ومىردە قيىن جاعدايعا تاپ بولعان جاندارعا تەگىن قۇقىقتىق كەڭەس بەرۋگە باعىتتالعان «Qorgau» اكتسياسى بيىل دا جالعاسادى. بۇل تۋرالى ورتالىق كوممۋنيكاتسيا قىزمەتىندە بولعان بريفينگتە جوبا جەتەكشىسى, «Eurasian Expert Council» قورىنىڭ پرەزيدەنتى شىڭعىس لەپسىباەۆ مالىمدەدى.
قوعامنىڭ زاڭگەر كەڭەسىنە جۇگىنۋگە قارجىلاي مۇمكىندىگى جوق ءالسىز توپتارىنا ارنالعان جوبا العاش بىلتىر تامىز ايىنان باستاپ جۇزەگە اسا باستاعان. سول ۋاقىت ارالىعىندا زاڭگەرلەر 20 مىڭنان استام تۇرعىننىڭ ماسەلەسىن شەشۋگە كومەكتەسكەن. ۇيىمداستىرۋشىلاردىڭ ايتۋىنشا, جوبا ءىرى قالا ورتالىقتارىنان گورى, وبلىستار مەن اۋدان تۇرعىندارىنا باعىتتالعان. سەبەبى نۇر-سۇلتان, الماتى سەكىلدى ورتالىق قالالاردا تۇراتىن ادامدار كەڭەس الۋعا مەملەكەتتىك نە جەرگىلىكتى باسقارۋ ورگانداردىڭ قابىلداۋىنا جازىلا الادى, ال ينتەرنەتى جوق اۋىلدىق جەرلەردىڭ تۇرعىندارىندا مۇنداي مۇمكىندىك جوق. قۇقىقتىق كەڭەس بەرەتىن زاڭگەرلەر ەرىكتى نەگىزدە جۇمىس ىستەيدى, قىزمەتتەرى ءۇشىن قوردان نەمەسە جوبا ۇيىمداستىرۋشىلارىنان قاراجات المايدى. ۇيىمداستىرۋشىلار ۆولونتەرلەر جىلىندا جۇزەگە اسىپ جاتقان بۇل جوبانىڭ قازاقستان تۇرعىندارىنىڭ قۇقىقتىق ءبىلىمىنىڭ ارتۋىنا, زاڭ ماسەلەلەرىنە كەلگەندە ساۋاتتى بولۋعا كومەكتەسەتىنىنە سەنىمدى.
«قازاقستاننىڭ اقپارات جانە قوعامدىق دامۋ مينيسترلىگى, جاستار جانە وتباسى ىستەرى كوميتەتى مەن «Eurasian Expert Council» قورى 2019 جىلى باستالعان يگى جوبانى ءارى قاراي جالعاستىرۋ تۋرالى شەشىم قابىلدادى. «Qorgau» اكتسياسى ارقىلى تۇرعىندارىمىز ناقتى كومەك الىپ, جوبانىڭ يگىلىگىن كورىپ جاتسا ءبىز الداعى جىلدارى دا جوبانى جۇزەگە اسىرۋعا تىرىسامىز», دەيدى جاستار جانە وتباسى ىستەرى كوميتەتى توراعاسى ماديار كوجاحمەت.
