مامىرسۋ اۋىلىندا ارداگەرلەر بولمەسى اشىلدى

ءساۋىر ايىندا اۋدانىمىزعا اكىم بولىپ تاعايىندالعان دىلدابەك ورازباەۆ مامىر ايىندا مامىرسۋ اۋىلىنىڭ تۇرعىندارىمەن كەزدەسكەندە: «اۋىلدارىڭىزدا ارداگەرلەر باس قوسىپ وتىراتىن بولمە بار ما؟» دەگەن ساۋال قويدى. مۇنداي بولمە بىزدە جوق بولاتىن. ەكى كۇننەن كەيىن اۋدان اكىمىنىڭ وكىمىمەن اۋىل اكىمشىلىگى عيماراتى ىشىنەن بىزگە ۇلكەن بولمە بەرىلىپ, ونى جابدىقتاۋ جۇمىستارىن باستاپ كەتتىك. بولمەگە مامىرسۋ اۋىلىنىڭ ىرگەتاسىن قالاعان, اشارشىلىقتى دا, سوعىستى دا كورگەن, تىلدا دا ايانباي ەڭبەك ەتكەن ارداگەرلەردىڭ سۋرەتتەرىن قويساق دەگەن شەشىمگە كەلدىك. بۇل جۇمىستى اۋىلداعى ارداگەرلەر كەڭەسىنىڭ توراعاسى قولعا السا دەگەن ۇسىنىس ايتىلدى. سول كۇننەن باستاپ اۋىلىمىزدىڭ ارداگەرلەرىنىڭ سۋرەتتەرىن جيناقتاي باستادىق. وسى جۇمىستىڭ وزىنە جەتى ايداي ۋاقىت كەتتى. سودان نە كەرەك, 25 قاراشادا ارداگەرلەر بولمەسى سالتاناتتى تۇردە اشىلدى.

بولمەنى وزىمىزشە ءۇش بولىمگە ءبولىپ, اۋەلى اۋىلىمىزدىڭ ەكىنشى دۇنيەجۇزىلىك سوعىسقا قاتىسقان جانە اۋعان سوعىسىنا بارىپ, ورالماعان ازاماتتاردىڭ سۋرەتتەرىن ىلدىك. «ەر ەڭبەگى - ەل ەسىندە» دەپ اتالعان ەكىنشى بولىمدە سوۆحوز كەزىندە ەڭبەگىمەن ەل قۇرمەتىنە بولەنگەن اعا بۋىن وكىلدەرىنىڭ, سوۆحوز, مەكتەپ باسقارعان ازاماتتاردىڭ سۋرەتتەرى ورنالاستىرىلدى. «الىپ انادان تۋادى» اتتى بولىمدە باتىر انا, التىن القا, كۇمىس القا يەگەرلەرى اتانعان ارداقتى انالاردىڭ سۋرەتتەرى توردەن ورىن الدى. جالپى, ارداگەرلەر بولمەسىنە 500-دەن استام سۋرەتتەر ءىلىندى. شاعىن ارداگەرلەر بولمەسىن وتكەننەن ۇلكەن سىر شەرتەتىن, جاستارعا تاربيەلىك ءمانى بار تاريحي مۋزەي دەسە دە بولادى. ارداگەرلەر بولمەسىنىڭ اشىلۋىنا مۇرىندىق بولعان اۋدان اكىمى د.ورازباەۆقا, وسى ءىستىڭ باسى-قاسىندا جۇرگەن اۋىل اكىمى ا.يبرايشينگە, قول ۇشىن بەرگەن اۋىل ازاماتتارىنا العىسىمىز شەكسىز.

                                                         ورىنبەك تۇرىسبەك ۇلى,

مامىرسۋ اۋىلدىق ارداگەرلەر كەڭەسىنىڭ توراعاسى

شىعىس قازاقستان وبلىسى, 

اياگوز اۋدانى