«STOP وبنال» جەدەل الدىن الۋ شاراسى بارىسىندا شىعىس قازاقستان مەن پاۆلودار وبلىستارىندا جالعان قۇجات جاساۋمەن اينالىسقان قىلمىستىق توپتىڭ جولى كەسىلدى. بۇل تۋرالى شقو بويىنشا ەكونوميكالىق تەرگەۋ دەپارتامەنتىنىڭ ءباسپاسوز قىزمەتى حابارلادى.
ەكونوميكالىق تەرگەۋ دەپارتامەنتىنىڭ مالىمەتتەرىنە سۇيەنسەك, ۇيىمداسقان قىلمىستىق توپ مۇشەلەرى ورىندالماعان جۇمىس پەن جەتكىزىلمەگەن تاۋارلارعا شوت-فاكتۋرا جازۋمەن اينالىسقان.
«ولار 2018-2020 جىلدار ارالىعىندا شىعىس قازاقستان مەن پاۆلودار وبلىستارىنىڭ اۋماعىندا توعىز مەكەمە قۇرىپ, زاڭسىز ارەكەتتەرىن ىسكە اسىرعان. قىلمىستىق توپتىڭ جالپى اينالىمى 4 ميلليارد تەڭگەدەن اسادى. قازىر بۇل توپتىڭ مۇشەلەرى قاماۋعا الىندى. قۇجاتتار, مورلەر, چەك كىتاپشالارى جانە 9 ميلليون تەڭگە تاركىلەندى. تەرگەۋ امالدارى جالعاسىپ جاتىر» دەپ حابارلادى دەپارتامەنت ماماندارى.