سوڭعى جىلدارى ەكونوميكاسى قارقىندى دامىپ, حالقىنىڭ ءال-اۋقاتى ەسەلەپ ارتىپ كەلە جاتقان وبلىستاردىڭ ءبىرى شىعىس قازاقستان ەكەنى انىق. كوپتەگەن يگى باستامالارعا سەبەپكەر بولىپ, سەرپىندى جوبالاردىڭ قاي-قايسىسىن دا ومىرگە بەيىمدەي بىلۋىمەن وزگە ايماقتارعا ۇلگى بولىپ وتىرعان ءوڭىردىڭ بۇگىنگى الەۋەتى وراسان. وعان وسى جەرگە جاقىندا جاساعان جۇمىس ساپارىم كەزىندە كۋا بولدىم.
ءيا, شىرايلى شىعىس قۋاتتى شىعىسقا اينالىپ كەلەدى ەكەن. پارلامەنتتەگى ارىپتەستەرىم – نۇرتاي سابيليانوۆ جانە تولەگەن يبراەۆپەن بىرگە اۋەلى وبلىس ورتالىعىنداعى مەديتسينالىق دياگنوستيكا ورتالىعىنا باس سۇقتىق. مۇنداعى مامانداردىڭ بىلىكتىلىگىن, قىزمەت ساپاسىنىڭ جوعارىلىعىن, ال باعاسىنىڭ قولجەتىمدىلىگىن جاقسى بىلەتىن وزگە ءوڭىر تۇرعىندارى مەن رەسەي ازاماتتارىنىڭ جىل ون ەكى اي اعىلىپ جاتاتىنىن كوپ ەستيتىنبىز. سول ءسوزدىڭ شىندىق ەكەنىن كوزىمىزبەن كوردىك.
مۇندا اتقارىلعان قىرۋار ءىستىڭ ىشىنەن, اسىرەسە, كەلۋشىلەردىڭ كەزەگىن سەيىلتۋ تۇرعىسىندا قولعا الىنعان شارالار وڭ اسەر قالدىردى. اتاپ ايتساق, ورتالىقتان شالعايدا جاتقان اۋدانداردا دياگنوستيكا ورتالىعىنىڭ فيليالدارىن اشۋ, ەلەكتروندى تالون جۇيەسىن ەنگىزۋ سىندى جولدار قاراپايىم حالىقتىڭ تۇرمىسىن جەڭىلدەتە تۇسكەن. ال مۇنداعى زاماناۋي قۇرىلعىلار مەن قوندىرعىلار, ولاردىڭ قۇلاعىن ۇستاعان بىلىكتى ماماندار كوپتىڭ كوڭىلىنەن شىعىپ, ناۋقاستىڭ دەرتىن ءدال انىقتاپ, داۋاسىن تابۋعا تىكەلەي ءارى ءتيىمدى اسەر ەتۋدە.
وبلىستا الەۋمەتتىڭ الەۋەتىن جاقسارتۋ ىسىنە كوپ كوڭىل ءبولىنىپ جاتقانى دەپۋتات رەتىندە مەنى شىن قۋانتتى. ماسەلەن, وسكەمەنگە ىرگەسى ءتيىپ جاتقان ۇلان اۋدانىنىڭ وزىندە الەۋمەتتىك نىساندار قاتارى جىلدان جىلعا ارتىپ كەلەدى. داڭقتى باتىر, ايگىلى پارتيزان قاسىم قايسەنوۆتىڭ ەسىمىن العان اۋدان ورتالىعىندا حالىقتى باسپانامەن قامتۋ ماسەلەسى جان-جاقتى ويلاستىرىلعان ەكەن. «قولجەتىمدى باسپانا-2020» مەملەكەتتىك باعدارلاماسىنىڭ اياسىندا اۋدان ورتالىعىندا 80 پاتەرلى ءۇيدىڭ قۇرىلىسى قىزۋ ءجۇرىپ جاتسا, ەكىنشى جارتىجىلدىقتا 95 پاتەرلى تاعى ءبىر تۇرعىن ءۇيدىڭ قۇرىلىسى باستالماق ەكەن. بۇل تۇرعىن ۇيلەرگە جاس وتباسىلار مەن بيۋدجەتتىك سالا قىزمەتكەرلەرى, مەملەكەتتىك قىزمەتكەرلەر جانە ارداگەرلەر ءبىرىنشى كەزەكتە قونىستاناتىنى دا ورىندى ويلاستىرىلعان.
