بۇل تۋرالى الماتى قالاسىنىڭ اكىمى ب. ساعىنتاەۆ «دۋمان» ىقشاماۋدانىنىڭ تۇرعىندارىمەن وتكەن كەزدەسۋدە مالىمدەدى. جيىندا مەدەۋ اۋدانىنىڭ اكىمى سۇلتانبەك ماكەجانوۆ اتقارىلعان جۇمىستار جايىندا ەسەپ بەردى.
شاھار باسشىسى باقىتجان ساعىنتاەۆ اۋدان اكىمدەرىنىڭ ەسەپتىك كەزدەسۋلەرىنە ىرىكتەپ قاتىسىپ كەلەدى. ءار اۋدان اكىمى اۋدان تۇرعىندارىمەن 5 رەت كەزدەسۋ وتكىزەدى. جيىندا سۇلتانبەك الماسبەك ۇلى اۋداننىڭ الەۋمەتتىك-ەكونوميكالىق دامۋى مەن شەشىلگەن ينفراقۇرىلىمدىق ماسەلەلەر تۋرالى باياندادى. وتكەن جىلى جالپى ۇزىندىعى 33 شاقىرىم بولاتىن 19 كوشەنىڭ سىرتقى جارىقتاندىرۋ جەلىسىنىڭ قۇرىلىسى اياقتالدى. 1084 جارىق نۇكتەلەرى ورناتىلدى. اعىمداعى جىلى 279 كوشەدە جانە 27 اۋلادا 6200 جارىق نۇكتەسىن ورناتۋ جوسپارلانۋدا. قالا اكىمىنىڭ تاپسىرماسى بويىنشا, وتكەن جىلى كەرەي-جانىبەك حاندارى كوشەسىندەگى تۇيىق كوشە تۇرعىندارىنىڭ ماسەلەسى شەشىلدى. كوشكىن سالدارىنان جەكە ۇيلەردىڭ قۇلاۋ قاۋپى بولعان ەدى. قازىرگى ۋاقىتتا بەتكەيدى نىعايتۋ جۇمىستارى اياقتالدى. جول جوندەلىپ, اباتتاندىرۋ جۇمىستارى جۇرگىزىلدى. وسىلايشا 120 ادامنىڭ ومىرى قاۋىپسىزدەندىرىلدى.
سونداي-اق بىرنەشە جىلدان بەرى كوكتەمگى جانە كۇزگى كەزەڭدەردە «تەرىسبۇلاق» وزەنىنىڭ بويىنداعى 50-دەن استام جەكە تۇرعىن ءۇيدى سۋ باسقان ەدى. بۇل ماسەلە وزەن ارناسىن تەرەڭدەتە وتىرىپ, قالپىنا كەلتىرۋ-نىعايتۋ جۇمىستارىنان كەيىن شەشىمىن تاپتى. بۇل 300-گە جۋىق تۇرعىننىڭ ومىرىنە قاۋىپ جوق دەگەن ءسوز. وتكەن جىلى 52 اۋلاعا كۇردەلى جوندەۋ جانە 30 اۋلاعا اعىمداعى جوندەۋ جۇمىستارى جۇرگىزىلدى. اعىمداعى جىلى تاعى 41 اۋلاعا كۇردەلى جانە اعىمداعى جوندەۋ جۇمىستارىن جۇرگىزۋ جوسپارلانۋدا. مەديتسينالىق قىزمەتتەردىڭ ساپاسى مەن قولجەتىمدىلىگىن قامتاماسىز ەتۋ ماڭىزى بولىپ تۇر. قالا اكىمىنىڭ تاپسىرماسى بويىنشا «تاۋ-سامال», «كەڭساي», «كولساي», «سۇلۋساي» ىقشاماۋداندارىندا 4 فەلدشەرلىك-اكۋشەرلىك پۋنكت اشىلدى. وسىلايشا 12 مىڭنان استام تۇرعىنعا مەديتسينالىق كومەكتىڭ قادامدىق قولجەتىمدىلىگى قامتاماسىز ەتىلدى. جالپى, قالا اكىمى ب. ساعىنتاەۆ اتاپ وتكەندەي, مەديتسينالىق مەكەمەلەردى جابدىقتارمەن جابدىقتاۋ ماسەلەسى وزەكتىلىگىن جويعان ەمەس. وتكەن جىلى جۇرگىزىلگەن اۋديت قالانىڭ ەمحانالارى مەن اۋرۋحانالارىنىڭ جابدىقتالۋى نەبارى 20%-دى قۇرايتىنىن كورسەتتى.
«سوندىقتان ءبىز قالانىڭ مەديتسينالىق مەكەمەلەرىن جاڭارتۋ مەن قاجەتتى جابدىقتارمەن جاراقتاندىرۋدىڭ ءۇش جىلدىق جوسپارىن ازىرلەدىك. وسىلايشا مەدمەكەمەلەردىڭ جابدىقتالۋىن 90%-عا جەتكىزبەكپىز. وسى جىلعا قاراجات ءبولىندى», – دەدى قالا اكىمى.
كەزدەسۋدى قورىتىندىلاي كەلە, ب. ساعىنتاەۆ تۇرعىنداردى اشىق اڭگىمەسى ءۇشىن العىس ءبىلدىرىپ, مۇنداي كەزدەسۋلەر اكىمدىكتەگىلەرگە تۇرعىنداردىڭ تالاپ-تىلەگىن جاقىنىراق بىلۋگە مۇمكىندىك بەرەتىنىن ايتتى.
«شاعىن ۋچاسكەلەردەگى مۇنداي كەزدەسۋلەر ءار اۋداندا وتۋدە. تۇرعىنداردىڭ بەلسەندىلىگى جەرگىلىكتى سيپاتتاعى پروبلەمالاردى جەدەل شەشۋگە, سونداي-اق قىسقا مەرزىمدى جانە ورتا مەرزىمدى دامۋ جوسپارلارىنا تۇزەتۋ ەنگىزۋگە سەپتىگىن تيگىزەدى», – دەپ اتاپ ءوتتى شاھار باسشىسى باقىتجان ساعىنتاەۆ.