«باسقادان كەم بولماس ءۇشىن ءبىز ءبىلىمدى, باي ءھام كۇشتى بولۋىمىز كەرەك. ءبىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەكتەردىڭ جولىندا جۇمىس ىستەۋ كەرەك». جارما اۋدانىنىڭ شار دەپ اتالاتىن شاعىن شاھارىنان ءسال ارىدە ورىن تەپكەن «جان», «داۋرەن» شارۋا قوجالىقتارىنىڭ جۇمىسىمەن جاقىن تانىسقاندا ۇلت ۇستازى احمەت بايتۇرسىن ۇلىنىڭ قانشا ۋاقىت وتسە دە ءمانىن جويمايتىن وسى ءبىر ءسوزى ەرىكسىز ەسكە تۇسكەن.
ءبىزدى كۇننىڭ بورانى مەن تولاسسىز جاۋىپ تۇرعان قارىنا قاراماي وسكەمەننەن وسىندا باستاپ كەلگەن «اگرارلىق نەسيە كورپوراتسياسى» اق-نىڭ وبلىستىق فيليالى ديرەكتورىنىڭ ورىنباسارى گۇلنۇر سولتانباەۆا «جان» شارۋا قوجالىعى بيىل «قاراپايىم زاتتار ەكونوميكاسى» باعدارلاماسى بويىنشا نەسيە الىپ, قوستانايدان 139 باس قازاقتىڭ اق باس سيىرىن ساتىپ اكەلگەنىن ايتقان-دى جول-جونەكەي. ءسوز لامىنەن مۇندا كەلۋدەگى ماقساتى مەملەكەت تاراپىنان بەرىلگەن نەسيەگە نە الىنىپ, نە الىنباعانىنا كوز جەتكىزۋ ەكەنىن اڭعارعانبىز. اڭگىمەنى ءبىزدى شاردان قارسى الىپ, شارۋا قوجالىعىنا قاراي الىپ جۇرگەن نۇرتۋعان ماناپوۆ كولىك ىشىندە باستاپ كەتتى.
«وسكەمەندە بىرنەشە جىل بانكتە جۇمىس ىستەدىم. باسقا قالالارعا دا جۇمىسقا شاقىردى. ويلانا كەلە, اۋىلعا كەلىپ, مال شارۋاشىلىعىمەن شۇعىلدانۋدى ءجون دەپ شەشتىم. قازىر اۋلەتىمىزبەن, اكەم بار, انام بار, ءىنىم بار, وسى جەردە اسىل تۇقىمدى قازاقتىڭ اق باس سيىرىن وسىرۋمەن اينالىسىپ جاتقان جايىمىز بار. 2011 جىلى «اگرارلىق نەسيە كورپوراتسياسىنان» 15 ميلليون تەڭگە نەسيە الىپ, شارۋانى ەندى قولعا العان كەزىمىزدە بار بولعانى 60-70 ءىرى-قارامىز بار ەدى. بۇگىندە مىنە, قۇدايعا شۇكىر, سيىرىمىزدىڭ سانى مىڭعا جەتىپ قالدى» دەگەندە اۋەلدە سەنبەگەنىمىز راس. ءبىزدى قويىپ, شارۋا قوجالىعىنا بۇعان دەيىن بىرنەشە مارتە نەسيە راسىمدەگەن «اگرارلىق نەسيە كورپوراتسياسىنىڭ» وكىلى دە «بۇل سول جەر مە, الدە باسقا جەر مە؟» دەگەندەي بۇرىن كەلگەن قىستاعىنىڭ ادام تانىماستاي وزگەرىپ كەتكەنىنە تاڭدانىسىن جاسىرمادى. «قازىر جايلانىپ شاي ءىشىپ وتىرعان ءۇيىمىز بىرنەشە جىل بۇرىن مال تابانىنداعى قاڭىراعان عيمارات بولعان دەسەم سەنبەيتىن شىعارسىزدار. وسىنىڭ ءبارى ۇلداردىڭ ەڭبەگىنىڭ, ءبىلىمىنىڭ ارقاسى. بىزگە سەنىم ءبىلدىرىپ, وسىمەن ءۇشىنشى مارتە نەسيە بەرگەن «اگرارلىق نەسيە كورپوراتسياسىنا» مىڭ العىس. مەملەكەتتىڭ قولداۋى بولماسا, بۇگىنگىدەي دارەجەگە جەتەر مە, جەتپەس پە ەدىك؟!» دەگەن شاي ۇستىندە اعايىندى نۇرتۋعان مەن داۋرەننىڭ اكەسى شىڭعىس اعامىز.
شارۋا قوجالىعىنداعى قايناپ جاتقان تىرلىكتى كورىپ وسكەمەننەن ارنايى كەلگەن «اگرارلىق نەسيە كورپوراتسياسى» اق-تىڭ وبلىستىق فيليالى ديرەكتورىنىڭ ورىنباسارى گۇلنۇر سولتانباەۆانىڭ كوڭىلىنىڭ توعايعانى راس. «اگرارلىق نەسيە كورپوراتسياسى» نەگىزىنەن مال جانە وسىمدىك شارۋاشىلىعىنا قاتىستى جوبالاردى قارجىلاندىرادى. 2019 جىلى «قاراپايىم زاتتار ەكونوميكاسى» باعدارلاماسى ارقىلى وبلىس بويىنشا جالپى سوماسى 900 ميلليون تەڭگەنى قۇرايتىن 42 جوباعا قارجى ءبولىندى. جىل اياعىنا دەيىن تاعى قۇنى 500 ميلليون تەڭگە بولاتىن 30 جوبانى قارجىلاندىرماق ويدامىز», دەيدى ول.
ماي وندىرىسىمەن شۇعىلداناتىن وسكەمەندەگى «تاگ-تين» جشس-سى «قاراپايىم زاتتار ەكونوميكاسى» باعدارلاماسى بويىنشا قوماقتى نەسيە الىپتى. سەرىكتەستىك باسشىسى قانات قۇرمانعاليەۆتىڭ ايتۋىنشا, وسى باعدارلاما اياسىندا بەرىلگەن قارجىعا زاۋىت بوي كوتەرىپتى. «زاۋىت قۇرىلىسىن 2016 جىلى باستاعانبىز. 2019 جىلدىڭ باسىندا زاۋىتتى ىسكە قوستىق. «قاراپايىم زاتتار ەكونوميكاسى» باعدارلاماسىنىڭ كومەگىمەن زاۋىت قۇرىلىسىنا جالپى سوماسى 700 ميلليون تەڭگە قارجى جۇمسالدى. ونىڭ 180 ميلليونى – ءوز قاراجاتىمىز. ءبىز قازىر كۇنباعىستان وندىرىلگەن مايدى قىتايعا ەكسپورتقا شىعارىپ جاتىرمىز, دەيدى كاسىپكەر.
شىعىس قازاقستان وبلىسى,
جارما اۋدانى