قازاق مەكتەبىنىڭ سۋ جاڭا عيماراتى بارلىق تالاپتارعا ساي جاسالعان. سونداي بيزنەس نىسانىنىڭ ءبىرى – «وسكەمەن قۇس فابريكاسى» اق اۋدان ورتالىعىندا ستاديون سالىپ بەرىپتى. بۇل ستاديون قۇرىلىسىنا 40 ملن. تەڭگە جۇمسالىپتى. سالاماتتى ءومىر سالتىن قالىپتاستىرۋ ىسىنە ۇلەس قوسقان اكتسيونەرلىك قوعامنىڭ ءىسى قۇپتاۋعا تۇرارلىق.
ءسوزىمنىڭ باسىندا ايماقتا قولعا الىنعان تىڭ باستامالار جاپپاي جەمىس بەرىپ جاتقانىن اتاپ وتكەن ەدىم. سونداي ءساتتى جۇزەگە اسىپ جاتقان باستامانىڭ ءبىرى – تىرەك ەلدى مەكەندەردى تۇلەتۋ باستاماسى. وسى باعدارلاما اياسىندا تۇرمىسىن تىكتەپ, ءتۇتىنىن تۇزەگەن ەلدى مەكەننىڭ ءبىرى – بۇرىنعى اۋدان ورتالىعى بولعان بوزانباي اۋىلى. مەنى ءبىر قۋانتقانى, بۇرىنعى اۋدان ورتالىعىنىڭ قايتا جاندانىپ, جاڭا عيماراتتار سالىنىپ, جاڭا كەيىپكە ەنىپ كەلە جاتقانى. اۋىلدىڭ نەگىزگى تىرەگى بولعان اۋرۋحانا عيماراتىن اقىل-ەسىندە اۋىتقۋ بار جاندارعا لايىقتاپ, قايتا جاراقتاۋ ارقىلى جەرگىلىكتى بيلىك قوسىمشا جۇمىس ورىندارىن اشىپ وتىر.
مۇنداي يگىلىكتى ىستەرگە جارما اۋدانىنا بارعان كەزىمىزدە دە كۋا بولدىق. اۋدان ورتالىعى – قالباتاۋ اۋىلىنداعى جاستار ءۇيىنىڭ جۇمىسىمەن تانىسۋ بارىسىندا جاستاردىڭ بوس ۋاقىتىن وتكىزۋىنە اتقارۋشى بيلىك تاراپىنان نەندەي قولداۋ كورسەتىلىپ جاتقانىن كوردىك. جۋىقتا عانا اشىلعان جاڭا ورتالىق از ۋاقىتتىڭ ىشىندە ايتارلىقتاي اۋقىمدى ىستەر تىندىرىپ ۇلگەرگەن ەكەن. اۋىل جاستارىنا اتالمىش ورتالىقتا بوس ۋاقىتتارىن ءماندى وتكىزۋ ءۇشىن ايتارلىقتاي جاعداي جاسالىپتى. وسى عيماراتتا ورنالاسقان ەلەكتروندىق كىتاپحانا, زاماناۋي ونلاين ورتالىقتىڭ دا اۋىل وقىرماندارى ءۇشىن بەرەرى مول.
بۇلار – شىعىس قازاقستانداعى ءبىز كورىپ ۇلگەرگەن يگى ىستەردىڭ ءبىر پاراسى عانا. ال مۇنداعى وڭ باستامالاردى وزگەلەرگە تاراتۋ, ۇلگى ەتۋ – حالىق قالاۋلىلارىنىڭ مىندەتى.
ەرگەن دوشاەۆ,
پارلامەنت ءماجىلىسىنىڭ دەپۋتاتى.