قالا اكىمى التاي كولگىنوۆ ءبىلىم بەرۋ سالاسىنداعى قالالىق ينفراقۇرىلىمنىڭ دامۋى تۋرالى ايتىپ بەردى. اعىمداعى جىلى 6 مەكتەپ سالىندى,بۇل 5 مىڭ وقۋشىنى وقۋ ورنىمەن قامتۋعا مۇمكىندىك بەردى. 2020 جىلى 9,5 مىڭ وقۋشى ورنىنا ەسەپتەلگەن 12 مەكتەپ سالۋ جانە پايدالانۋعا بەرۋ جوسپارلانىپ وتىر. سونىمەن قاتار 12 مىڭ ورىندىق 8 مەكتەپ سالۋدى باستاۋ جوسپارلاندى. بۇل تۋرالى ەلوردا اكىمدىگىنىڭ ءباسپاسوز قىزمەتى حابارلادى.
- قازىر قالادا 115 مەكتەپ پەن 125 مىڭ وقۋشى بار. حالىقتىڭ وسۋىمەن قالادا الەۋمەتتىك وبەكتىلەرگە جۇكتەمە وسۋدە. 8 مەكتەپ قازىر ءۇش اۋىسىمدى وقىتۋمەن جۇمىس ىستەيدى. ءۇش اۋىسىمدى وقىتۋمەن بايلانىستى ماسەلەنى شەشۋ ءۇشىن جىلىنا كەمىندە 10 وقۋ ورنىن سالۋ قاجەت. 2020 جانە 2021 جىلدارى 12 مەكتەپتەن سالامىز. ءبىرىنشى كەزەكتە مەكتەپ قۇرىلىسىنا ارنالعان ورىندار انىقتالدى. مەكتەپتەردىڭ قۇرىلىسىنا جەكە ينۆەستورلاردى تارتامىز. وڭىرلىك كەڭەستە 22 مىڭ وقۋشى ورنىنا جەكە ينۆەستيتسيا ەسەبىنەن 22 مەكتەپ سالۋ قولداۋ تاپتى, - دەدى ا. كولگىنوۆ.
كەشەندى جوسپار شەڭبەرىندە 5 جىلدىق كەزەڭگە 60 مىڭ ورىندىق 50 مەكتەپ (ونىڭ ىشىندە 10 مەكتەپ قازىرگى مەكتەپتەر ايماعىندا) سالۋ جوسپارلانعان. 2 اۋىسىمدا بۇل 120 مىڭعا جۋىق ورىن اشۋعا مۇمكىندىك بەرەدى. جوسپارلاردى ىسكە اسىرۋ 2025 جىلعا قاراي مەكتەپ ورىندارىنداعى اعىمداعى جانە پەرسپەكتيۆالىق قاجەتتىلىكتەردى قامتاماسىز ەتۋگە مۇمكىندىك بەرەدى. ەلوردادا ەڭبەك ەتۋگە قولايلى جاعداي جاساۋ ءۇشىن 350 ورىنعا ەسەپتەلگەن مۇعالىمدەرگە ارنالعان جاتاقحانا سالىندى. وقىتۋشىلىق كادرلاردى دايارلاۋعا گرانتتار بولىنەدى.