سىرتقى ىستەر ءمينيسترىنىڭ ورىنباسارى مارعۇلان بايمۇحان گەرمانيا ۇكىمەتىنىڭ رەسەيمەن, ورتالىق ازيامەن جانە «شىعىس سەرىكتەستىگى» ەلدەرىمەن ىنتىماقتاستىق جونىندەگى ۇيلەستىرۋشىسى, گەرمانيا بۋندەستاگىنىڭ دەپۋتاتى ديرك ۆيزەمەن كەلىسسوزدەر وتكىزدى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
تاراپتار 2019 جىلعى 5 جەلتوقساندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ گەرمانيا كانتسلەرى انگەلا مەركەلمەن كەزدەسۋى بارىسىندا قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن, سونداي-اق وڭىرارالىق دەڭگەيدەگى ىنتىماقتاستىق پەرسپەكتيۆالارىن تالقىلادى. قازاقستان مەن گەرمانيا اراسىنداعى ساۋدا-ساتتىق جانە ينۆەستيتسيالىق ىنتىماقتاستىقتى كەڭەيتۋگە ءوزارا دايىن ەكەندىگى اتاپ ءوتىلدى.
م.بايمۇحان مەملەكەت باسشىسىنىڭ العاشقى ەۋروپالىق ساپارى جالپى قۇنى 2,4 ملرد اقش دوللارىن قۇرايتىن كوممەرتسيالىق كەلىسىمدەر جاساۋعا مۇمكىندىك بەرگەنىن اتاپ ءوتتى. قازاقستاندىق ديپلومات نەمىس تاراپىن ەو مەملەكەتتەرى دەڭگەيىندە قازاقستانعا ۆيزالىق رەجيمدى جەڭىلدەتۋ ماسەلەسىن قولداۋعا شاقىرىپ, بۇل ەكونوميكالىق, ءبىلىم بەرۋ جانە مادەني سالالارداعى ەكىجاقتى قارىم-قاتىناستاردى ودان ءارى جانداندىرا تۇسۋگە ءوزارا ىقپال ەتەتىنىن اتاپ ءوتتى.
ءوز كەزەگىندە د.ۆيزە پرەزيدەنت ق.توقاەۆتىڭ رەسمي ساپارى قازاقستاندىق-نەمىس ارىپتەستىگىن تەرەڭدەتۋگە ءوزارا قىزىعۋشىلىقتىڭ بار ەكەنىن كورسەتكەنىن حابارلادى. نەمىس ديپلوماتى ء«بىز قازىرگى تاڭدا قازاقستاندا ىسكە اسىپ جاتقان رەفورمالاردى قولدايمىز جانە ولاردى جۇزەگە اسىرۋعا قولعابىس جاساۋعى دايىنبىز» دەدى.
تالقىلاۋ بارىسىندا ەكىجاقتى قاتىناستارداعى ماڭىزدى سۇراقتاردىڭ اراسىندا گۋمانيتارلىق ماسەلەلەر دە بولدى. تاراپتار ەكى ەل اراسىنداعى «دوستىق كوپىرى» بولىپ تابىلاتىن قازاقستانداعى نەمىس دياسپوراسى جانە گفر-داعى بۇرىنعى قازاقستاندىقتاردىڭ ۇلكەن قاۋىمى بولۋىنا وراي قازاقستاندىق-نەمىس ارىپتەستىگى اسا ماڭىزعا يە ەكەندىگىن راستادى. ەكى ەلدىڭ ۇكىمەتتەرى ءوز ازاماتتارىنا مۇمكىندىگىنشە قولايلى جاعداي جاساۋ بويىنشا جۇمىستار جاساۋدا.
تاراپتار كوپقىرلى ارىپتەستىكتى دامىتۋدى جالعاستىرۋ ماقساتىندا قالىپتاسقان بايلانىستار ديناميكاسىن ىلگەرى جىلجىتۋعا كەلىستى.