ب.ماكەن جەمقورلىققا قاتىستى كەزدەسۋ وتكىزدى

جيىن مودەراتورى بولعان باقتيار ماكەن ءوز سوزىندە ءبىلىم بەرۋ سالاسىنداعى سىبايلاس جەمقورلىققا قارسى ءىس-قيمىل, ونى الدىن الۋ بويىنشا قابىلدانىپ جاتقان شارالار تۋرالى ايتىپ بەردى.

«سىبايلاس جەمقورلىققا قارسى كۇرەسكە باعىتتالعان جۇيەلى جۇمىستىڭ ناتيجەسىندە ەلوردادا ونىڭ دەڭگەيىنىڭ تومەندەۋى بايقالادى. بۇل بارلىق سالالارعا قاتىستى. بۇل باعىتتا قالالىق سىبايلاس جەمقورلىققا قارسى كۇرەس دەپارتامەنتى ۇلكەن ءرول اتقارادى. سونىمەن قاتار جاڭا زاڭ كۇشىنە ەندى» دەدى قالا اكىمىنىڭ ورىنباسارى باحتيار ماكەن.

سونداي-اق اكىم ورىنباسارى سىبايلاس جەمقورلىققا كۇدىگىمەن ۇستالىپ, ارەكەتى دالەلدەنگەن جاعدايدا ول ازامات ءوز ىسىنە جاۋاپ بەرۋى كەرەكتىگىن ايتتى.

«سىبايلاس جەمقورلىقتىڭ الدىن الۋ بويىنشا ماڭىزدى جۇمىستاردىڭ ءبىرى – ءتۇسىندىرۋ جۇمىستارى. كەيبىر جاعدايدا بىردەن ايقايعا كوشپەي ءوزىنارا ءتۇسىندىرۋ شاراسىن ۇيىمداستىرعان ءجون. ءبىزدىڭ بۇگىنگى سىزدەردى جيناۋداعى ماقساتىمىز دا سول. سەبەبى دۇرىس تۇسىنىسپەۋشىلىكتىڭ ارتى كەيدە جاقسىلىققا اپارمايدى» دەدى ول.

ال سىبايلاس جەمقورلىققا قارسى قىزمەت دەپارتامەنتى باسشىسىنىڭ ءبىرىنشى ورىنباسارى جازيرا جىلقىشيەۆا مەملەكەت باسشىسىنىڭ قازاقستان رەسپۋبليكاسىنىڭ زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا قول قويعان جاڭاشىلدىقتار تۋرالى ايتىپ, اگەنتتىكتىڭ پاراساتتىلىق, ادىلدىك پەن ادالدىقتى قالىپتاستىرۋعا باعىتتالعان جۇمىسىنىڭ باسىم باعىتتارىن ءتۇسىندىردى.

بۇدان ءارى اقپاراتتىق-لەكتورلىق شتاب مۇشەلەرى ەربول ىرگەباي مەن ەرنار جۇماتاەۆ ءسوز سويلەدى.

سپيكەرلەر بەلگىلى قوعام قايراتكەرلەرى مەملەكەتتىك قىزمەتشىلەر, كۆازيمەملەكەتتىك سەكتور وكىلدەرى, ەڭبەك ۇجىمدارى مەن جالپى حالىق اراسىندا سىبايلاس جەمقورلىققا قارسى مادەنيەتتى قالىپتاستىرۋ بويىنشا جۇمىس جۇرگىزەتىن اقپاراتتىق-لەكتورلىق شتابتىڭ جۇمىسى تۋرالى باياندادى. 

سونداي-اق ولار قاتىسۋشىلاردى سىبايلاس جەمقورلىق كورىنىستەرىن قابىلداماۋعا, پاراساتتىلىق, ادالدىق, ادىلدىك پەن پاتريوتيزمگە تاربيەلەۋگە شاقىردى.