رەسەيدىڭ ۆولگوگراد وبلىسىندا بولعان جول-كولىك وقيعاسى سالدارىنان قازاقستاننىڭ ءۇش ازاماتى زارداپ شەكتى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەدى.
«رف ءىىم ۆولگوگراد وبلىستىق باسقارماسىنىڭ دەرەگى بويىنشا 21 جەلتوقسان كۇنى كراسنوداردان قازاقستانعا باعىت العان اۆتوبۋس «كاماز» جۇك كولىگىمەن سوقتىعىسقان. اۆتوبۋستا 56 جولاۋشى بولعان, ونىڭ تورتەۋى قازاقستاننىڭ, ەكەۋى تاجىكستاننىڭ جانە قالعاندارى وزبەكستاننىڭ ازاماتى. اۆتوبۋس قازاقستاندا تىركەلگەن, سونداي-اق جولاۋشىلار كولىگىنىڭ جۇرگىزۋشىسى دە قازاقستان ازاماتى», دەدى ايبەك سمادياروۆ.
ونىڭ ايتۋىنشا, جول كولىك وقيعاسى سالدارىنان قازاقستان ازاماتى بولىپ سانالاتىن ءبىر جۇرگىزۋشى مەن ەكى جولاۋشى ءتۇرلى دەنە جاراقاتىن الىپ, ۆولگوگرادتىڭ №25 اۋرۋحاناسىنا جەتكىزىلگەن.
«ازاماتتارىمىزدىڭ جاراقاتى اۋىر ەمەس, وتا جاساۋدىڭ قاجەتى بولماعان. قازاقستاننىڭ استراحانداعى كونسۋلدىعى اۋرۋحانا اكىمشىلىگى جانە پوليتسيامەن بايلانىستا», دەدى ول.