قازاقستاننىڭ بارلىق وبلىس جانە اۋدان ورتالىقتارىندا مەملەكەتتىك گرانت كومەگىمەن 210 كەڭسە اشىلعان. وندا تۇرعىندارعا كومەكتى كەمىندە 3 جىلدىق تاجىريبەسى بار بىلىكتى ماماندار كورسەتەدى. تەگىن قۇقىقتىق كەڭەس بەرۋگە ادۆوكاتتار القاسى نەمەسە زاڭگەرلەر پالاتاسىنىڭ مۇشەلەرى كەلىسكەن. زاڭگەرلەر وزدەرىنىڭ باستى قىزمەتىمەن قاتار, وسىنداي ەرىكتى جۇمىسپەن دە اينالىساتىن كورىنەدى. جوبانىڭ باستى سەرىكتەستەرىنىڭ ءبىرى Adilzanger زاڭ كەڭەسشىلەرى پالاتاسىنىڭ اتقارۋشى ديرەكتورى جىبەك حاميتوۆانىڭ ايتۋىنشا, قازاقستاننىڭ بارلىق وڭىرلەرىنەن 300-دەن استام زاڭگەر پالاتا مۇشەسى. ولار تۇرعىندارعا كەڭەس بەرۋمەن قاتار, سوتتا مۇددەسىن قورعاۋعا دايىن. جوبا بويىنشا كەلىپ تۇسكەن ءوتىنىشتىڭ كوبىسى ازاماتتىق ىستەر ەكەن, كوپ جاعدايدا ادامدار مەملەكەتتەن الاتىن قارجىلاي كومەك, اجىراسۋ نەمەسە جالاقىعا قاتىستى ماسەلەلەرگە شاعىمدانادى. مىسالعا, اتىراۋ وبلىسىنىڭ اۋداندارىنىڭ بىرىندە اتاۋلى الەۋمەتتىك كومەكتى دۇرىس ەسەپتەمەگەنى تۋرالى بىرنەشە كوپ بالالى انادان ءوتىنىش كەلگەن. زاڭگەرلەردىڭ قايتا ەسەپتەۋ تۋرالى ۇسىنىستارىنا اۋداندا جاۋاپ بولماعان سوڭ, ولار ماسەلەنى وبلىستىق دەڭگەيدە شەشۋگە تىرىسقان. ناتيجەسىندە, ااك مولشەرى قايتا ەسەپتەلىپ, ءتيىستى قاراجاتتى الا الماي كەلگەن تۇرعىندار وڭ ناتيجەگە قول جەتكىزگەن. بۇل كەلىپ تۇسكەن 20 مىڭ ءوتىنىشتىڭ بىرەۋى عانا, وسى سەكىلدى 18 مىڭ ءىس وڭ شەشىلگەن.
سونداي-اق ۇيىمداستىرۋشىلار جاعدايعا بايلانىستى رەسپۋبليكا بويىنشا قۇقىق قورعاۋ قىزمەتىمەن اينالىساتىن 70-تەن استام قوعامدىق ۇيىممەن جۇمىس ىستەيدى. ودان بولەك زاڭگەرلەردى دايىندايتىن 175 وقۋ ورنىمەن كەلىسىپ, 407 جوعارى كۋرس ستۋدەنتتەرىن تاعىلىمدامادان وتكىزگەن. جوبا جەتەكشىسى شىڭعىس لەپسىباەۆ بۇل تاجىريبە بولاشاق ماماندار ءۇشىن بىلىكتىگىن ارتتىرۋدا تاپتىرماس مۇمكىندىك ەكەنىن ايتادى.
قۇقىقتىق كەڭەس كەڭسەلەردە بەتپە-بەت قانا ەمەس, تەلەفون ارقىلى نەمەسە ونلاين جۇرە بەرەدى, تەك ءوتىنىش ءبىلدىرۋشى وزىنە ىڭعايلى ءادىسىن تاڭداسا بولدى. جوبانىڭ باسى-قاسىندا جۇرگەندەر كوپ تۇرعىنداردىڭ قۇقىقتىق ماسەلەگە كەلگەندە ءبىلىمىنىڭ ازدىعى سونشا, ماسەلەسىن تەلەفون ارقىلى بايانداپ بەرە المايتىنىن ايتادى. بۇل حالىقتىڭ قۇقىق سالاسىندا ءبىلىم دەڭگەيىنىڭ تومەندىگىن كورسەتسە كەرەك. قايتا جالعاسقان جوباعا كوپ بالالى وتباسىلار, مۇمكىندىگى شەكتەۋلى جاندار, تۇرمىستىق زورلىق-زومبىلىق قۇرباندارى, زەينەتكەرلەر, ميگرانتتار مەن ازاماتتىعى جوق ادامدار, جۇمىسشىلار, جۋرناليستەر ءتۇرلى ساۋالدارى بويىنشا جۇگىنە الادى.