كەنشىلەر استاناسىندا ارىس قالاسىندا بولعان الاپات جارىلىستىڭ زارداپتارىن جويۋعا بەلسەندى ات سالىسقان ءبىر توپ قاراعاندىلىققا پرەزيدەنت اتىنان العىس حاتتار مەن مەدالدار تابىس ەتىلدى.
سالتاناتتى شارا بارىسىندا مەملەكەتتىك جانە قوعامدىق قىزمەتتەگى ەڭبەگى ءۇشىن ماراپاتتالعانداردى قۇتتىقتاعان وبلىس باسشىسى جەڭىس قاسىمبەك ارىس قالاسىن قالپىنا كەلتىرۋ ىسىنە قاراعاندىلىقتاردىڭ دا قوماقتى ۇلەس قوسقانىن اتاپ ءوتتى.
– گۋمانيتارلىق كومەكتەن باسقا, ءبىز زارداپ شەككەن تۇرعىن ۇيلەردى قالپىنا كەلتىرۋ بويىنشا دا قىرۋار شارۋالاردى اتقاردىق. بارلىق جۇمىستار بەلگىلەنگەن مەرزىمىنەن بۇرىن اياقتالدى. ەڭ باستىسى, تۇرعىندار ءدان ريزا بولدى. ەل پرەزيدەنتىنىڭ جەرلەستەرىمىزدى ەڭبەكقورلىعى مەن جاۋاپكەرشىلىگى ءۇشىن ماراپاتتاعانى ءبىز ءۇشىن مارتەبە جانە ۇلكەن قۋانىش, – دەدى ول.
ەڭبەگى ەسكەرىلگەندەردىڭ اراسىندا قاراعاندى وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى تايحان قالماحانوۆ تا بولدى. ول «ەرەن ەڭبەگى ءۇشىن» مەدالىمەن ماراپاتتالسا, «سترويكا ي ك» جشس-ءنىڭ جۇمىسشىسى سەمباي تۇياقوۆ قازاقستان رەسپۋبليكاسىنىڭ قۇرمەت گراموتاسىنا يە بولدى.
سونداي-اق, قاراعاندى وبلىسى اكىمىنىڭ ءبىرىنشى ورىنباسارى اسىلبەك دۇيسەباەۆ پەن «گوركومحوز» جشس ديرەكتورى مەيرام ىسقاقوۆ قازاقستان رەسپۋبليكاسى پرەزيدەنتىنىڭ العىس حاتىمەن ماراپاتتالدى.
قاراعاندى وبلىسى