيا ورتالىعىندا وتكەن بريفينگكە دەپارتامەنت باسشىسىنىڭ مىندەتىن اتقارۋشى ءساليما بوپوۆا, تابيعي مونوپوليالاردى جانە باعالاردى رەتتەۋ ءبولىمىنىڭ باسشىسى ايگۇل شولپانوۆا, قالالىق ەنەرگەتيكا جانە كوممۋنالدى شارۋاشىلىق باسقارماسى باسشىسىنىڭ ورىنباسارى نۇرلان جامانكوز 2020 جىلعا ارنالعان كوممۋنالدى قىزمەتتەردىڭ تاريفتەرى بويىنشا قىسقاشا ايتىپ ءوتتى.
«2020 جىلدىڭ 1 قاڭتارىنان كوممۋنالدى قىزمەتتەر تاريفتەرىنىڭ ءوسۋى جوسپارلانعان ەدى. بىراق دەپارتامەنت شىمكەنت قالاسى اكىمدىگىمەن جانە تابيعي مونوپوليالار سۋبەكتىلەرىمەن بىرگە تۇرعىندار ءۇشىن تاريفتەر ءوسىمىن تەجەۋ بويىنشا اۋقىمدى جۇمىستار اتقاردى. تابيعي مونوپوليا سۋبەكتىلەرى تۇرعىندار ءۇشىن تاريفتەردى تومەندەتۋگە جانە 2019 جىلدىڭ دەڭگەيىندە قالدىرۋعا شەشىم قابىلدادى. 2020 جىلى تۇتىنۋشىلارمەن تاريفتەردىڭ كوتەرىلۋىنە جول بەرىلمەۋدىڭ ناتيجەسىندە 2,32 ملرد تەڭگەگە جۋىق قارجى ۇنەمدەلەدى», دەيدى دەپارتامەنت باسشىسىنىڭ مىندەتىن اتقارۋشى ءساليما بوپوۆا.
ياعني, 2020 جىلعا سۋمەن جابدىقتاۋ, سارقىندى سۋلاردى بۇرۋ, جىلۋمەن جابدىقتاۋ قىزمەتتەرىنىڭ تۇرعىندارعا ارنالعان تاريفتەرى وزگەرىسسىز, 2019 جىلدىڭ دەڭگەيىندە قالدىرىلىپ وتىر.
«2019 جىلى 585 ارىز-شاعىم تۇسكەن. 212 شاعىم بويىنشا 32 جوسپاردان تىس تەكسەرۋ جۇرگىزىلدى. 53 اكىمشىلىك ايىپپۇل سالىنىپ, 32 نۇسقاما بەرىلگەن», دەيدى اتالعان دەپارتامەنتتىڭ ءبولىم باسشىسى ايگۇل ماناپقىزى.
شىمكەنت