كەڭەسكە مەملەكەتتىك, قۇقىق قورعاۋ جانە اسكەري ورگانداردىڭ باسشىلارى, سۋديالار كورپۋسىنىڭ وكىلدەرى, ءماسليحات دەپۋتاتتارى, جوعارى وقۋ ورىندارىنىڭ رەكتورلارى, مەديتسينا مەكەمەلەرىنىڭ باسشىلارى, مەكتەپ پەن كوللەدج ديرەكتورلارى قاتىستى.
كەڭەستى اشقان باقىتجان ساعىنتاەۆ مەملەكەت باسشىسى سىبايلاس جەمقورلىققا قارسى كۇرەستى مەملەكەتتىك ساياساتتىڭ باسىم باعىتى رەتىندە بەلگىلەگەنىن اتاپ ءوتتى.
العاش رەت زاڭ دەڭگەيىندە باسشىلاردىڭ سىبايلاس جەمقورلىقتا قۇقىق بۇزۋشىلىقتارى ءۇشىن دەربەس جاۋاپكەرشىلىك بەكىتىلدى. سونداي-اق باسشىنىڭ ۇجىمدا سىبايلاس جەمقورلىقتىڭ الدىن الۋ بويىنشا ءوز مىندەتتەرىن جۇيەلى تۇردە ورىنداماعانى ءۇشىن جانە سىبايلاس جەمقورلىقتىڭ الدىن الۋ بويىنشا شارالار قولدانباعانى ءۇشىن جاۋاپكەرشىلىك ەنگىزىلگەن.
ء«بىزدىڭ ماقساتىمىز — قوعام, بيزنەس جانە تۇتاستاي العاندا ادامداردىڭ ءومىرى سىبايلاس جەمقورلىقتان ادا بولۋىنا جاعداي جاساۋ» دەدى قالا اكىمى باقىتجان ساعىنتاەۆ.
قالاداعى سىبايلاس جەمقورلىقتىڭ قازىرگى احۋالى تۋرالى بايانداعان الماتى قالالىق جەمقورلىققا قارسى قىزمەتتىڭ باسشىسى قايرات سۇنتاەۆ:ء«بىز بۇرىنعىداي ادىلدىك پەن زاڭدىلىقتى العا قويىپ, ءاربىر سىبايلاس جەمقورلىق فاكتىسىنە ءپرينتسيپتى جانە ىمىراسىز قارايتىن بولامىز» دەپ اتاپ ءوتتى.
كەڭەس بارىسىندا قالا اكىمى مەملەكەتتىك ورگانداردىڭ باسشىلارىنا سىبايلاس جەمقورلىققا قارسى ءىس-قيمىل سالاسىنداعى جۇمىستى كۇشەيتۋدى, «الماتى — ادالدىق الاڭى» جوباسىن جانداندىرۋ جانە حالىققا قۇقىقتىق كومەك كورسەتەتىن «مەيىرىمدىلىك اكسەلەراتورى» قوعامدىق قوزعالىسىن قولداۋ بويىنشا بىرقاتار تاپسىرمالار بەردى.